7
Piuliˈan ni Isusi Getaw Lainig Bansanen
1 Naa benaˈ mideksuˈen su kelaun pidengegen tu nga getaw dia, mipanaw si Isus ditug lunsud piningalan dun Capernaum. 2 Naa duuni getaw diag lunsud kia, kaunutan di sundalu nu getaw Roma, migladui petailenen sesuguˈenen, pekagawinaa da dun. 3 Mendadi su kaunutan, benaˈ midengegen su kedateng ni Isus, duuni sinuguˈen nga kaunutan nu getaw Judea, adun sebiin nilan si Isus, adun sia mangay meneguliˈ di sesuguˈenen kia. 4 Naa benaˈ minateng ditu ni Isus su nga sinuguˈ, kaliˈ ilan penengi diniin, “Ki kaunutan sundalu kiin, mbantang dema tuˈu ebangan mu, 5 puˈ melelaat dig bansa ta, iini miglegastu di simbaan nami.”
6 Saˈ maˈantu, sumikat tuˈu si Isus, migdunut dayun tu nga sinuguˈ kia. Laak benaˈ mesempel nailan tug balay, suminuguˈ su kaunutan sundalu di nga sambaten mangay mekpetenday dini Isus, pimuunen dinilan, “Naa Sir, petuyangen na, laungen, ndiˈa na mundas. Puˈ naan, kanaˈ mbantang penaikan muig balayu. 7 Kaas ndaˈu makuˈ madap diniˈa. Pektaluˈa laak diin, naa misuunan ku puˈ mauliˈan tuˈui sesuguˈen ku kia. 8 Puˈ maaˈ dinaan kini, duuni metaas pa dinaan sumuguˈ dinaan, duun pa pagidi sundalu suguˈen ku. Teluˈan kui sala tawan, ‘Dituun ka angay,’ meditu dayun. Teluˈan ku pelumi sala tawan, ‘Diniin ka angay,’ medini dadema. Saˈ teluˈan ku su gulipen ku, ‘Maˈniniˈi baalen mu,’ naa baalenen dayun.”
9 Benaˈ midengeg ni Isus su pimuunen kia, misebuˈan dun gupia. Liningayen dayun su kelaun getaw tumindug diniin, laungen dinilan, “Taman taluˈu diniu, ki kaunutan kiin, ndaˈu mainsan mbianayi kesalig mesama di kesaligen, pia pa dini nita nga getaw Israel!”
10 Naa benaˈ minateng puliˈ su nga sinuguˈ ditug balay nu kaunutan sundalu, iini mitaangan nilan, miuliˈan na tuˈu su sesuguˈen kia.
Pitubuˈ Puliˈ ni Isusig Bataˈ nug Balulibun
11 Tubus nituˈ ndaˈ maiben, mipanaw si Isus, ilan nu nga sakupen sampay melaun gupia getaw, minangay ilan ditug lunsud piningalan dun Nain. 12 Naa benaˈ misebang ilan tu gengaˈan nug lunsud, duuni nga getaw pegbulig minatay misungkak nilan. Ki minatay kini, buntung bataˈ balulibun. Dakus melaun getaw genat tug lunsud migdunut tug balulibun. 13 Mendadi su Kaunutan si Isus, benaˈ minitaˈen sug balulibun, milelaat dun dayun, laungen diniin, “Naa Dadaˈ, ndiˈa na pengaduy.” 14 Naa mukaˈ mikpesempel si Isus, dipenanen sug lungun. Mitenlen dayun su nga migbulig dun. Miktaluˈ si Isus, “Naa Nuung, taluˈu diniˈa, pegbuata!” 15 Migingkud tuˈu ki minatay kia, dunut mikektaluˈ na. Pigwakil dayun ni Isus tu ginaˈen.
16 Naa apelai, su nga kelaun getaw, mindekan ilan patiˈ. Inal nilan dayun su Megbebayaˈ, laung nilan, “Mituaˈ na dinita ki metaas pimuunan nu Megbebayaˈ! Liningiˈan na tuˈu nu Megbebayaˈi nga piglegetawanen!”
