9
Pidasun ni Isus su Salaˈ nu Pilung sampay Piuliˈanen
1 Naa duminangan na pelum si Isus dia sekayan, duminipag muliˈ tug lunsud tinuunanen. 2 Naa benaˈ minateng dia, duuni nga getaw pegbuligan nilan di sinampuyuan ki mipilung, iwit nilan dia ni Isus. Mendadi si Isus, benaˈ minitaˈen ki kesalig nilan diniin, miktaluˈ di pilung kia, “Naung, pia dai ginaa mu! Pidasun na su salaˈ mu.”
3 Naa ki nga mekpetuˈun di Misulat Palinta nu Megbebayaˈ, benaˈ midengeg nilan ki tinaluˈ kia ni Isus, kaliˈ ilan pektaluˈ dig dialem delendeman nilan, “Paa, ki getaw kini, piksudiˈanen pelum su Megbebayaˈ!”a
4 Dagid misuunan ni Isusig dialem delendeman nilan kia. Kaliˈ dayun pektaluˈ dinilan, “Mauma dema melaatig delendeman niu? 5 Puˈ saˈ su kilawan laak, melemu pebelusen saˈ teluˈenen, ‘Pidasun na su salaˈ mu.’ Melemu dadema pebelusen saˈ teluˈenen, ‘Pegbuata, panawa dayun.’ 6 Dagid naan kini, luminusad nau, miksibaluyu Bataˈ nu Kilawan. Saˈ maˈantu, paitaˈu diniu puˈ duuni pegbayaˈu mekpedasun di salaˈ dinig dibabaw lumbang.” Luminingay dayun si Isus tu pilung mukaˈ miktaluˈ diniin, “Naa, pegbuata, sikwat mui sinampuyuan diniˈa kiin, mukaˈ uliˈa na!”
7 Migbuat tuˈu su pilung kia, dayun minuliˈ tug balayen. 8 Benaˈ minitaˈ nu melaun getaw dia, mindek ilan dunut mipenalan nilan su Megbebayaˈ, puˈ masiˈ mekesalebuˈi pegbayaˈ bigayen tu kilawan.
Pisakup ni Isus si Mateo
9 Naa benaˈ minundas si Isus, duuni mipekitaˈen sala tawan mendawat buis pegingkud diag bataˈ gupisinanen, ngalanen si Mateo. Sinabi ni Isus si Mateo, laungen, “Dunuta dinaan.”
Benaˈ midengeg ni Mateo, migbuat dayun, migdunut tuˈu dini Isus, suminakup na diniin.
10 Naa duuni gendaw, minaan si Isus diag balay ni Mateo. Melaun mendawat buis mukaˈ duma mekesesalaˈ getaw dumingan maan dini Isus, ilan nu nga sakupen. 11 Mendadi ki nga Pariseo, benaˈ minitaˈ nilan, sinaakan nilan dayun su nga sakup ni Isus. Laung nilan, “Paa, mauma dema ki mekpetuˈun diniu kia, dumingan main maan di nga getaw, maˈniaig betad nilan?”
12 Laak kaliˈ medengeg ni Isus su sinaak nilan, simbagen, “Naa su getaw ndaˈig leduunen, ndiˈ kambat mekpebulung, subay su laak duunig leduunen. 13 Yamu kiin, subay mesabut niu ki misulat ditu Taluˈ nu Megbebayaˈ, laung, ‘Iini mauyaˈan ku penggulaulaan nu getaw, kig linelaatay, sabayaˈ su ngag betang ilaken niu dinaan.’” Mendadi, diksuˈ ni Isus su taluˈen, “Naa naan kini, iini luminusadu dun dinig lumbang, adun pesikesuunen ku su laak mekesesalaˈ getaw, kanaˈ nu nga gandang mekesuun getaw.”
Sinaakan si Isus mekatag di Kekpuasa
14 Naa mendadi duuni gendaw, su nga sakup ni Juan kiin su Memunag Tubig, luminabet ilan dini Isus, kaliˈ ilan saak diniin, “Sir, mauma dema maˈantu? Yami, mekpuasa mami. Saˈ su nga Pariseo, maˈantu dadema. Dagid su ngag daniˈa sakup, ndiˈ mailan mekpuasa.”
15 Kaliˈ sembag si Isus, “Waˈa daan, puˈ penenggiˈan dun sug belaˈi. Su nga suminaup dig belaˈi, kendutaˈen ba nilan pekpuasa, saanan duma pa nilan su menginsawa? Laak dagid duuni gendaw mateng, uiˈen dinilan ki menginsawa, dekag pailan tuˈu pekpuasa.”b
16 Laung pagid ni Isus, “Mesama da saˈ eklebani suub. Duun bai getaw, iini ekleben dig danul suuben kig begu gupia penepeten? Puˈ saˈ pinenggiˈ pemaˈantuunen, saˈ mengeleeˈ sug begu penepeten, mauguten dayun sug danul kia, benaˈ megdegadega dayun su keliwag nu gediten.c
17 “Mukaˈ pagid sug betad megbetang penginumen di pemetangan binaal panit petubuˈen, maˈantu dadema.d “Kig begu penginumen, betangen ba dig daan pemetangan? Puˈ saˈ pinenggiˈ maˈnia, saˈ tumulin su penginumen, ndiˈ ba megbetu su panit petubuˈen? Deksuˈanen, megulaˈ su penginumen, mukaˈ meglaat dadema su pemetanganen. Kaas sug begu penginumen, subay begu dadema su pemetanganen, puˈ adun ndiˈ meglaat su penginumen, sampay su pemetanganen.”
