2
Nga Miguliug genat tu Dapit Silangan
1 Maˈantu, migigetaw si Isus ditug lunsud Betlehem, sakup prubinsya Judea, timpu ni Adiˈ Herodes. Naa tubus nitu, ndaˈ maiben, duuni mituaˈ ditu Jerusalem nga mengumitun, genat ilan tu dapit silangan. 2 Mendadi benaˈ minateng su mengumitun kia, sinaak nilan tu nga getaw dia, “Ki gembataˈ migigetaw dini, gasalen meglegadiˈ tu nga getaw Judea, adin ma dun? Puˈ duuni minitaˈ namiig bitun misebang ditu silangan, iini tuˈus di kegigetawen. Kaas mipanaw ami dini, adun mengamuyuˈ ami lumuˈud diniin.”
3 Naa kini si Adiˈ Herodes, benaˈ midengegen su tinaluˈ nu nga mengumitun, milibuleng patiˈ. Sampay sug launan getaw dia Jerusalem, milibuleng ilan dun dadema. 4 Saˈ maˈnia, pipungun ni Herodes su kelaun kaunutan nug belian nu getaw Judea mukaˈ su nga mekpetuˈun di Misulat Palinta nu Megbebayaˈ. Benaˈ misabi ilan, sinaak ni Herodes dinilan, “Naa mekatag di Tinduˈ nu Megbebayaˈ Meglekaunutan, alanduni sinulat ditu Taluˈ nu Megbebayaˈ, adin daw pegigetaw?”
5 Kaliˈ ilan sembag, “Diag lunsud Betlehem, sakup dadema prubinsya Judea kini, puˈ iini sinulat nu pimuunan nu Megbebayaˈ dengantu ditu Misulat Taluˈen, laung,
6 ‘Yaˈa Betlehem, sakupa Judea,
yaˈai tampusan metaas di ngag lunsud di Judea.
Puˈ megenat pa diniˈa ki kaunutan,
iini meguit tu piglegetawan ku, sug bansa Israel!’”
7 Naa saˈ maˈnia, kini si Herodes, pitawagen pelum su nga miguliug kia genat tu dapit silangan, laak pigbuninen, sinaaken dayun dinilan su gebii nu kesebang nug bitun kia. 8 Benaˈ pisuun nilan diniin, sinuguˈen ilan dayun mundas ditug Betlehem, kaliˈ pektituluˈ dinilan, “Naa, panaw namu, penengaw niu gupia ki gembataˈ kiin! Dayun saˈ mbaangan na niu, pesuun niu dinaan, adun mekeditu dau dema mengamuyuˈ diniin.”
9-10 Mipanaw dayuni nga mengumitun kia. Benaˈ dia nailan dalan, masiˈ minitaˈ nilan puliˈ kig bitun kia, su gandang minitaˈ nilan ditu silangan. Saˈ minitaˈ nilan, aba, pinleliag ilan dun patiˈ! Mukaˈ ibayan ilan nug bitun kia sampay midepet nilan sug balay pigigetawan nu gembataˈ kia, dia dayun tuminlen sug bitun. 11 Sumiled ilan diag balay, minitaˈ nilan dayun tuˈu ki gembataˈ kia, sampay su ginaˈen si Maria. Minginluˈud ilan dayun, tuminamuy ilan diniin. Mukaˈ pinukaˈan nilani nga giwit nilan ngag bulawan, pelinan, mukaˈ mira, iini seginis pagemut, bigay nilan dayun dia gembataˈ kia.
12 Tubus itu, minuliˈ tug benwa nilan su nga mengumitun. Laak lain dalanig bianan nilan, puˈ pigad dinilan nu Megbebayaˈ pibian di teginepen, subay ndiˈ daw mpuliˈ mian ditu ni Herodes su nga mengumitun kia.
