24
Pisuun Pedaan ni Isus su Kegebaˈ tug Balay
Pengedapan tu Megbebayaˈ
1 Naa migawaˈ si Isus tu Pengedapan tu Megbebayaˈ. Mendadi, saananen megawaˈ dia, mikpesempel diniin su nga sakupen, tinduˈ nilan diniin ki nga mekelengas ginumbelayan misakup tu Pengedapan kia. 2 Sumimbag si Isus dinilan, “Waˈa daan, maitaˈ niu nandawig launanen kini. Dagid taman taluˈu diniu, duuni gendaw mateng, pia salabuuk batu di kitentudanen, ndaˈiduni mesamaˈ dun, megelaˈ gupia penggebaˈay.”
Su Kelegenay mukaˈ Kekpeleget sungu Mbianay nu Kilawan
3 Naa pegingkud si Isus tug dibabaw Bentud nu nga Gayu Olibo. Mendadi minadap diniin su nga sakupen, ilanilan da, suminaak nilan diniin, “Naa saˈ mesuˈat, Sir, pesuun mu dinami, nanu ma mpenggulaula kig launanen kia? Mukaˈ alanduni tuˈusan dun saˈ sungua lumusad puliˈ, mukaˈ saˈ sungu melengkebig benwa?”
4 Sumimbag si Isus, “Naa, peglengilam amu, adun ndiˈ amu melimbungan nu getaw. 5 Puˈ melaun metuaˈ, engkenen nilani gelalu, laung nilan, ‘Naani Tinduˈ nu Megbebayaˈ Meglekaunutan.’ Benaˈ melaun getaw melimbungan nilan. 6 Mukaˈ pa pagid, duuni medengeg niu pegbunuˈ dia mesempel sampay tu melayuˈ, laak ndiˈ amu melibuleng dun. Puˈ subay mpenggulaula itu, laak kanaˈ paini kelengkeb nug benwa. 7 Puˈ su sala nasud, lumumpak daan dig lain nasud. Su sala peglegediˈan, lumumpak dig lain peglegediˈan. Mukaˈ mian pa pagidi meliget gutem, dakus duuni ngag linug di tibuuk benwa. 8 Dagid kig launan gempenggulaula kia, maˈniin laak penenggiˈan saˈ mekpuun pa megbatik tian sug libun.
9 “Mukaˈ duun diniui daapen mukaˈ pegwakil di nga getaw adun peglegetan amu mukaˈ petain amu. Bentaan amu nu kelaun getaw sabaˈ nu kesakup niu dinaan. 10 Naa saˈ maˈniai mpenggulaula, melaun sakup tuliud tu kekpetuud nilan. Kaas mektinipuay ilan, mukaˈ megbanta su samasakup. 11 Dayun melaun paduni tautau pimuunan nu Megbebayaˈ metuaˈ, melaun getaw peglimbungan nilan. 12 Menamal dayun sug limbung, benaˈ melauni ndiˈ na mekpinetailay. 13 Dagid adin su getaw mektigel sampay mengikteb, iini megawen. 14 Mukaˈ ki Gempia Petenday kini mekatag di kesakup tu Keglekaunutan nu Megbebayaˈ, pegukit pa tu tibuuk lumbang, puˈ adun meketakesiˈ dun su kelaun bansa nu getaw. Tigaˈwan, dekag pa melengkebig benwa.”
