8
Minamal si Isus Megukit di Gempia Petenday
1 Naa ndaˈ maiben, mipanaw si Isus, lineepen su ngag lunsud mukaˈ gimbelayan diag lumibut benwa, pegukitenen ki Gempia Petenday puˈ pikpuunan na su Keglekaunutan nu Megbebayaˈ. Duma ni Isus su sepuluˈ buˈ duaˈ tawan peneliganen, 2 dakus duun dademai migdunut dinilan ngag libun, su nga gandang pingutid duni menenulay mukaˈ piuliˈan dig leduun nilan. Su sala tawan dinilan, si Maria Magdalena, su pingutidan diniini pitu buuk menenulay, 3 dayun si Juana, sawa ni Cusa peneligan ni Herodes, sampay si Susana. Dakus melaun paig libun, ilani migabang meglegamut tu ketubuˈan ni nga Isus.
Su Sambingay mekatag di Kegimula
4 Naa pinemalan si Isus laaway nu nga getaw genat tu ngag lumibut lunsud. Benaˈ melaun gupia getaw mikpungun ditu niin, migukit si Isus dinilan sambingay.
5 Kaliˈ pektaluˈ si Isus, “Duuni getaw minangay tug binaalanen adun megimula. Laak benaˈ saananen meksigwag, duunig beniˈ mitenaˈ ditug dalan, kaas miˈindegan nu nga getaw mukaˈ pingektuk nu nga manukmanuk. 6 Naa duun dademai mitenaˈ ditug betuan. Benaˈ mintubuˈ, milawes dayun, puˈ memala sug lupaˈ. Minatay da pelum. 7 Naa duun pa pagidig beniˈ mitenaˈ dig dugian. Kaliˈ pentubuˈ su sigwag, mintubuˈ dadema su ngag dugi. Benaˈ tuminulin, milebeng dun su pimula. 8 Laak tumuˈ kig duma beniˈ, mitenaˈ tuˈu di pialupaˈ, kaas mekelengasi tubuˈen. Benaˈ sumingkuˈ, duuni pingmegatus.”
Diksuˈ dayun ni Isus su taluˈen, “Adin sug duuni telinganen, mekineeg dema tuˈu!”
Su Pantag nu nga Sambingay ni Isus
9 Naa mendadi, inubug dini Isus nu nga sakupen, pegulugenen dinilan su sinambingayen kia. 10 Kaliˈ sembag si Isus, “Aa naa yamu, buasan na diniu su gandang pigbuni mekatag di kesakup tu Keglekaunutan nu Megbebayaˈ. Laak dagid pebian laak di sambingay su kegukit dun tug lain getaw, adun mengenleng dailan, laak ndiˈ ilan mekengitaˈ. Mekineeg dailan, laak ndiˈ ilan mekesabut.”
Pigulug ni Isus su Sambingayen mekatag di Kegimula
11 Kaliˈ gusay pektaluˈ si Isus, “Naa mendadi, kinii gulugan nu sambingay kia. Kig beniˈ kiin, iin su Gempia Petenday genat tu Megbebayaˈ. 12 Naa sug beniˈ mitenaˈ diag dalan, damikian dun su nga getaw mikedengeg tu Gempia Petenday kia, laak benaˈ medengeg nilan, mateng dayun su Palin, uaˈenen pelum tug delendeman nilan su Gempia Petenday, adun ndiˈ ilan mekpetuud dun, kaas ndiˈ dailan dema megawen. 13 Naa su pelum beniˈ mitenaˈ diag betuan, iin su nga getaw, sikna medengeg nilan ki Gempia Petenday, telimaˈen nilan dayun mukaˈ penleliagen ilan dun. Laak ndaˈ pengganget dig delendeman nilan, kaas kanaˈ maiben su kekpetuud nilan. Saˈ matengi kepenulay dinilan, teliudan nilan su kekpetuud nilan. 14 Naa sug beniˈ mitenaˈ dema dig dugian, iin su getaw tumuˈ mikedengeg tu Gempia Petenday, laak dagid tubus itu, megelaˈi ginaa nilan tu kelibuleng nilan tu kegleketubuˈ nilan mukaˈ su gaˈus nilan sampay di nga gayepan nilan, kaas maulakanen su Gempia Petenday. Benaˈ ki mamaˈ bunga nilan, ndiˈ na mainug. 15 Mendadi kig beniˈ mitenaˈ dia pialupaˈ, iin tumuˈ su nga getaw mekedengeg tu Gempia Petenday dayun pepengganget nilan dig delendeman nilan, sabaˈ gempia mukaˈ melegdengig delendeman nilan. Dayun mektigel ilan, sampay megbunga ilan.”
Su Metuud Sinuunan, subay Dunutan mukaˈ Sigwagen
16 Kaliˈ pektaluˈ si Isus, “Mendadi ki suluˈ, ndiˈ tutudan dayun uklubay bandi, atawaka betangen tu silung belilidan. Segaga betangen dig dempaˈan, adun medelaganen su nga getaw suled tug balay.
17 “Kaas adin su giglud nandaw, mbuasan da saˈ maiben. Adin su pigbuni nandaw, pesuunen da saˈ maiben.
