24
Su Ketubuˈ Puliˈ ni Isus
1 Mendadi benaˈ daliˈ endaw di gendaw Duminggu, ki ngag libun kia, mipanaw ilan, mipuliˈ ilan ditu sangyab libengan dini Isus, iwit nilan su nga pagemut miandam nilan adun penguklaus sia ditug bangkay ni Isus. 2 Laak dagid benaˈ mesempel nailan dia sangyab, iini midetengan nilan, su gembagel batu tinakep tu sangyab, masiˈ linulid na. 3 Dayun ilan sumuut dia sangyab, dagid ndaˈ nilan mbaangay dia sug bangkay nu Kaunutan si Isus. 4 Mendadi, benaˈ pekelibuleng pa su ngag libun saˈ taˈ alandun saani mipenggulaula, tekaw dayun duunig duaˈ tawan suminaing dinilan pegindeg, meketinggasi penepetenen. 5 Ki ngag libun kini, mikegdungguˈ ilan, sabaˈ mipatiˈ ilan mendek. Dagid kaliˈ pektaluˈ dinilan kig duaˈ tawan kia, “Ki getaw tetubuˈ, mauma dema penengaun niu sia dinig lebengan di nga minatay? Kiin, ndaˈ na dini. Pitubuˈ na puliˈ. 6 Iini pegdelendem niu su tinaluˈen diniu kiin saanan niu ditu pa Galilea, 7 maaˈ laungen, ‘Naan kini kig Bataˈ nu Kilawan, subay pegwakilu di pegbayaˈ nu mikesalaˈ getaw, mukaˈ lensangenu di kurus. Dayun di ketelu endawen, metubuˈu puliˈ.’”
8 Iin pa midelendem tuˈu nu ngag libun su tinaluˈ kia ni Isus. 9 Mendadi saˈ maˈantu, mipuliˈ ilan dayun genat tu sangyab, pingukitan nilan su nga sepuluˈ buˈ sala tawan peneligan ni Isus dakus su kelaun duma nilan ditug launan mipenggulaula. 10 Naa su migukit dun tu nga peneligan ni Isus, ilan si Maria Magdalena mukaˈ si Juana, dakus si Maria ginaˈ ni Santiago, sampay nga samalibun nilan. 11 Laak benaˈ midengeg nu nga peneligan ni Isus, dig delendeman nilan, sagya laak gukiten, kaas ndaˈ ilan pekpetuud dun. 12 Laak dagid si Pedro, suminambut megbuat, gumibek dayun ditu sangyab. Benaˈ midepet dia, migdungguˈ mekselip diag dialem. Iin laaki minitaˈen su nga penepeten, su kamun pinutus ditug bangkay ni Isus. Minuliˈ dayun si Pedro, milibuleng gupia, saˈ taˈ alandun saani mipenggulaula.
Mikpaitaˈ si Isus dig Duaˈ Tawan Sakupen
13 Naa mendadi su gendaw kia, duunig duaˈ tawan sakup ni Isus pekpanaw dadema, pegangay ilan tu maikaˈ lunsud piningalan dun Emmaus, genat ilan tu Jerusalem, mabuˈ duuni sepuluˈ buˈ telu kilumitruig layuˈen. 14 Naa saanan nilan dig dalan, pegyegaan nilan su kelaun mipenggulaula kia. 15 Naa segay nilan megyagayaga mukaˈ meksinaakay, mitekaw metuaˈ dia nilan, si Isus na gupia. Tumindug dayun dinilan. 16 Laak dagid pia minitaˈ nilan iin, ndaˈ nilan mailala. 17 Sinaak ni Isus dinilan, “Taˈ alanduni pegyegaan niu kiin, sinegay niu mpanaw?”
Tuminlen ilan dayun, midemeng ilan gupia. 18 Dayun su sala tawan, ngalanen si Cleopas, kaliˈ sembag, “Taˈ itu, kig launan getaw dia Jerusalem nemun, sala mu da masiˈi ndaˈ mu mesuunay ki mipenggulaula dia kia nemun?”