Su Meliget Kelegenay nu Kilawan
15 Kaliˈ gusay pektaluˈ si Isus, “Naa ki giningelanan Mekelemuˈ mukaˈ Mekpelaat, su sinulat dengantu ditu Taluˈ nu Megbebayaˈ nu pimuunanen si Daniel, naa maitaˈ pa niu ki Mekelemuˈ mukaˈ Mekpelaat kia, paindegen dia pinaas Pengedapan tu Megbebayaˈ.” (Naa ki sinulat kini, subay sebuten gupia nu megbasa dun!) 16 Maaˈ laung padun ni Isus, “Mendadi, saˈ metandaˈ na dia ki Mekelemuˈ mukaˈ Mekpelaat kia, naa su nga getaw dini Judea, subay meglaguy tu ngag binentudan. 17 Adin su getaw metaang dia gatep nug balayen, ndiˈ pia melangan suled pa diag dialem puˈ malap tu pimetangen. 18 Samanen su getaw metaang ditug binaalanen, ndiˈ dadema mpia melangan muliˈ puˈ engainen pa sia su melambak suuben. 19 Naa sug libun saˈ metaang dig bedesanen ki gendaw kiin, mesama su pegduduˈan pa, aa, mekelelaatlelaat ilan gupia! 20 Mukaˈ iini penenebiin niu, ki kelaguy niu kia, ndiˈ metaang di timpu metegdaw atawaka metaang di Gendaw Pelali! 21 Puˈ ki kelegenay di gendaw kiin, ndaˈidun naig lain kelegenay mekelepeng dun, genat ditu kebuat di gekleb langit buˈ lupaˈ sampay nandaw, mukaˈ sampay pa dema dig binayaˈ gebii buˈ gendaw. 22 Kaas saˈ ndiˈ engkanan nu Megbebayaˈ su kaiben nu kelegenay kia, ndaˈidun na siai mesamaˈ getaw tetubuˈ, megelaˈ ilan sia mesapul. Dagid engkanan pa tuˈu nu Megbebayaˈ su kaibenen, sabaˈ nu nga tinduˈen sakupen.
23 “Mendadi,” maaˈ laung pa ni Isus, “saˈ duuni mektaluˈ diniu, ‘Bentayay pa daan niu, kiin na su Tinduˈ nu Megbebayaˈ Meglekaunutan!’ atawaka duuni mektaluˈ, ‘Kia nain!’ naa ndiˈ amu pekpetuud dun. 24 Puˈ duun pai nga metuaˈ tautau iini Tinduˈ nu Megbebayaˈ Meglekaunutan, mukaˈ metuaˈ dademai nga tautau pimuunan nu Megbebayaˈ. Mekpaitaˈ ilan nga ginuung mukaˈ mekesalebuˈ tuˈus, puˈ adun megaga nilan sia peglimbungay pia pa su tinduˈ nu Megbebayaˈ sakupen. 25 Kaas pekineeg amu gupia, daan ku na pisuun diniu ki mpenggulaula!
26 “Mesama da saˈ duuni mektaluˈ diniu, ‘Naa, sug Bataˈ nu Kilawan, kitu na, ditu na limawaˈ!’ -- ndiˈ niu laaway. Mesama da saˈ duuni mektaluˈ, ‘Naa, kitu na, ditu na megeglud!’ -- ndiˈ niu dadema petuuday. 27 Puˈ maaˈ nu gilat, tekaw tiaganen sug langit genat tu dapit silangan mangay tu sindepan, maˈantu dau dema, naan kini kig Bataˈ nu Kilawan, saˈ lumusadu puliˈ.
28 “Adin sug duunig bangkay dun, ditu dayun mekpungun su nga menagit.”
Ki Kelusad Puliˈ nug Bataˈ nu Kilawan
29 Pidayun gusay ni Isus su taluˈen, laungen, “Mendadi, saˈ laak mengikteb nai kelegenay di gendaw kia, su gendaw, ndiˈ na tuiag, mukaˈ sug bulan, ndiˈ na dema meglamag. Su ngag bitun ditug langit, meglabuˈ, mukaˈ su kelaun mibetang ditu gawanawan, mekegyugegyug. 30 Naa mendadi saˈ menuud naig launanen, naan kini, kig Bataˈ nu Kilawan, medayag dayun tug langit ki tuˈusu. Dayun su taman bansa getaw dig dibabaw lumbang kini, memektenlis ilan saˈ medayag nau nilan tuˈu, naan kini kig Bataˈ nu Kilawan, metuaˈu di gabun, medayag na su ginuungu, mukaˈ maitaˈ di tiagu su kelengas nu metaas pegbayaˈu. 31 Mendadi saˈ lumusadu, medengeg dayun ki metikteg bugyung, mukaˈ suguˈen ku dayun su nga sesuguˈen ku getaw langit, adun leepen nilan sug dibabaw lumbang, pungunen nilan su getaw pimiliˈ nu Megbebayaˈ sakupen, genat ditu pingikteban benwa ditu dapit silangan sampay ditu tampusan benwa dapit sindepan.”