Su Kelaguy ni nga Isus tug Benwa Ehipto
13 Mendadi benaˈ su kepalus nu nga mengumitun, si Jose kiin, duun pelumi sesuguˈen nu Kaunutan Megbebayaˈ getaw langit mituaˈ diniin, pibian da gusay di teginepen. Kaliˈ pektaluˈ su getaw langit, “Duunig delendeman ni Herodes, ki gembataˈ kiin, penengaunen, puˈ petainen. Naa pegbuata, uit mu su gembataˈ dakus su ginaˈen, laguy amu tug benwa Ehipto. Ditu amu dayun pegbenwa, sampay di gendaw teluˈen ku pa diniˈa.”
14 Benaˈ mideksuˈ mektaluˈ su getaw langit, migbuat dayun si Jose, iwiten tuˈu su gembataˈ dakus su ginaˈen, mingelem ilan mpanaw, pangay ilan tug benwa Ehipto. 15 Naa benaˈ minibeniben, minateng ilan ditug Ehipto, mukaˈ ditu ilan migbenwa sampay minatay si Herodes. Kaas mipenggulaulaig launanen kia, puˈ adun menuud su pisulat nu Kaunutan Megbebayaˈ tu pimuunanen dengantu ditu Misulat Taluˈen, laung, “Sinuguˈu sug Bataˈu megawaˈ tug benwa Ehipto.”
Su Kematay tu nga Gembataˈ
16 Naa mendadi kini si Herodes, benaˈ misuunanen puˈ masiˈ pigekalan nu nga miguliug kia genat tu dapit silangan, mitutung gupia gangit si Herodes. Kaliˈ pegleketau, mikpalinta dayun pemetain ki kelaun gembataˈ diag Betlehem sampay ditug lumibut benwa, saˈ gembataˈ laki duaˈ tauni gidaden, kampuˈ nu nga sumilung dun. Iini piglekwinta ni Herodes tu gidad nu gembataˈ kiin mpeduma sia matay, su gendaw nu kesebang nug bitun kia pisuun diniin nu nga miguliug kia.
17 Maˈantu, minuud su sinulat dengantu ditu Misulat Taluˈ nu Megbebayaˈ nu pimuunanen si Jeremias, laungen,
18 “Duuni tingeg ditug lunsud Rama,
miktenlis sabaˈ meliget kelegenay.
Puˈ si Raquel, pingeduyanen su ngag bataˈen.
Ndaˈiduni mekengamuˈ dun,
puˈ su ngag bataˈen, ndaˈ na.”
Su Kauliˈ ni nga Isus genat tug Ehipto
19 Naa saˈ minibeniben, minatay si Herodes. Mendadi benaˈ ndaˈ na si Herodes, duun pelumi sesuguˈen nu Kaunutan Megbebayaˈ getaw langit mituaˈ dini Jose ditu pa benwa Ehipto, pibian da puliˈ di teginepen. 20 Kaliˈ pektaluˈ su getaw langit, “Naa, pegbuata, uit mu kig bataˈ kiin dakus su ginaˈen, uliˈ namu ditug benwa nu nga getaw Israel. Puˈ su mekpatay sia dig bataˈ kia, minatay na.” 21 Maˈantu, benaˈ migendaw, migbuat dayun si Jose, iwiten puliˈ tuˈu su gembataˈ dakus su ginaˈen ditug benwa nu nga getaw Israel.
22 Laak pisuun dini Jose puˈ iini misukli dini Herodes meglegadiˈ ditu Judea, si Arquelao, bataˈ da gusay ni Herodes. Kaliˈ medengeg ni Jose, mindek iin mpuliˈ ditu Judea. Laak tinituluˈan puliˈ nu sesuguˈen nu Kaunutan genat tug langit, pibian da gusay di teginepen, kaas minundas ilan tu prubinsya Galilea, 23 dia ilan dayun migbenwa lunsud piningalan dun Nazaret. Maˈantu, minuud pa padun su tinaluˈ dengantu nu nga pimuunan nu Megbebayaˈ, “Iini paingalan diniin, Getaw Nazaret.”