10
Su Sepuluˈ buˈ Duaˈ Peneligan ni Isus
1 Naa ki sepuluˈ buˈ duaˈ peneligan ni Isus, sinabinen ilan. Mendadi benaˈ misabi ilan, bigayanen ilan pegbayaˈ mengutid di menenulay mukaˈ meneguliˈ tu nga kelaun leduun mukaˈ kulang dig lawas nu getaw. 2 Naa kinii nga ngalan nu nga sepuluˈ buˈ duaˈ peneligan ni Isus. Sug beknanen, si Simon (sala ngalanen si Pedro), mukaˈ su pateden si Andres, dayun si Santiago mukaˈ su pateden si Juan, gamaˈ nilan duaˈ si Sebedeo, 3 dayun si Felipe mukaˈ si Bartolome, dayun si Tomas mukaˈ si Mateo, getaw mendawat buis, dayun si Santiago gamaˈen si Alfeo, mukaˈ si Tadeo, 4 dayun si Simon, sakup nu nga mingatu di gubirnu. Mendadi su kesepuluˈ buˈ duaˈen, iin si Judas Iscariote, su tumipu pa dini Isus.
Sinuguˈ ni Isus Mpanaw su Sepuluˈ buˈ Duaˈ Peneliganen
5 Maˈantu, ki sepuluˈ buˈ duaˈ peneligan ni Isus kia, sinuguˈen ilan mpanaw. Dekag ilan pasiˈ mipanaw, miktituluˈ dinilan si Isus, laungen, “Ndiˈ amu angay dig benwa nu kanaˈ getaw Judea, sampay dig lunsud nu getaw Samaria. 6 Segaga angay amu tu sama ta getaw Israel, ki pitanggiˈu di nga karniru mibeleng. 7 Mendadi panaw amu, pengukit amu, iini taluˈ niu, ‘Ki Keglekaunutan nu Megbebayaˈ, pikpuunan na!’ 8 Su pegladu, peneguliˈay niu. Su minatay, petubuˈ niu puliˈ. Su megladu mekesalebuˈ nuka, peneguliˈay niu dadema. Su peglegetan menulay, utiday niu ditu nilan su menenulay. Kagina bigayan amu di ndaˈig bayad niu dun, begayay dadema niu su nga samataw niu, di ndiˈ da niu dema pebiaden. 9 Ndiˈ amu peguit kwarta bulawan atawaka pelata, pia sinsilyu tumbaga. 10 Saˈ mpanaw amu, ndaˈiduni sengkapan uiten niu, pia gambag, gilisan suub, sepatus, sampay sekud. Puˈ ki getaw megabang di ngag dumanen, mbantang gestuan di kaˈaanen.”
11 Laung pagid ni Isus, “Naa saˈ mateng amu dig lunsud atawaka gimbelayan, bundas amu, penengaw amu getaw meliag tulugan niuig balayen. Ditu laak amu tuun, sampay mekebundas amu dig lain lunsud. 12 Laak saˈ metulan amu dia, iini taluˈ niu di nga getaw dia, ‘Pepianan amu.’ 13 Dayun saˈ penembaˈen amu nu getaw diag balay kia, naa mpianan ilan dema. Laak dagid saˈ ndiˈ ilan menembaˈ diniu, ndiˈ dailan dema mpianan. 14 Mukaˈ adin sug balay atawaka lunsud ndiˈ menembaˈ diniu dakus ndiˈ mekineeg diniu, pegawaˈ amu dayun dia, mukaˈ ekpug niu sug lepup lupaˈ di geksud niu. 15 Taman taluˈu diniu, saˈ mateng ki Gendaw nu Kengukum nu Megbebayaˈ di tibaˈan getaw, tumuˈ megaan pai ginukuman tug lunsud Sodoma mukaˈ Gomora dengantu, sabayaˈ di ginukuman tug lunsud kia ndiˈ menembaˈ diniu!”