Su Kengikteb nu Gekleb Langit buˈ Lupaˈ,
Metuˈusan su Kesebangen
32 Laung ni Isus, “Naa, alap niu tituluˈan ki gayu igera. Sug igera, saˈ mentubil su panganen dayun megbegu daun, mesuunan niu puˈ sungu na memedesig benwa. 33 Naa maˈantu dadema, saˈ maitaˈ na niuig launan gempenggulaula kini, mesuunan niu dadema puˈ naan, sungu nau mateng puliˈ, gitunganen, dia nau bisuangan nug balay. 34 Taman taluˈu diniu, ndiˈ tagad mematay su nga getaw tetubuˈ nemun, megelaˈ pa menuudig launanen kini. 35 Puˈ su gekleb langit buˈ lupaˈ, megelaˈ da mbeleng. Laak dagid ki pekteluˈen ku kini, ndaˈi kebelengen.
Ki Kelusad Puliˈ ni Isus, ndaˈiduni Mekesuun dun
36 “Laak dagid ki gempenggulaula kiin, ndaˈiduni getaw mekesuun dun, saˈ taˈ endaway dun atawaka taˈ urasay dun. Pia pa su nga sesuguˈen nu Megbebayaˈ ditu gekbus langit sampay naan, kig Bataˈen, ndaˈi mekesuun dun, subay su laak Gamaˈu. 37 Puˈ ki kelusadu puliˈ, naan kini kig Bataˈ nu Kilawan, iini samanen, su mipenggulaula ditu timpu ni Noe. 38 Di gendaw kitu minaan su getaw, mininum ilan, migbelaˈi ilan, sampay da dun di gendaw nu keseled ni nga Noe tug butuk. 39 Puˈ ndaˈ dig delendeman nilan su sungu mpenggulaula, kaas mikpuun sug Bagyu Lampap, dayun mitekawan melemesi kelaun getaw kitu. Mendadi, naan kini kig Bataˈ nu Kilawan, maˈantu dadema ki kelusadu puliˈ. 40 Saˈ matengu, duunig duaˈ tawan laki pekpengimbaal dig lupaˈ, elapen su sala tawan, mbilin dayun su sala tawan. 41 Duun pa pagidig duaˈ tawan libun peglegaling. Tekaw elapen su sala tawan, bilinen sug dumanen. 42 Kaas pegenduk amu, saˈitada pektalenten amu, puˈ ndaˈ niu mesuunay saˈ taˈ endaway dun ki ketuaˈ puliˈ nu Kaunutan niu. 43 Mukaˈ pegdelendem niu pa pagidi gapuˈ balay. Saˈ pinenggiˈ mesuunan pedaan nu gapuˈ balay su kedateng nu getaw malap sia di pimetangen, ndiˈ ba megenduk, adun ndiˈ sia mbegdakan sug dending nug balayen? 44 Mendadi naan kini, kig Bataˈ nu Kilawan, lumusadu puliˈ di guras kanaˈ niu pedetengen. Kaas pengandam amu gusay.”
Su Meseligan Sesuguˈen mukaˈ su kanaˈ Meseligan
45 “Mendadi,” laung ni Isus, “adin su sesuguˈen meseligan mukaˈ telisebuten, iin dayuni pebiaˈen nu gegalenen tu nga sama sesuguˈenen, iini mekilas tu gaan nilan saˈ matengi kegilas dun. 46 Saˈ mateng su gegalenen mukaˈ iini medetenganen, petuuden nu sesuguˈen su sinuguˈ diniin, naa leliagen su sesuguˈen kia! 47 Taluˈu diniu tuˈu, saˈ maˈnia, pegwakil dayun nu gegalenen diniin su kelaunan pimetangen. 48 Dagid saˈ medupangi sesuguˈen kia, dialem delendemanen, ‘Aa, su gegalen ku, maiben pa dateng,’ 49 kaas pesaitanen su nga sama sesuguˈenen mukaˈ meksidalu maan, meginum, dakus megbebulek, naa saˈ maˈnia, taˈ ma dayuni mpenggulaula? 50 Duuni gendaw metekaw muliˈ su gegalenen di guras ndaˈen pedetengay. 51 Mendadi, silutan dayun nu gegalenen ki sesuguˈenen kia, dayun pedumaay tu nga tautau mekesuun, benaˈ mengaduy, lamugen mengkiget di ngisinen.”