25
Su Sambingay mekatag di Sepuluˈ Tawan Delaga
1 Kaliˈ gusay pektaluˈ si Isus, “Mendadi ki gendaw kiin saˈ meglekaunutan na tuˈu su Megbebayaˈ, maˈniniˈig bianen. Penenggiˈan dunig belaˈi. Naa duuni sepuluˈ tawan delaga minalap suluˈ nilan, puˈ minangay ilan sumungkak tu menginsawa. 2 Naa lima tawan di ngag delaga kia, telisebuten ilan. Kig lima tawan pelum kia, benguˈbenguˈen ilan. 3 Mendadi benaˈ mipanaw ilan, kig lima tawan kia benguˈbenguˈen, ndaˈidunig lana giwit nilan pengandam nilan sia di nga suluˈ nilan kia. 4 Dagid kig lima tawan kia telisebuten, miguit ilan betangan mipenuˈ lana. 5 Naa benaˈ dia nailan tandaˈ sungkakan nilan dun, sabaˈ milangan su menginsawa, tulugeni ngag delaga kini, mukaˈ miktulug ilan tuˈu.
6 “Mendadi benaˈ tengaˈ gebii na,” maaˈ laung padun ni Isus, “duuni miktawag, ‘Uy, kia na su menginsawa! Sungkak na niu ganam!’ 7 Migelaˈ dayun metanudi ngag delaga kini, tinutudan nilan dayuni nga suluˈ nilan. 8 Laung ni ngag benguˈbenguˈen delaga kia dia nga telisebuten, ‘Naa, bataˈ begayay niu ami dig lana niu kiin, puˈ pekpaleng nai suluˈ nami kini.’ 9 ‘Baa,’ simbag ni nga telisebuten delaga kia, ‘mbuus ndiˈ metukid dinita, launan ta. Melengas angay amu ditu mendagang lana, saluy amu ditu.’ 10 Minangay dayun sumaluy lana su ngag benguˈbenguˈen delaga. Laak ndaˈ ilan tagad dateng puliˈ, minateng na tuˈu ki menginsawa. Lemen laak minateng dia, sumiled dayun dia pemeliˈian su menginsawa, kampuˈ su ngag lima tawan delaga kia, ki mikandam na kia. Tinakep dayun sug bisuangan.
11 “Naa saˈ maˈantu, sug lima tawan pelum, ndaˈ maiben, minateng dailan dema. Kaliˈ ilan peksabi, ‘Uu Sir, kelelaat pukaˈay mu ami!’ 12 Dagid sumimbag su menginsawa, ‘Baa, yamu kiin, ndiˈu amu mailala.’”
13 Mendadi diksuˈ ni Isus su taluˈen, “Saˈ maˈantu, yamu dema, pegenduk amu lelayun, puˈ ndaˈ niu mesuunay su gendaw sampay su gurasen.
Su Sambingay mekatag di Telu Tawan Sesuguˈen
14 “Naa mendadi,” laung ni Isus, “ki gendaw kiin saˈ meglekaunutan na tuˈu su Megbebayaˈ, sala pa penenggiˈan dun ki getaw mipanaw di melayuˈ. Mendadi, selian ndaˈ pa panawi getaw kini, pinsabineni nga sesuguˈenen, pisaligen dayun dinilan su gimunen. 15 Diadia pigwekilanen kwarta, pilepengen tu tinawan nu piseliganen kia. Su sala tawan, pigwekilanen lima ngibu. Su sala tawan pelum, duaˈ ngibu. Dayun su sala pelum, sengibu da laak. Naa benaˈ migelaˈen pesalig dia nga sesuguˈenen su gimunen, mipanaw dayuni gegalen nilan kia.
