Ki Gempia Petenday
Sinulat ni
JUAN
Piuna di Gempia Petenday Sinulat ni Juan
Mendadi, ki kepaat librunen dig Begu Pasad kini, iin su sinulat ni Juan. Si Juan kini, saˈ sungunen na metubus sulatayi sinulaten, sinulaten maˈniniˈ, “Melaun pai tuˈus pinggulaula ni Isus di gedapan nu nga sakupen, laak ndaˈ mesulat dig libru kini. Laak su gikteben kini, sinulat adun metuudan amu dun puˈ si Isus su Tinduˈ nu Megbebayaˈ Meglekaunutan, sug Bataˈ nu Megbebayaˈ. Puˈ saˈ metuudan amu dun, naa mpeduma amu tu ketubuˈ ndaˈi tamanen, meksekat tu pegbayaˈen.” (20.30-31) Kaas subay peksibaˈan penilungay nu nga getaw kig libru kini, puˈ gembagel gupiai pantagen.
Naa kini si Isus kini, adin getaw iin? Alandun demai gasalen? Saˈ penilungen nu getawig libru kini, iin dayuni sembagen. Bekna, si Isus, iin su Taluˈ nu Megbebayaˈ. (1.1-14) Keduaˈen, iin su Nati Karniru, guliden tu Megbebayaˈ. (1.29, 36) Ketelunen, iin su Tinduˈ nu Megbebayaˈ Meglekaunutan. (1.41) Kepaaten, iin sug Bataˈ nu Megbebayaˈ. (1.49) Kelimanen, iin su Gadiˈ nu nga getaw Israel. (1.49) Keˈenemen, iin su Meglegawen di tibaˈan getaw dig lumbang kini. (4.42) Kepitunen, iin su tinaluˈ nu sala tawan peneliganen, si Tomas, laungen, “Yaˈai Kaunutan ku, yaˈai Megbebayaˈ pektemuyen ku.” (20.28)
Mendadi ita nu nga getaw nemun, adun metuudan ita dun dadema, sinulat ni Juan dinii nga mekesalebuˈ pinggulaula ni Isus. Bekna si Isus, pibaluyen su tubig penginumen. (2.1-11) Keduaˈen, piuliˈanenig bataˈ nu kaunutan. (4.46-54) Ketelunen, piuliˈanen dademai getaw dia geksid bulenaw. (5.1-18) Kepaaten, pinaanen pa pagid sug lima ngibu tawan. (6.6-13) Kelimanen, mipanaw dig dibabaw tubig. (6.16-21) Keˈenemen, piuliˈanenig buta, mibuta sikna mbataˈen. (9.1-7) Katapusanen, pitubuˈen puliˈ si Lazaro. (11.1-45) Mukaˈ mibetang dadema dini, tigaˈwan, kini si Isus, mitubuˈ puliˈ genat minatay, mukaˈ pilentu ditu gekbus langit, ditu Keglekaunutanen.
Naa si Juan kini, su suminulat dun ini, adin getaw iin? Iini sala tawan di ngag bekna suminakup dini Isus. Dinig libru kini, piningalanen dun dig lawasen su sakup ni Isus petailenen.