19 “Taˈ mai mipenggulaula?” sinaak ni Isus.
Kaliˈ ilan sembag, “Su nga mipenggulaula ni Isus, getaw Nazaret. Puˈ pimuunan iin nu Megbebayaˈ, ginuungan tantu su kengukiten dakus su nga penggulaulaanen di pegitaˈen nu nga getaw sampay di pegitaˈen nu Megbebayaˈ. 20 Laak dagid tinipu nu nga kaunutan nug belian ta dakus nga meselagetaw, adun ukuman lagaˈ na ginaanen. Pilansang nilan dayun di kurus. 21 Asa yami, pedetengen nami sia, iin na tuˈu ki meglegawen dig bansa ta Israel! Mukaˈ padun, kini nai ketelu endawen genat di kepatayen. 22 Pidag pa tanan, duuni ngag libun di pikumpungan nami, misebuˈan ami dun gupia, puˈ kamun daliˈ endaw, milapus ilan mpanaw tu sangyab libengan dun. 23 Laak benaˈ minateng ilan dia, ndaˈ nilan pelum mbaangay sug bangkay ni Isus. Naa mipuliˈ ilan dayun, inukit nilan dinami, duuni mikpaitaˈ daw dinilani nga sesuguˈen nu Megbebayaˈ getaw langit. Tinaluˈ daw nu nga getaw langit, mitubuˈ na puliˈ daw si Isus. 24 Naa saˈ maˈantu, duunig duma nami minangay ditug libengan dun, dayun minitaˈ nilan, maaˈ da gupia nu tinaluˈ nu ngag libun. Laak dagid si Isus, ndaˈ nilan dema maitaˈ.”
25 “Ay, yamu pa di getaw,” laung ni Isus, “benguˈbenguˈen amu! Mauma dema melegen amu metuuday dun, su kelaun sinulat dengantu ditu Taluˈ nu Megbebayaˈ nu nga getaw pimuunanen? 26 Kanaˈ ba metuud, ki Tinduˈ nu Megbebayaˈ Meglekaunutan, su gasalen, mbiananeni kelaun lasayen kini, dayun gasalen dadema, megdedengeg na tantu?” 27 Dayun pigulug ni Isus dig duaˈ tawan kia su kelaun sinulat pedaan mekatag diniin ditu Taluˈ nu Megbebayaˈ. Pikpuunanen su nga sinulat ni Moises, dayun gilaˈen su sinulat nu kelaun duma getaw pimuunan nu Megbebayaˈ.
28 Naa maˈantu, misebang ilan diag lunsud gengayan nilan. Si Isus, maˈniin mundas pa, 29 laak ginuut nug duaˈ tawan kia ndiˈ pa mundas, laung nilan, “Naa, pektuluga na dia nami, puˈ lelabung na, sungu na meglegebii.” Paladpalad migdunut si Isus dinilan suled diag balay, mektulug dia sia. 30 Naa dekag dia nailan pengaanan, inimud ni Isus su pan. Dekag mikpaladpalad tu Megbebayaˈ, pimetanen su pan, tinulunen dayun dinilan. 31 Naa maˈniin mibuasan nai mata nilan, minilala nilan dayun si Isus. Luminilung dayun si Isus. 32 Mendadi, sug duaˈ tawan sakupen, kaliˈ ilan pegyagayaga, laung nilan, “Pia su diin paita dalan kamun, kanaˈ ba misingkuˈ tug langitig leliag ta, segayen megyaga dinita, su inubaden dinita kia su Misulat Taluˈ nu Megbebayaˈ?”
33 Maˈantu, migbuat dayun sug duaˈ tawan, mipuliˈ ilan ganam ditu Jerusalem. Midetengan nilan, mipungun na su sepuluˈ buˈ sala tawan peneligan ni Isus dakus su nga samasakup nilan. 34 Laung dayun nu nga mipungun kia, “Naa, metuud daan tuˈu, mitubuˈ su Kaunutan! Mikpaitaˈ ma na dini Simon!”