18 “Kaas ki kelaunanen kini medengeg niu dini naan, talentenay niu gupia. Puˈ adin su getaw duunig daniin, begayan pa padun. Adin pasiˈ su getaw ndaˈidunig daniin, laak uiˈen pa diniin su maikaˈ sia daniin.”a
Su Tantu Ginaˈ ni Isus mukaˈ Pateden
19 Naa su ginaˈ ni Isus mukaˈ su nga pateden, linaawan nilan sia si Isus, laak ndiˈ mesuˈati kekpesempel nilan diniin, sabaˈ nu melaun getaw. 20 Mendadi, pisuunan dun dayun si Isus, laung nu getaw diniin, “Sir, su ginaˈ mu mukaˈ su nga pated mu, pegindeg ilan diag liu, peksebiin ka nilan.”
21 Sumimbag si Isus, “Naa, waˈa. Laak adini getaw mekineeg di Gempia Petenday genat tu Megbebayaˈ, dayun pegdunutanen, iin pa pagidi ginaˈu mukaˈ nga patedu.”
Pimaag ni Isusi Salindapak
22 Naa duuni gendaw duminangan si Isus di sekayan, ilan nu nga sakupen. Laung ni Isus, “Naa, dumipag ita dinig linaw.” Tuminulak nailan dema. 23 Selian nilan mekpangay tug dipag, tinulug si Isus. Mendadi ndaˈ maiben, tekaw miksalindapak, misipukan dayun ki sekayan nilan kia, misimpitan ilan gupia. 24 Mikpesempel dini Isus su nga sakupen, tinanud nilan dayun iin, laung nilan, “Ii, Sir, megbayaˈbayaˈ ita dun ini!”
Migbuat si Isus, pimaagen dayun su genus mukaˈ su nga nabek. Misikpaˈ ki salindapak, miksilengen gupia tuˈu sug linaw. 25 Kaliˈ pektaluˈ si Isus dia nga sakupen, “Mauma dema ndaˈiduni kesalig niu dinaan?”
Mindek dayun su nga sakup ni Isus, misebuˈan ilan dun gupia. Kaliˈ ilan peksinaakay, “Taˈ gasal dun saan ini, pia su genus mukaˈ nabek, masiˈ mesuguˈen, mekpetuud dayun diniin?”
Piuliˈan ni Isusi Getaw Silunuˈan Menulay
26 Naa midengguˈ si nga Isus ditug benwa tug dipag Galilea piningalan dun Gerasa. 27 Benaˈ mikelusad si Isus tu sekayan, duuni getaw dangen dig lunsud kia suminungkak diniin. Ki getaw kini, silunuˈan menulay. Miniben na ndaˈ peginapet, kanaˈ na dema megbenwa dig balay, puˈ dia na kelebengan pegbenwa. 28 Mendadi, benaˈ minitaˈ nu silunuˈan kia si Isus, mimeksay, miglaub di gedapan ni Isus, minekeg mektaluˈ, laungen, “Ii, yaˈa Isus, Bataˈa nu Tampusan Metaas Megbebayaˈ, taˈ maig labet mu dinaan? Kelelaat dema tuˈu diniˈa, ndiˈ mau pa peglegetay!” 29 Kaas mitaluˈ dun nu menulay, puˈ sinuguˈ ni Isus megawaˈ di getaw kia. Betaden, tatap peglegetay nu menulay ki getaw kia, kaas ginapus nu nga getaw, pinusasan kadina, iniketan pa padun su geksuden. Dagid getusenen laak su ngag baluden, dayun uitay nu menulay tug limawaˈ.
30 Mendadi, sinaakan ni Isus ki menulay kia, “Taˈ mai ngalan mu?”
Kaliˈ sembag, “Si Linaksaˈ.” Puˈ melaun gupia menenulay sumilunuˈ dun. 31 Pigubug nilan dini Isus, ndiˈen pailan pedituun linaw gapuy.
32 Naa duuni sala kauluan babuy dia mesempel, melaun gupia babuy, meglunang ilan dia gabig. Pinengi nu menenulay dini Isus, pedituunen ilan ngag babuy kia, adun sulunuˈ ilan dinilan. Mendadi, biwang ni Isus. 33 Dayun memegawaˈ dia getaw kia su menenulay, sumilunuˈ ilan pelum ditu ngag babuy. Benaˈ su sala kauluan babuy, minggebek dumiksun ditug delipasan pangay diag linaw, migelaˈ ilan dayun melemes.
34 Mendadi, benaˈ minitaˈ nu nga megingat tu ngag babuy, minggebek ilan ditug lunsud, pigukit nilan dayun dia ki mipenggulaula kia, sampay ditug lumibut benwa. 35 Benaˈ su getaw inukitan nilan dun, linaawan nilan su mipenggulaula kia. Benaˈ midepet ilan ditu ni Isus, iini mitaangan nilan, su getaw inutidan tu menenulay, pegingkud laak iin di gedapan ni Isus. Mikseluk na suuben, miseksud na tuˈu su pianan ginaanen. Naa, mindek patiˈ su nga getaw. 36 Inukit dayun nu nga mikaitaˈ dun su kebian kauliˈay nu getaw kia silunuˈan menenulay. 37 Saˈ maˈantu, su tibaˈan getaw dig lumibut nu Gerasa, inubug nilan dini Isus, megawaˈ dia nilan, puˈ mindekan ilan patiˈ. Saˈ maˈantu, duminangan puliˈ si Isus ditu sekayan nilan, puˈ dumipag ilan puliˈ diag linaw. 38 Migubug tundug dini Isus ki getaw kia, su inutidan tu menenulay.