17 Naa saˈ maˈantu, mileep tug benwa Judea su gukiten di pinggulaula ni Isus, sampay ditug lumibut benwa.
Sinaak ni Juan saˈ si Isus su Tinduˈ nu Megbebayaˈ Meglekaunutan
18 Naa si Juan kiin, su Memunag Tubig, inukit diniin nu nga sakupen su tibaˈan pinggulaula ni Isus. 19 Mendadi sinabi ni Juanig duaˈ tawan sakupen, sinuguˈen ilan meditu nu Kaunutan si Isus, pimuunen dinilan, laung, “Sir, kelelaat taluˈ mu dinami saˈ yaˈa na tuˈu su pedetengen nami lumusad, atawaka mekpedateng pami dig lain?”
20 Naa benaˈ midepet ditu ni Isus su nga sinuguˈ ni Juan, laung nilan diniin, “Sir, sinuguˈ ami ni Juan su Memunag Tubig. Pimuunen dadema dinami saaken diniˈa, saˈ yaˈa ma daw su pedetengen nami lumusad, atawaka megelat pami dig lain?”
21 Naa mitaang dun, melaun mimegladu mukaˈ mesaitan pineguliˈan ni Isus dakus melaun getaw piglegetan menenulay, sampay melaun buta pipengitaˈen. 22 Mendadi, sumimbag si Isus ditu nga sakup ni Juan, laungen, “Naa, puliˈ amu ditu ni Juan, ukit niu diniin ki taman minitaˈ niu kini mukaˈ ki midengeg niu. Su ngag buta, mikengitaˈ na. Su nga pilung, mikepanaw na. Su nga migladu mekesalebuˈ nuka, miuliˈan na. Su ngag bengel dema, mikedengeg na. Sampay su nga minatay, pitubuˈ na puliˈ. Mukaˈ su gempusuk getaw, inukitan na tu Gempia Petenday. 23 Kaas adini getaw ndiˈ memilas dinaan, iini liliag!”
24 Mendadi, saˈ mipalus su nga sakup ni Juan, migukit si Isus tu melaun getaw mekatag dini Juan. Sinaak ni Isus dinilan, “Naa kini si Juan, saˈ linaawan niu iin ditug limawaˈ, alandun mai pedetengen niu diniin? Laung niu ba si Juan, maaˈ nu sala puun tigbaw, melemu mpilay nu genus? Kanaˈen. 25 Naa saˈ maˈantu, alandun mai pedetengen niu diniin? Laung niu dun puˈ getaw migimakay? Baa, kanaˈen dadema, puˈ su getaw migimakay dakus melengasi kebetangen, subay ditu laak penengaway balay nu nga gadiˈ! 26 Mendadi saˈ maˈantu, taˈi pedetengen niu maitaˈ niu? Getaw pimuunan nu Megbebayaˈ? Waˈa lai! Mukaˈ taman taluˈu diniu, kini si Juan, kanaˈ laak pimuunan nu Megbebayaˈ. 27 Puˈ iinen dadema su mibetang ditu Misulat Taluˈ nu Megbebayaˈ, laung, ‘Miktaluˈ su Megbebayaˈ, Mendadi paunaan ku diniˈa ki pemuunan ku, puˈ adun pengendamenen sug bianan mu.’” 28 Kaliˈ gusay pektaluˈ si Isus, “Naa saˈ maˈantu, taman taluˈu diniu, genat pa dini Adan sampay nemun, ndaˈi sala tawan metaas pa dini Juan. Laak dagid pia maˈantu, adin su tampusan gembabaˈ sakup di Keglekaunutan nu Megbebayaˈ, iini metaas padun dini Juan.”
29 Naa su melaun getaw kampuˈ nu nga mendawat buis, benaˈ midengeg nilan su tinaluˈ kia ni Isus, mikpetuud ilan tu Megbebayaˈ, ilani gandang binunagan ni Juan tubig. 30 Laak dagid su nga Pariseo mukaˈ su nga mekpetuˈun di Misulat Palinta nu Megbebayaˈ, pimilas nilan sug delendeman nu Megbebayaˈ dinilan, kaas mipauk ilan bunagan ni Juan tubig.