16 “Naa benaˈ mipalus su gegalen nilan kia,” maaˈ laung ni Isus, “naa ki sesuguˈen kia pigwekilan lima ngibu, mipanaw dayun, pinelapiˈen su kwarta pigwakil diniin. Midugangan dayun lima ngibu pa pelum, su tubuˈen. 17 Naa ki sesuguˈen kia pigwekilan duaˈ ngibu, maˈantu dadema, kaas sug daniin, mitubuˈ dadema, duaˈ ngibu. 18 Dagid ki pigwekilan laak sengibu kini, minangay megengkul diag lupaˈ, dayunen laak lebengay diag dialem lupaˈ ki pigwakil diniin nu gegalenen.
19 “Naa benaˈ miniben, ki gegalen nu nga sesuguˈen kia, minuliˈ na pelum, piningilanen ilan dayun. 20 Benaˈ miningil, minadap diniin su sesuguˈen kia su pigwekilanen lima ngibu, dayunen tulunay dia gegalenen lima ngibu, kampuˈ nu tubuˈen. Kaliˈ pektaluˈ, ‘Naa Sir, lima ngibui pigwakil mu dinaan, kini pa pagidig lima ngibu, tubuˈen.’ 21 ‘Aa naa, melengas!’ laung nu gegalenen. ‘Gempiaa sesuguˈen, meseligan ka! Naa kagina meseligan ka megbayaˈ di maikaˈ, pebayaˈu diniˈa melaun. Naa, seleda pa dinig dialem, pedumanan ku yaˈa dig leliagu!’”
22 Laung pa ni Isus, “Mendadi, suminukli madap tu gegalen su sesuguˈen kia pigwekilan duaˈ ngibu, kaliˈ pektaluˈ, ‘Sir, naan dadema, duaˈ ngibui pibayaˈ mu dinaan. Naa, kini paig duaˈ ngibu pagid, tubuˈen.’ 23 ‘Aa naa, melengas!’ laung nu gegalenen. ‘Gempiaa sesuguˈen, meseligan ka! Naa, kagina meseligan ka megbayaˈ di maikaˈ, pebayaˈu diniˈa melaun. Naa, seleda pa dinig dialem, pedumanan ku yaˈa dig leliagu!’
24 “Laak dagid benaˈ minadap tu gegalen ki pigwekilan kia laak sengibu, kaliˈ pektaluˈ, ‘Sir, misuunan ku puˈ metegasig betad mu, geniin mu su ndaˈ mu pemulanay, penteguˈen mu pa pagid dig lulu mu su ndaˈ mu dadema peliday. 25 Kagina maˈantu, mindeku, kaas ki kwarta mu kia, gigludu diag dialem lupaˈ. Naa, kini da gusay su kwarta mu.’ 26 ‘Paa,’ simbag nu gegalenen, ‘melaata sesuguˈen, melelaˈa pa pagid! Misuunan mu ba puˈ geniin ku su ndaˈu pemulanay, dakus penteguˈen ku su ndaˈu dadema peliday? 27 Naa saˈ maˈantu, ki kwartau kiin, mauma pelum ndaˈ mu betangay dig bangkuˈ, adun medawatu sia puliˈ saˈ mekauliˈu, kampuˈ nu tubuˈen? 28 Naa, awiˈ niu diniin ki sengibu kiin, begay niu di sala tawan kiin sepuluˈ ngibuig daniin. 29 Puˈ adin su getaw duunig daniin, begayan pa padun, sampay melaunig daniin.a Adin pelumi getaw ndaˈidunig daniin, laak uiˈen diniin su maikaˈ sia daniin. 30 Mendadi ki getaw kini ndiˈ metau suguˈen, piglak niu tug liu, ditu medelem. Ditu dayun mengaduy, lamug mengkiget di ngisinen.’”