35 Dayun sug duaˈ tawan genat tug Emmaus, inukit nilan pa pagid ki mipenggulaula nilan kia diag dalan, sampay su kailala nilan dini Isus saananen mekpeta tu pan.
Mikpaitaˈ si Isus di ngag Duma Sakupen
36 Naa ndaˈ pa medeksuˈ nug duaˈ tawan su gukiten nilan, mitekaw metuaˈ si Isus, iin gupiai suminaing mindeg dinilan. Kaliˈ pektaluˈ, “Naa, gempiai ginaa niu.”
37 Laak maˈniin ilan igyang, mipatiˈ ilan mendek, puˈ laung nilan dun, maitaˈ nilani multu. 38 Dagid kaliˈ pektaluˈ si Isus, “Mauma dema melibuleng amu? Mauma dema duaˈduaˈi kesalig niu? 39 Tayay pa daani kemetu kini mukaˈ geksudu, naan tantu ini. Depenay niau, adun mesuunan niu. Puˈ su multu, ndaˈi guneden, ndaˈidun dademai tulanen, maˈniin dinaan minitaˈ niu kini.”
40 Dayunen paitaˈ dinilan su geksuden dakus kemeten. 41 Melegen nilan metuuday, sabaˈ leliag nilan. Saanan nilan mesebuˈan dun, sinaak ni Isus, “Duuni gaan niu dini?” 42 Tinulun nilan dayun diniini sedaˈ, tinitiˈ. 43 Dayun tuˈu aanay ni Isus di pegitaˈen nilan.
Ki Tituluˈan Pingumbilin ni Isus tu nga Sakupen
44 Mendadi, kaliˈ pektaluˈ si Isus tu nga sakupen, “Naa, kini na tuˈu su tinaluˈu pedaan diniu sug diin, su duminuma pau diniu. Ki misulat mekatag dinaan ditu Taluˈ nu Megbebayaˈ, tinaluˈu daan diniu puˈ subay megelaˈ menuud, genat tu Palinta misulat ni Moises mukaˈ su nga pimuunan nu Megbebayaˈ dengantu, sampay su ngag Bebat.”a
45 Naa saˈ maˈantu, biwasan ni Isus sug delendeman nu nga sakupen kia, adun mesabut na nilan su Misulat Taluˈ kia nu Megbebayaˈ. 46 Kaliˈ pektaluˈ dinilan, “Iini misulat, ki Tinduˈ nu Megbebayaˈ Meglekaunutan, subay mayan dig lasay, dayun di ketelu endawen, metubuˈ puliˈ. 47 Mukaˈ misulat dadema, subay pegukit pebian di pegbayaˈu ki keksikesuun nu getaw adun pedesunen su salaˈen. Pekpuunan pegukitay dini Jerusalem, dayun ditu kelaun bansa nu getaw. 48 Mendadi, yamu nai menakesiˈ di kelaun mipenggulaula kini. 49 Naa taluˈu diniu, pelusaden ku pa tuˈu dini niu kig Balakat nu Megbebayaˈ, ki pinasad ni Amaˈu. Laak pegunung pamu dini syudad, sampay da dun di gendaw lumusad iin genat tu gekbus langit, dayun begayan amu niin ginuung.”
Pilentu si Isus ditu Gekbus Langit
(Marcos 16.19-20; Ki nga Pinggulaula 1.9-11)
50 Naa inagak ni Isus su nga sakupen tug liu nu syudad, gikteb tug lunsud Betania. Benaˈ minateng ilan dia, tinggal ni Isus kig baingkenen, pinenebianeni nga sakupen kia. 51 Mendadi, selianen menenabi dinilan, sumiway dayun dinilan, pilentu ditu gekbus langit si Isus. 52 Naa su nga sakupen, linuˈudan nilan si Isus, dayun ilan puliˈ tu Jerusalem, mipatiˈ ilan penleliagay. 53 Genat itu, tatap ilan meditug Balay Pengedapan tu Megbebayaˈ, pegenalan nilan dia su Megbebayaˈ.