3
Kuminitaˈ dini Isus si Nicodemo
1 Naa duuni kaunutan nu getaw Judea ngalanen si Nicodemo, sakup di pikumpungan nu Pariseo. 2 Mendadi duuni gebii, kini si Nicodemo, luminabet dini Isus, kaliˈ pektaluˈ diniin, “Naa Sir, misuunan nami puˈ mekpetuˈun ka genat tu Megbebayaˈ. Puˈ ndaˈi getaw mekenggulaula di nga mekesalebuˈ tuˈus mu kia, subay ebangan nu Megbebayaˈ.”
3 Si Isus, kaliˈ sembag, “Taman taluˈu diniˈa, ndiˈ mpedumai getaw tu Keglekaunutan nu Megbebayaˈ, subay megigetaw iin puliˈ.”
4 Kaliˈ dayun saak si Nicodemo, “Endunen ma duni kegigetaw puliˈ nu megulang getaw? Mesuˈat ba mpuliˈ ditu tian nu ginaˈen dayun megigetaw puliˈ?”
5 Kaliˈ sembag si Isus, “Taman taluˈu diniˈa, ndaˈi getaw mekesakup tu Keglekaunutan nu Megbebayaˈ, subay megigetaw pebian di tubig mukaˈ pebian dig Balakat nu Megbebayaˈ. 6 Adin su megigetaw mekpuun di kilawan, kilawan dademai gasalen. Saˈ su megigetaw mekpuun dig Balakat nu Megbebayaˈ, diniwata dademai gasalen. 7 Ndiˈa mesebuˈan dun su tinaluˈu diniˈa puˈ subay megelaˈ amu megigetaw puliˈ. 8 Pinanggiˈu tu genus. Su gengayan nu genus, su genus laaki metau dun. Medengeg mu, laak ndiˈ mu mesuunani gengayanen sampay pigenatanen. Naa, maˈantu dadema su megigetaw di pegbayaˈ nug Balakat nu Megbebayaˈ, ndiˈ mu mesuunan saˈ mikendutaˈ dun.”
9 “Apelai,” laung ni Nicodemo, “kendutaˈ main?”
10 Kaliˈ sembag si Isus, “Aa, yaˈa kini, memintuluˈa nu getaw Israel, laak ndaˈ mu ba mesuunay ia? 11 Taman taluˈu diniˈa, pekteluˈen nami diniu su misuunan nami, pegukiten nami su minitaˈ nami, laak ndiˈ amu metuudan dun. 12 Naa saˈ ndiˈ amu metuudan dun su tinaluˈu mekatag di gempenggulaula dinig lumbang, metuudan bamu dun su teluˈen ku mekatag dig langit? 13 Ndaˈi getaw mikelentu adun meditug langit, subay laak sug luminusad, sug Bataˈ nu Kilawan, naan.
14 “Naa dengantu, si Moises kiin, selian nu nga getaw Israel dia pa limawaˈ, binaalenig ledawan, mamak galang. Ininaten dayun bitangen ditu patal nu sekuden. Naan, mpemaˈniin dau dema, subay mainat dau dema dayun mbetangu di pasek, 15 puˈ adun, adin su getaw metuudan dinaan, begayan ketubuˈ ndaˈi tamanen. 16 Puˈ kagina melelaat gupia su Megbebayaˈ di tibaˈan getaw, bigayen matay sug buntung Bataˈen, adun adin su metuudan diniin, ndiˈ matay, segaga begayan ketubuˈ ndaˈi tamanen. 17 Kanaˈ iini sinuguˈ dun nu Megbebayaˈ kig Bataˈen lumusad dinig lumbang puˈ adun mengukum tu tibaˈan getaw. Segaga iin sungkini luminusad dun dinig lumbang, meglegawen tu tibaˈan getaw.
