19
Suminakup dini Isus si Saqueo
1 Naa midepet si nga Isus tug lunsud Jerico. Benaˈ minian ilan dia, mitaanganen 2 duuni getaw dia, ngalanen si Saqueo, kaunutan nu nga mendawat buis, kaas medatuˈ getaw. 3 Mauyaˈan ni Saqueo maitaˈen si Isus, laak ndiˈ mesuˈat sabaˈ kelaun getaw, puˈ gembabaˈ getaw si Saqueo kini. 4 Paladpalad kaliˈ pegleketau, gumibek tu gunaan ni nga Isus, minaik dayun di gayu sikomoro adun maitaˈen si Isus, puˈ mekebian dia. 5 Mendadi, benaˈ mitandaˈ si Isus di gayu kia, migangag dini Saqueo, kaliˈ pektaluˈ diniin, “Naa Saqueo, dedaliˈa penaug, puˈ subay mapitu mektulug tug balay mu nandaw.”
6 Naa saˈ maˈantu, migdedaliˈ menaug si Saqueo, didialanen gupia si Isus tug balayen. 7 Laak benaˈ minitaˈ nu nga getaw, linibak nilan dayun si Isus, laung nilan, “Paa, mauma iin, minapit mektulug dig balay nu mekesesalaˈ getaw?”
8 Dagid si Saqueo, migindeg, kaliˈ pektaluˈ tu Kaunutan, “Mendadi Sir, su seginengaˈ pimetangu, begayu na tu gempusuk getaw. Mukaˈ adin sug linimbungan ku, uliˈen ku dema tuˈu diniini paat piluˈ.”
9 Kaliˈ sembag si Isus, “Aa naa, saˈ maˈniin, minateng na tuˈu nandaw dinig balay kini ki kegawen nu Megbebayaˈ, kagina ki getaw kini, sapuˈ dadema ni Abraham. 10 Puˈ naan kini, kig Bataˈ nu Kilawan, iini luminusadu dun, puˈ adun penengaun ku ki nga getaw mibeleng, adun guunen ku.”
Su Sambingay mekatag di Selapiˈ Bulawan
11 Naa selian pekineegan nu nga getaw su pekteluˈenen, duuni sinumpat dun ni Isus sambingay. Puˈ kagina sungu na mateng tu Jerusalem si Isus, laung dun nu nga getaw, kia na tuˈu su kesebang nu Keglekaunutan nu Megbebayaˈ. 12 Kaas miksambingay si Isus, laungen, “Duuni metaas getaw mipanaw di melayuˈ, puˈ adun iini metenduˈ gadiˈ diag benwanen, dayun muliˈ. 13 Mendadi, selian ndaˈ pa panawi metaas getaw kini, pinsabineni sepuluˈ tawan sesuguˈenen. Benaˈ misabinen ilan, duuni pigwakilen dinilan kwarta bulawan, pikselaad dinilan, kaliˈ pektaluˈ dinilan, ‘Kini, penelapiˈ niu, sampay matengu puliˈ.’ 14 Laak dagid su nga samasakupen tug benwa kia, mesengay nilani metaas getaw kini. Kaas saˈ mipanaw iin, duuni sinuguˈ nilan meglendug diniin, mangay dadema ditug benwa pegengayanen, pimuunan nilan maˈniniˈ. ‘Mpauk ami saˈ meglegadiˈ dinamii getaw kia.’
15 “Laak dagid ki kaunutan kini, mialapen gusayi pegbayaˈen meglegadiˈ tug benwa kia. Mendadi benaˈ minuliˈ, pinsabinen dayun su nga sesuguˈenen, su pigwekilanen kiin nu kwarta, adun mesuunanen su gikteb nu tubuˈen saˈ pinelapiˈ nilan. 16 Benaˈ misabinen ilan, minadap diniin sug bekna, kaliˈ pektaluˈ, ‘Naa Sir, kig bigay mu dinaan kia selaad bulawan, midugangan pa sepuluˈ laad.’
17 “‘Aa naa, melengas!’ laung nu gegalenen. ‘Gempiaa sesuguˈen! Naa, kagina meseligan ka di maikaˈ, pebayaˈu diniˈa sepuluˈ lunsudan.’”
18 Laung ni Isus, “Mendadi, suminukli madap tu kaunutan su keduaˈ tawanen, kaliˈ pektaluˈ, ‘Sir, kig bigay mu dinaan dema, midugangan na lima laad.’
19 “Laung nu kaunutan, ‘Naa yaˈa, megbayaˈa dadema dig lima lunsudan.’
20 “Laak dagid ki sala tawan pelum, benaˈ minadap tu gegalen, kaliˈ pektaluˈ, ‘Sir, kini da gusayig bulawan mu, pinutusu di panwilu, dayun ku teguˈay. 21 Puˈ mindeku diniˈa, sabaˈ metegasig betad mu. Elapen mu su kanaˈ daniˈa, geniin mu su ndaˈ mu dadema pemulanay.’
22 “‘Paa,’ simbag nu kaunutan, ‘melaata sesuguˈen! Ukuman ku yaˈa pebian di milabuˈ taluˈ mu kia! Misuunan mu ba metegasig betadu, elapen ku su kanaˈ dinaan, dakus geniin ku su ndaˈu pemulanay? 23 Naa saˈ maˈantu, ki kwartau kiin, mauma pelum ndaˈ mu betangay dig bangkuˈ, adun medawatu sia puliˈ saˈ mekauliˈu, kampuˈ nu tubuˈen?’ 24 Liningay dayun nu kaunutan su nga getaw pegindeg dia, laungen dinilan, ‘Awiˈ niu diniin ki selaad bulawan kiin, begay niu di sala tawan kiin sepuluˈig daniin.’ 25 ‘Laak Sir,’ laung nilan, ‘duun naig daniin, sepuluˈ laad!’ 26 Kaliˈ sembag su kaunutan, ‘Taluˈu tuˈu diniu, adin su getaw duunig daniin, begayan pa padun.a Adin pelumi getaw ndaˈidunig daniin, laak uiˈen diniin su maikaˈ sia daniin. 27 Laak dagid ki nga kuntrau kiin mpauk mesakup di peglegediˈan ku, naa angay niu, bunuˈ niu dayun dini gedapan ku!’”