Pitubuˈ Puliˈ ni Isusi Gembataˈ mukaˈ Piuliˈanenig Libun
18 Mendadi segay pa ni Isus mektaluˈ, duuni kaunutan di simbaan nu getaw Judea minangay dia niin. Minginlulud su kaunutan di gedapan ni Isus, laungen dayun diniin, “Sir, nandaw ia sug bataˈu delaga, minatay. Dagid pia maˈantu, kelelaat dema tuˈu diniˈa, Sir, laaway mu. Puˈ suunan ku saˈ depenan mu, metubuˈ puliˈ kig bataˈu kia.”
19 Kaliˈ medengeg ni Isus su tinaluˈ nu kaunutan kia, migbuat, dayun migdunut diniin, ilan nu nga sakupen.
20 Laak saanan ni Isus mpanaw, duuni sala tawan libun, sepuluˈ buˈ duaˈ taun na, tebiaˈ leduunen kig betad libun. Mendadi kig libun kini, mikpesempel dia teliudan ni Isus, diluˈen dayun su kuyamay suuben. 21 Puˈ maaˈ laungen dig dialem ginaanen, “Pia medeluˈu laaki suuben kiin, mauliˈan nau dun.”
22 Benaˈ miakuy nug libun su suuben, luminingay si Isus, minitaˈen dayun sug libun, kaliˈ pektaluˈ diniin, “Naa Enaung, gempia dai ginaa mu. Miuliˈan ka na, sabaˈ nu kesalig mu.” Sikna mitaluˈ ni Isus, miuliˈan sug libun.
23 Naa iin pa bundas si Isus tug balay nu kaunutan di simbaan kiin. Mendadi, benaˈ minateng ilan ditu, minitaˈ ni Isus su nga getaw misasaw, dakus su menlantuyan sia. 24 Miktaluˈ si Isus, “Baa, gawaˈ amu diin, launan niu! Puˈ gembataˈ kiin, kanaˈ ma minatay. Pektulug da!”
Piketuanan laak nu nga getaw si Isus.
25 Mendadi si Isus, benaˈ piguaˈen dia su nga melaun getaw, sumiled dayun dia sugud belilidan nu gembataˈ. Benaˈ mikeseled, piguidanen dayun su gembataˈ di kemet. Migbuat dayun su gembataˈ.
26 Naa saˈ maˈantu, migleep diag lumibut benwa su gukiten nu mipenggulaula kia.
Pineguliˈan ni Isusig Duaˈ Tawan Buta
27 Naa benaˈ minundas si Isus, duunig duaˈ tawan buta tuminakin diniin. Migbeksay ilan, laung nilan, “Uu Sir, Sapuˈa ni David, lelaatay mu ami!”
28 Mendadi benaˈ mitulan dig balay si Isus, mikpesempel diniin kig duaˈ tawan buta kini. Sinaak ni Isus dinilan, “Naa, mikpetuud amu dun puˈ megagau meneguliˈ diniu?”
“Waˈa, Sir!” simbag nilan.
29 Dipenan dayun ni Isus ki mata nilan, dunut tinaluˈen, “Kagina suminalig amu dinaan, mekengitaˈ namu!” 30 Mikengitaˈ dayun tuˈu sug buta. Laak inungub pailan gupia ni Isus, laungen, “Pia sala tawan, ndaˈiduni ukitan niu di mipenggulaula kini!”
31 Dagid mipanawig duaˈ tawan kia, lineep nilan sug benwa kia, pinemalan nilan ukitay ki pinggulaula kia ni Isus dinilan.
Piuliˈan ni Isusig Beed
32 Naa mendadi su kepalus nu nga kamun buta, duun pagidi nga getaw mituaˈ dini Isus, migated ilan beed, sabaˈ silunuˈan menulay. 33 Lemen laak miutidan ni Isus ki menulay kia, mikektaluˈ dayun puliˈ sug beed. Misebuˈan dayun su nga melaun getaw dia, laung nilan, “Ita nga getaw Israel, ugat pa ta maitaˈ ki mipenggulaula maˈnini palas.”
34 Dagid su nga Pariseo, laung nilan, “Aa, ki getaw kiin, iini megaganen dun utidayi menenulay, puˈ bigayan ginuung nu kaunutan nu menenulay.”
Gembagelig Lelaat ni Isus di nga Getaw
35 Mendadi mipanaw si Isus, lineepen su ngag lunsud mukaˈ gimbelayan diag lumibut benwa. Mikpetuˈun si Isus dia nga simbaan nu getaw Judea mukaˈ migukit di Gempia Petenday puˈ pikpuunan na su Keglekaunutan nu Megbebayaˈ. Pineguliˈanen pa pagid su nga migladu, pia alandunig leduunen atawaka kulang dig lawasen. 36 Kaliˈen pegbentayay su melaun gupia getaw, milelaat dinilan si Isus. Puˈ meligeti kelegenay nilan, mukaˈ ndaˈiduni gengagan nilan dun, dialem ginaanen, maaˈ ilan karniru ndaˈiduni megingat dun. 37 Miktaluˈ si Isus di nga sakupen, “Naa ki sengkuˈ, gembagel gupia sia, laak meliang dai getaw meglegani dun.e 38 Kaas penenabi amu tu Megbebayaˈ, su gapuˈ nu sengkuˈ, adun suguˈenen pai ngag duma getaw meglegani.”