2
Sug Belaˈi tu Cana
1 Naa genat itu di ketelu endawen, duunig belaˈi tug lunsud Cana sakup Galilea. Suminaup tug belaˈi su ginaˈ ni Isus, 2 pisebutan dadema si Isus kampuˈ nu nga sakupen. 3 Mendadi benaˈ migelaˈ nai penginumen, laung nu ginaˈ ni Isus diniin, “Ki penginumen nilan, migelaˈ na daw.”
4 “Baa,” simbag ni Isus, “ndiˈ mau pegbiaˈay. Ndaˈ pa dateng su gendawu.”
5 Kaliˈ dayun pektaluˈ su ginaˈ ni Isus di nga megilak, “Adin su teluˈenen diniu, petuud niu.”
6 Naa su nga getaw Judea, duuni ngag betad nilan mekatag di kengugas adun mawaˈ su kelemuˈay nilan. Kaas duuni genem buuk gunsuˈ dia bitangan tubig pengugas, kada salabuuk gunsuˈ, melepisanen saani paat buuk taru sabaˈ kebagelen. 7 Mendadi kini si Isus, miktaluˈ di nga megilak, “Pepenuˈ niu tubig ki nga gunsuˈ kini.” Bitangan nilan dayun tubig, pilepeng nilan tug babaˈen. 8 Laung dayun ni Isus, “Naa, saguk amu dun, uit niu dia meguit dig belaˈi.” Iwitan nilan dun dayun iin. 9 Ininaman dayun nu meguit dig belaˈi ki tubig kini binaluy na penginumen. Sinabinen dayun su menginsawa, puˈ ndaˈen suunay ki pigenatan nu penginumen kini (asa misuunan nu nga megilak kia, su miksaguk dun). 10 Laung nu meguit tug belaˈi dia menginsawa, “Saˈ su kelaun duma getaw, unaanen peksuday su mekepia penginumen. Benaˈ melaun nai miˈinum nu nga suminaup, peksudenen dayun pelum su sinukalay. Dagid yaˈa, masiˈ sinawad mu ki mekepia penginumen kini, iin mu pa peksuday!”
11 Kiniig bekna mekesalebuˈ tuˈus pinggulaula ni Isus. Pinggulaulanen dia Cana sakup Galilea. Maˈnia, pinitaˈen di nga getaw ki kelengas nu pegbayaˈen, kaas mikpetuud dayun diniin su nga sakupen.
12 Naa mendadi, tumigbeng dayun si Isus tu Capernaum, ilan nu ginaˈen, su nga pateden mukaˈ nga sakupen. Migbebenwa ilan dayun dia nga santaˈ gebii.
Pingutidan ni Isus su Mendagang Guliden tu Pengedapan tu Megbebayaˈ
13 Naa saˈ sungu mektelipuun sug Lumpuk nu nga getaw Judea gindan ditug Liniusan, miditu si Isus syudad Jerusalem. 14 Benaˈ midepet tug Balay Pengedapan tu Megbebayaˈ, mitaanganen ki nga mendagang guliden, su nga meksesaluy baka, karniru mukaˈ malepati. Minitaˈen dadema ki nga membeles selapiˈ, dia ilan pegingkud lemisaan nilan. 15 Mendadi kini si Isus, minimud tali, binaalen dayun badas, pingutidanen ilan dayun dia Pengedapan, pimugawen dadema dia ki ngag baka mukaˈ karniru. Binunagen pa pagid su selapiˈ nu nga memeles selapiˈ, mukaˈ pimbelikwangen su ngag lemisaan nilan. 16 Miktaluˈ si Isus tu nga mendagang malepati, “Awaˈ niu dini! Ndiˈ niu baalay tebuˈan kig Balay kini Pengedapan tu Gamaˈu!” 17 Milabuˈ dayun dig delendeman nu nga sakupen su sinulat dengantu ditu Misulat Taluˈ nu Megbebayaˈ, laung, “Mibagai gangitu, uu Megbebayaˈ, miksekat di kepetailu tu Pengedapan diniˈa.”
18 Mendadi duuni nga kaunutan nu getaw Judea suminaak dini Isus, “Duun bai mekesalebuˈ paitaˈ mu dinami, tuˈus di pegbayaˈ mu menggulaula dun kia?”
19 Kaliˈ sembag si Isus, “Naa kig Balay kini Pengedapan tu Megbebayaˈ, gebaˈ niu. Dayun gikteb telu endaw, baalen ku puliˈ.”
20 “Apelii lai!” laung nilan. “Paat puluˈ buˈ enem taun pegbaalayi Pengedapan kini. Dayun baalen mu puliˈ gikteb telu endaw?”
21 Laak dagid kig balay kia tinaluˈ ni Isus, piuluganen dunig lawasen. 22 Mendadi benaˈ midayag na su kelengas nu pegbayaˈ ni Isus, milabuˈ dayun dig delendeman nu nga sakupen su tinaluˈen kia.a Mituudan ilan dayun ditu sinulat dengantu ditu Misulat Taluˈ nu Megbebayaˈ mekatag diniin, sampay tu tinaluˈ kia ni Isus.
Misuunan ni Isus sug Delendemen nu Tibaˈan Getaw
23 Naa selian ni Isus dia Jerusalem mitaang dig Lumpuk nug Liniusan, melaun getaw mikpetuud diniin saˈ minitaˈ nilan su nga mekesalebuˈ tuˈus pinggulaulanen. 24 Laak ndaˈ pesalig dinilan si Isus, puˈ sinuunanenig betad nilan, tibaˈan nilan. 25 Ndiˈ kambat pesuunan dun, puˈ migelaˈen mesuunay sug dialem delendeman nu getaw.