Su Tampusan Ginukuman nu Megbebayaˈ di Tibaˈan Getaw
31 Kaliˈ gusay pektaluˈ si Isus, “Mendadi naan, kig Bataˈ nu Kilawan, metuaˈu tuˈu puliˈ, medayag na su kelengas nu pegbayaˈu, dumau sug lumaun sesuguˈen nu Megbebayaˈ getaw langit. Dayun saˈ metuaˈu, mingkud nau tuˈu meglegadiˈ. 32 Dayun saˈ mekaingkudu, ki kelaun bansa nu kilawan, pungunen na ditu gedapan ku. Dayun ku ilan pekpainay duaˈ penunan, maaˈ nug betad nu megingat karniru, pekpainenen su nga karniru mukaˈ kanding. 33 Ki nga mekesuun getaw, painen ku di dapit lintuu. Ki nga melimbung getaw dema, dig bibangu. 34 Mendadi naan, ki Gadiˈ, teluˈan ku dayun ki nga getaw kia diag lintuu, ‘Naa ma, dini namu, yamu nga pipianan nu Gamaˈu! Dini amu, puˈ petenged na tuˈu diniu su Keglekaunutan nu Megbebayaˈ, ki pitenged na daan diniu, su ndaˈ pa mbaali gekleb langit buˈ lupaˈ. 35 Puˈ saˈ migutemu, bigayan ma niau gaan. Saˈ kiwawu, piˈinum ma niau. Saˈ genatu di melayuˈ, pinembaˈ ma niau. 36 Saˈ kulangi penepeten ku, bigayan niau penepeten ku. Saˈ migladuu, tinagikul niau. Saˈ mipirisuu, bintaw ma niau.’ 37 Dayun sumbag su nga mekesuun getaw kia, ‘Aba, Kaunutan, ndaˈa nami mainsan paˈaanay saˈ migutema, dakus ndaˈa nami dadema painumay saˈ kiwawa! 38 Ndaˈa nami dadema mainsan penembaˈay saˈ genata di melayuˈ, dakus ndaˈa nami mainsan begayay penepeten mu saˈ kulangi penepeten mu! 39 Mukaˈ ndaˈa nami mainsan bentaway, saˈ mibianan mui migladua atawaka mipirisua!’ 40 Naa saˈ maˈantu,” maaˈ laung padun ni Isus, “naan kini, ki Gadiˈ, sembagen ku ilan, ‘Taman taluˈu diniu, adin su tampusan gembabaˈ mimated dinaan kini gibangan niu, naa kanaˈ laak iini gibangan niu, puˈ naan, gibangan niau dadema!’
41 “Mendadi,” maaˈ laung padun ni Isus, “ki nga getaw dia dapit bibangu, teluˈen ku pelum dinilan, ‘Naa pelayuˈ amu dinaan, yamu nu nga inukum nu Megbebayaˈ! Dituun amu angay linaw gapuy ndiˈ na mpaleng, ki miandam ditu Palin mukaˈ tu nga sesuguˈenen getaw langit! 42 Puˈ saˈ migutemu, ndaˈ ma niau paˈaanay. Saˈ kiwawu, ndaˈ ma niau painumay. 43 Saˈ genatu di melayuˈ, ndaˈ ma niau penembaˈay. Saˈ kulangi penepeten ku, ndaˈ niau begayay. Saˈ migladuu dakus mipirisuu, ndaˈ ma niau bentaway.’ 44 Dayun sumbag su nga getaw diag bibangu, ‘Aba, uu Kaunutan, ndaˈa ma nami mainsan maitaˈ mibianan mu migutema, saˈ kiwawa, saˈ genata di melayuˈ, saˈ kulangi penepeten mu, saˈ migladua atawaka mipirisua, dayun ndaiˈ gabang nami diniˈa!’ 45 Mendadi, sembagen ku ilan dayun, ‘Taman taluˈu diniu, adin su tampusan gembabaˈ sakupu kini ndaˈ niu pegebangay, naa kanaˈ laak iini ndaˈ niu pegebangay, pia naan, ndaˈ dadema niau pegebangay.’ 46 Mendadi, ki nga getaw dig bibangu, pebundasen ilan dayun tu ginukuman ndaˈi tamanen. Ki nga mekesuun getaw pelum, ditu ilan dayun pebundasay ketubuˈ ndaˈi tamanen.”