31 Kaliˈ padun pektaluˈ si Isus, “Mendadi ki getaw nemun, alandun mai penenggiˈan ku dun? Alandun bai samanen? 32 Petanggiˈu di gembataˈ pemeglingkulu pegayep dia padiˈan. Beksayan nilan su nga samambataˈ nilan, laung nilan, ‘Mauma saˈ minlantuyan ami diniu, ndaˈ amu peksabay? Dayun saˈ miksulang ami, mauma ndaˈ amu pelum pengaduy?’ 33 Puˈ si Juan,” laung ni Isus, “mituaˈ diniu, iinig betaden mekpuasa mukaˈ ndiˈ minum mekebulek. Laung niu dayun, ‘Pingepuˈan menulay!’ 34 Tubus itu naan kini, kig Bataˈ nu Kilawan, mituaˈu pelum diniu, betadu maan dau mukaˈ minum dau dema. Laung niu pelum, ‘Paa, bentayay pa daan niu, medalu masiˈ maan mukaˈ penenatan meginum, sambaten pa paduni nga mendawat buis mukaˈ ki ngag duma mekesesalaˈ getaw!’ 35 Laak dagid ki tantu sinuunan genat tu Megbebayaˈ, mailala dia penggulaulaan nu megdunut dun.”
Sug Libun Gembageli Kegbasanen dini Isus
36 Naa inggat si Isus maan tug balay nu sala tawan Pariseo. Miliag si Isus, midia dayun adun sumalu dinilan maan. 37 Naa duuni sala tawan libun dangen dig lunsud kia, tebiaˈ meglaat pekesuunan. Laak pia maˈantu, kig libun kini, benaˈ midengegen pekaan si Isus diag balay nu Pariseo, midia dayun, peguit bataˈ bandi gemputiˈ, mipenuˈ pagemut. 38 Mendadi, benaˈ mitulan sug libun, migindeg di teliudan ni Isus, mesempel di geksuden. Pengaduy namal sug libun kia, mitegduˈan luaˈen su geksud ni Isus. Benaˈ mibasaˈ luaˈen su geksud ni Isus, pinunasan dayun nug libun, iini pinunasen dun sug buuken, dunut pingelekanen su geksud ni Isus, kegbasanen diniin. Binunaganen padun nu pagemut su geksud ni Isus. 39 Dekag minitaˈ nu Pariseo kia, maaˈ laungen pa dig dialem delendemanen, “Paa, ki getaw kini, saˈ sia metuud puˈ pimuunan nu Megbebayaˈ, mailalanen siaig libun kini mikpuleg diniin, mesimaˈen sia puˈ meglaat pekesuunan!”
40 Dagid si Isus, kaliˈ pektaluˈ, “Simon, duuni teluˈen ku diniˈa.”
Kaliˈ sembag si Simon, “Sigi, Sir, pedayun mu.”
41 Kaliˈ pektaluˈ si Isus, “Naa, duuni mekpautang kwarta, piutangen duaˈ tawan. Ki sala tawan, inutangen lima gatus denario. Su sala, lima puluˈ da. 42 Naa sabaˈ ndaˈ ilan mekebayad, pidasun nailan duaˈ. Naa saˈ maˈantu, taˈ ma, adin saan dinilan duaˈ su gembageli kepetailen ditu mikpedasun diniin?”
43 Laung ni Simon, “Mabuˈ ki getaw gembageli gutangen pidasun.”
“Metuud,” laung ni Isus. 44 Liningayen dayun sug libun kia, kaliˈ pektaluˈ dini Simon, “Naa, maˈantu dadema kig libun kini. Yaˈa, saˈ mitulanu dinig balay mu, ndaˈ mau tanan begayay tubig gugasu sia di geksudu. Laak kig libun kini, kig luaˈen nai ginugasen di geksudu, sug buuken demai pinunasen dun. 45 Yaˈa, ndaˈ mau dedialay di galek. Laak dagid iin, sikna nau mitulan dini, ndaˈen mainsan sikpaˈay pengelekayi geksudu. 46 Yaˈa, ndaˈ mu bunagay lanai guluu, laak dagid iin, binunaganen pagemuti geksudu. 47 Paladpalad taman taluˈu diniˈa, ki salaˈ nig libun kini, pia melaun, gempantek puˈ pidasun na, puˈ gembageli kepetailen dinaan. Laak adin su getaw pidasun di maikaˈ, maikaˈ dademai kepetailen.”
48 Miktaluˈ dayun si Isus dig libun kia, “Pidasun nai salaˈ mu.”
49 Naa su ngag duma ni Isus maan, benaˈ midengeg nilan ki tinaluˈen kini, mikpuun ilan sumaak dig delendeman nilan, laung nilan, “Paa, adin saan getaw ini, pia su salaˈ, pedesunenen?”
50 Laung ni Isus tug libun kia, “Naa, migawen ka tuˈu, sabaˈ nu kesalig mu. Uliˈa na, gempia nai ginaa mu.”