Dagid piuliˈ ni Isusi getaw kia, laungen, 39 “Uliˈa ma, pegukit mu ditu su gabang nu Megbebayaˈ diniˈa.”
Naa saˈ maˈantu, mipanaw su getaw kia, sinigwagen tuˈu ukitay dig lunsud kia su pinggulaula ni Isus diniin.
Pitubuˈ Puliˈ ni Isusi Gembataˈ mukaˈ Piuliˈanenig Libun
40 Naa benaˈ minateng puliˈ si nga Isus ditug dipag linaw, didialan si Isus nu kelaun getaw dia, puˈ pigelatan nilan iin. 41 Mendadi, duuni minangay ditu ni Isus kaunutan di simbaan nu getaw Judea, ngalanen si Jairo. Benaˈ minateng, miglaub di gedapan ni Isus, inubugen dayun diniin megdunut tug balayen. 42 Puˈ duunig buntung bataˈen delaga meliget megladu, pekagawinaa na. Kig bataˈen kini, mabuˈ sepuluˈ buˈ duaˈ tauni gidaden. Migdunut dayun dini Jairo si Isus.
Naa selian ni Isus mpanaw, melaun gupia getaw tuminakin diniin, miˈisel nilan si Isus. 43 Laak duuni sala tawan libun dia, sepuluˈ buˈ duaˈ taun na, tebiaˈ leduunen kig betad libun. Pia migelaˈen su selapiˈen di kepebulungen, ndaˈi mekeneguliˈ diniin. 44 Mendadi kig libun kini, mikpesempel dia teliudan ni Isus, diluˈen dayun su kuyamay suuben. Lemen laak mideluˈeni suub ni Isus, misikpaˈ dayun sug duguˈen. 45 Sinaak dayun ni Isus, “Taˈ taway duni mikpuleg dinaan?”
Mimalaw laak su kelaun getaw. Kaliˈ pektaluˈ si Pedro, “Sir, linibutan ka nu nga melaun getaw kini, miˈisela nilan!”
46 Dagid simbag ni Isus, “Duun laii mikpuleg dinaan, puˈ mibetikan ku duuni ginuungu gumiwaˈ dinaan.” 47 Naa sug libun kia, benaˈ misuunanen puˈ mitukawan iin, mikpesempel dayun dini Isus, miglaub dayun di gedapanen, mipatiˈ mengedeg. Pigukiten dayun di gedapan nu kelaun getaw su kedeluˈen dini Isus sampay su kauliˈayen midengan dun. 48 Kaliˈ pektaluˈ si Isus diniin, “Naa, Enaung, miuliˈan ka na, sabaˈ nu kesalig mu. Uliˈa na, gempia nai ginaa mu.”
49 Naa selian ni Isus mektaluˈ, duuni minateng sinuguˈ genat ditug balay ni Jairo, ki kaunutan di simbaan kiin. Benaˈ minateng dia ni Jairo, kaliˈ pektaluˈ, “Naa Sir, sug bataˈ mu kiin, ndaˈ mu na mesaguti ginaanen. Kaas ndiˈ na kambat salibaˈeni Mekpetuˈun kiin.”
50 Laak benaˈ midengeg ni Isus, kaliˈ pektaluˈ dini Jairo, “Naa, ndiˈa na melibuleng, saliga laak, dayun mauliˈan.”
51 Mendadi, benaˈ minateng si Isus tug balay ni Jairo, ndaˈen peseledayig lain getaw dumanen, subay si Pedro laak mukaˈ si Juan, si Santiago, dakus su mekegulang nu gembataˈ kia. 52 Naa sug launan getaw dia, mimengaduy ilan, penembiten nilan su gembataˈ. Dagid miktaluˈ si Isus, “Naa, ndiˈ amu dega pengaduy. Puˈ ki gembataˈ kiin, kanaˈ ma minatay. Pektulug da!”
53 Piketuanan laak nu nga getaw si Isus, puˈ misuunan nilan, minatay tantu su gembataˈ.
54 Mendadi, piguidan ni Isus su gembataˈ di kemeten. Sinabinen dayun, laungen, “Naa, Enaung, pegbuata!” 55 Mipuliˈ dayun su gimuuden. Suminambut dayun megbuat su gembataˈ. Sinuguˈ dayun ni Isus, paanen nilan. 56 Naa su mekegulang nu gembataˈ, mipatiˈ ilan mesebuˈay. Dagid inungub ilan ni Isus, pia laak daw sala tawan, ndaˈiduni pesuunan nilan di mipenggulaula kia.