18 “Mendadi adin su metuudan dinaan, kig Bataˈ nu Megbebayaˈ, ndiˈ ukuman di melaat. Laak dagid adin su memilas dinaan, duun nai ginukuman dun, puˈ ndaˈen seligayig buntung Bataˈ nu Megbebayaˈ. 19 Iini kaukum dun. Ki tiag, luminusad dinig lumbang, laak pimilas nu nga getaw. Mauyaˈan nilan su medelem sabayaˈ su tiag, puˈ melaat gupiai pigbetad nilan. 20 Adin su getaw penggulaulaanen su melaat, mpauk ditu tiag. Ndiˈ mekpesempel di tiag, adun ndiˈ medayag su penggulaulaanen ndaˈi pantagen. 21 Laak dagid adin su getaw melengasi pegbetadenen mikpuun tu metuud, naa mekpesempel di medelag, adun maitaˈ gupia su penggulaulaanen, puˈ dunutanen sug delendeman nu Megbebayaˈ.”
Si Isus mukaˈ si Juan su Memunag Tubig
22 Naa tubus itu, miditu si Isus prubinsya Judea, ilan nu nga sakupen. Migbebenwa ilan dia ndaˈ maiben, pimbunagan ni Isus tubig su nga getaw. 23 Naa si Juan, migbunag dadema tubig tu nga getaw diag benwa Enon, mesempel tug lunsud Salim, puˈ melaun tubig dia. Melaun getaw miditu niin, binunagan ilan dayun ni Juan tubig. 24 (Su timpu kia, ndaˈ pa mpirisu si Juan.)
25 Mendadi duuni nga sakup ni Juan mukaˈ sala tawan getaw Judea, miglantugiˈ ilan mekatag di kengugas adun mawaˈ su kelemuˈay nu getaw. 26 Saˈ maˈnia, minadap dini Juan su nga sakupen kia, laung nilan diniin, “Sir, ki tinakesiˈan mu duma mu kiin ditug dipag Jordan, mimunag nain tubig di nga getaw, mukaˈ meditu niin su kelaun getaw!”
27 Kaliˈ sembag si Juan, “Petekenen na niu, puˈ pia taˈ taway dun, ndaˈiduni mpenggulaulanen subay bigay dun nu Megbebayaˈ. 28 Misuunan da niu gupia su tinaluˈu diniu, puˈ kanaˈ naan su pedetengen Tinduˈ nu Megbebayaˈ Meglekaunutan. Laak dagid pisuun ku diniu sinuguˈu laak nu Megbebayaˈ pepengendamen ku su nga getaw di pegdateng nu Tinduˈen kiin. 29 Naa, iin pitanggiˈu di menginsawa. Danu menginsawa su penginsuaan. Leliagen su sambaten samalakinen, su pegindeg dia gupiden mukaˈ mekineeg, puˈ medengegen su tingeg nu menginsawa. Naa, maˈniin dinaan. Benaˈ medengegu puˈ duuni getaw suminakup dini Isus, megelaˈig leliagu. 30 Sug dengegan ni Isus, subay megdugang, sug danaan, megengkan.”
Ki Getaw genat tug Langit
31 Naa, ki getaw kini genat tug langit, iin si Isus, su tampusan metaas. Su genat dinig lumbang, piktuˈunen sug betad dinig lumbang, puˈ iini pigenatanen. Su genat tug langit, ndaˈ naig lumabaw diniin. 32 Ukitenen su minitaˈen mukaˈ su midengegen, laak dagid pemilasen nu nga getaw su gukitenen. 33 Laak adin su menembaˈ ditu teluˈenen, peglegintuudenen puˈ su Megbebayaˈi puunan nu metuud. 34 Puˈ su sinuguˈ nu Megbebayaˈ medini, bigayan gupia Balakat nu Megbebayaˈ, kaas petendayen su taluˈ nu Megbebayaˈ. 35 Petailen gupia nu Gamaˈ Megbebayaˈ sug Bataˈen, kaas pipegbayaˈ nu Megbebayaˈ dig Bataˈen sug launanen. 36 Mendadi adin su mekpetuud tug Bataˈ nu Megbebayaˈ, si Isus kini, iini begayan ketubuˈ ndaˈi tamanen. Adin su memilas diniin, ndiˈ medawat nu Megbebayaˈ, puˈ ndiˈ meleknas diniin su gangit nu Megbebayaˈ.