Pigbesaan si Isus tu Kedatengen tu Syudad Jerusalem
28 Naa benaˈ mideksuˈ si Isus meksambingay, minundas ilan mpanaw, tumiwad nailan tu Jerusalem, miuna si Isus di piktendugan nilan. 29 Mendadi benaˈ misebang ilan dig duaˈ maikaˈ lunsud paingalan dun Betpahe mukaˈ Betania, dia guksad nug Bentud nu nga Gayu Olibo, suminuguˈ si Isus dig duaˈ tawan sakupen. 30 Laungen dinilan, “Bundas amu dig lunsud kia di gunaan. Mendadi saˈ mateng amu ditu, duun dayuni maitaˈ niu petubuˈen nati asno iniketan, ndaˈ mainsan sekayay getaw. Naa kiin, ubaday niu, agak niu dayun dini naan. 31 Naa saˈ duuni sumaak diniu mauma ubadan niu, iini taluˈ niu diniin, ‘Duunig baalan dun nu Kaunutan.’”
32 Naa sa maˈantu, mipanaw sug duaˈ tawan sakupen. Benaˈ midepet ilan tug lunsud kia, mitaangan nilan tuˈu ki maaˈ dadema nu tinaluˈ ni Isus dinilan. 33 Inubadan nilan dayun su nati asno. Benaˈ pegubadan nilan, suminaak tuˈu dinilan su nga gapuˈen, “Uy, mauma dema ubadan ma niui nati kiin?”
34 Laung nu nga sakup ni Isus, “Duunig baalan dun nu Kaunutan.” 35 Mendadi, inagak nilan ditu ni Isus su nati asno. Benaˈ minateng ilan dia ni Isus, inigan nilan suub nilan sug lekud nug asno, pisakay nilan dun dayun si Isus. 36 Naa benaˈ minundas si Isus, peksakay na, mimelat su nga getaw suub nilan dia karsada mbianan ni Isus, basa nilan diniin.
37 Naa, mesempel na tuˈu si Isus di Jerusalem, mitandaˈ na dig dalan pegdiksun diag Bentud nga Gayu Olibo. Mendadi ki kelaun sakupen kia mitendug diniin, pinleliag ilan patiˈ, minekeg ilan pa pagid megenal tu Megbebayaˈ, sabaˈ nu nga mekesalebuˈ pinggulaula ni Isus minitaˈ nilan. 38 Laung nilan, “Melengas pepianan nu Megbebayaˈ ki Gadiˈ ta kini minateng na pigwekilan nu Kaunutan Megbebayaˈ! Melinaw na dema ditu gekbus langit! Pegbesaan su Megbebayaˈ!”
39 Laak dagid duun dademai nga Pariseo dia piktendugan nilan. “Sir,” laung nilan, “melengas pemaagen mui nga sakup mu kiin!”
40 Kaliˈ sembag si Isus, “Taluˈu tuˈu diniu, saˈ mekeneng ilan nandaw, pia ki ngag batu kia, sumukli menekeg megdedial dinaan!”
Pingeduyan ni Isus su Getaw Jerusalem
41 Naa misebang na tuˈu tu Jerusalem si Isus. Mendadi benaˈ midayagen sug lunsud, mikengaduy si Isus. 42 Kaliˈ penembit, “Ay, yaˈa Jerusalem, saˈ sia minilala mu dema tuˈu nandaw kig bian nu keseksud mu tu Megbebayaˈ! Laak mitebunan nandawi mata mu. 43 Kaas mateng pai gendaw, medending ka nu nga kuntra mu, pektebuˈan ka nilan, pegbeletan ka padun. 44 Gebaˈen nilan dayun tananig lunsud mu, bataˈ megulangi mpeduma dun. Deksuˈanen, su ngag batu binaal balay mu, ndaˈidun nai metentud dun dig dumanen. Naa lumbus itu mpenggulaula, sabaˈ ndaˈ mu mailala ki gendaw linaawan ka nu Megbebayaˈ!”
Pingutidan ni Isus su Mendagang Guliden tu Pengedapan tu Megbebayaˈ
45 Naa minangay si Isus tu Pengedapan tu Megbebayaˈ. Mendadi benaˈ minateng dia, ki nga mendagang guliden dia, pingutidanen. 46 Miktaluˈ si Isus dinilan, “Misulat ditu Taluˈ nu Megbebayaˈ, ‘Ki Pengedapan dinaan, balay penenebian.’ Dagid yamu kiin, binaal niu pegegludan ngag limbungan getaw ki Pengedapan kini!”
47 Naa genat itu, gendawgendaw mekpetuˈun si Isus dia Pengedapan tu Megbebayaˈ. Dagid su nga kaunutan nug belian nu getaw Judea mukaˈ su nga mekpetuˈun di Misulat Palinta nu Megbebayaˈ sampay su ngag duma metaas getaw, minengaw ilan panaw nilan mekpatay dini Isus. 48 Laak ndiˈ nilan mesuˈat, puˈ sug launan getaw, pekineegan nilan gupia si Isus, mpauk ilan saˈ duuni sektaang taluˈen ndiˈ nilan medengeg.