Ki nga
PINGGULAULA
nu nga Peneligan ni Isukristu
Piuna di nga Pinggulaula nu nga Peneligan ni Isukristu
Mendadi kig libru kini, sumpat ditu sala libru mibetang dinig Begu Pasad kini, Ki Gempia Petenday Sinulat ni Lucas. Kig duaˈ buuk libru kini, suminulat dun si Lucas, piwitanen duni metaas getaw, si Teofilo.
Iini miukit dini Nga Pinggulaula kini, su nga mibianan nu nga peneligan ni Isus sampay su ginukit nilan, dekag na pitubuˈ puliˈ si Isus mukaˈ pilentu iin ditu gekbus langit. Iinig baalen nu nga peneliganen kia, migukit ilan di Gempia Petenday mekatag dini Isus, adun sumalig diniin su nga getaw. Su kepalus ni Isus muliˈ ditu gekbus langit, migukit di Gempia Petenday su nga peneliganen dia da laak Jerusalem sampay diag lumibut benwa. Laak saˈ minibeniben, sinigwag nilan su Gempia Petenday tu tibuuk prubinsya Judea sampay tu nga melayuˈ benwa. Tigaˈwan, sinigwag nu nga peneligan ni Isus su Gempia Petenday tu tibuuk lumbang.
Mukaˈ pagid miukit dinig libru kini ki kengapuˈ nug Balakat nu Megbebayaˈ di nga peneligan ni Isus. Benaˈ mingapuˈ dinilan kig Balakat nu Megbebayaˈ kia, iin nai migabang dinilan adun menibeluˈ ilan megukit mukaˈ ginuungan ilan menggulaula nga mekesalebuˈ.
Naa iinig bekna inukitan nu Gempia Petenday, ki nga getaw Judea. Mendadi duuni getaw, ngalanen si Pablo, tinduˈ nu Megbebayaˈ peneligan ni Kristu adun pengukitanen di Gempia Petenday ki ngag lain bansa nu getaw, saˈitada su nga kanaˈ getaw Judea. Melaun sinulat ni Pablo mipungan dinig Begu Pasad kini. Iini pigwali ni Pablo di nga sulaten, gempantek puˈ ki kepatay ni Isus, gantiˈ di kepatay nu kelaun getaw dinig dibabaw lumbang, pia taˈ bensaay dun, kanaˈ nu nga getaw Judea da laak.
Si Lucas, su suminulat dig libru kini, taang dun duma ni Pablo saananen mpanaw tu nga melayuˈ benwa adun megukit di Gempia Petenday. Kaas taang dun, saˈitada dia Kapitulu 16 buˈ 20 mukaˈ 27, gemiten ni Lucas su penggelal “ami,” tuˈus dun puˈ minitaˈ gupia ni Lucas atawaka mibiananen su pengukitenen.
Piuna