Su Kekpeleget sungu Mbianay nu nga Sakup ni Isus
16 Kaliˈ pektaluˈ si Isus, “Pektalentenay niu ini! Ki kesuguˈu diniu mpanaw, petanggiˈu amu di karniru mingingelet di nga mendapaˈ dun. Subay megaliˈ amu, mesama tug betad mamak. Mukaˈ su pegbetaden niu, mayaˈmayaˈ, sama da nug betad limuun. 17 Kaas peglengilam amu, puˈ dengaten amu di gedapan nu kuis dakus pembedasen amu nu getaw Judea tug dialem nga simbaan nilan, 18 dakus dengaten amu di gedapan nga gadiˈ mukaˈ duma kaunutan, sabaˈ nu kesakup niu dinaan. Mendadi mpenggulaula kia, adun su sembag niu dun, iini mbaal sikaw niu megukit di Gempia Petenday tu nga kaunutan kia, sampay tu nga kanaˈ getaw Judea. 19 Kaas saˈ dengaten namu, ndiˈ amu melibuleng dun, saˈ taˈ alandun mai gempia niu sembag dun. Segaga saˈ penenaakan namu, petaluˈ na diniu su gempia sembag niu dun. 20 Puˈ ki sembag niu, kanaˈ laak daniu taluˈ, puˈ pedelendem da diniu nug Balakat nu Gamaˈ niu ditu gekbus langit.”
21 Laung ni Isus, “Duuni getaw megwakil di nga pated nilan petain, mukaˈ maˈniin dademai penggulaulaan nu nga getaw dig bataˈen. Sampay su nga gembataˈ, kuntraanen dadema su ginaˈen mukaˈ gamaˈen, sampay meksimawiˈ dinilan ki petain. 22 Mukaˈ bentaan amu nu kelaun getaw sabaˈ nu kesakup niu dinaan. Dagid adin su getaw mektigel sampay mengikteb, iini megawen. 23 Naa saˈ peglegetan amu di salabuuk lunsud, laguy amu dig lain. Naa taman taluˈu diniu, ndiˈ niu tagad meleep su kelaun lunsud dig benwa Israel, naan kini, kig Bataˈ nu Kilawan, lumusadu puliˈ dinig lumbang.
24 “Puˈ su getaw mektuˈun,” maaˈ laung dema ni Isus, “kanaˈ metaas pa di mekpetuˈun diniin. Su sesuguˈen, kanaˈ metaas pa di suminuguˈ dun. 25 Kaas su getaw mektuˈun, saˈ iini mbiananen ki mibianan dadema nu mekpetuˈun diniin, subay senguˈenen. Su gulipen dema, saˈ iini mbiananen ki mibianan dadema nu mingulipen dun, naa senguˈenen dadema. Puˈ ki gamaˈ, saˈitada naan, saˈ iini piningalan nu getaw dinaan Beelsebul, naa labi pamu nga gembataˈ, maˈantu dademai paingalan nilan diniu!”a
Su nga Sakup nu Megbebayaˈ, ndiˈ Kambat Mendek
26 Laung ni Isus, “Mendadi kagina maˈantu, ndiˈ niu endekay su kilawan. Puˈ ndaˈiduni mitebunan nemun, ndiˈ mbuasan. Ndaˈiduni giglud nemun, ndiˈ dema mesuunan. 27 Kaas adin su teluˈen ku diniu di meleglud, pegukit niu tu gedapan. Adin su kimedu diniu, ukit niu tu tebuˈan! 28 Kaas ndiˈ niu daan endekayi sama kilawan niu, puˈ daal da laaki megaganen petayay, sug lawas nu getaw. Laak su gimuud nu getaw, ndiˈen megaga petayay. Segaga iin laaki gempia gendekan niu su Megbebayaˈ, kig duuni pegbayaˈen mekpatay di getaw, mukaˈ pa padun megbeleng dun ditug linaw gapuy.
29 “Puˈ pegdelendem niu deliˈ su manukmanuk. Duaˈ buuk leksayaw, ndiˈ ba mesaluy selaad siin? Laak pia maˈantu, ndaˈi salabuuk dun matay, saˈ kanaˈ buangen nu Gamaˈ niu. 30 Yamu pelum, pia kig buuk di gulu niu, misuunan da nu Megbebayaˈ saˈ santaˈ balu. 31 Kaas ndiˈ amu mendek daan, puˈ gembagel gupiaig lagaˈ niu tu Megbebayaˈ, sabayaˈ nu nga manukmanuk!
Su Mbianan nu Getaw Mangken dini Isus dakus su Memalaw diniin
32 “Mendadi, adini getaw kanaˈ mpiid meglegintuud di gedapan nu nga getaw puˈ suminakup dinaan, naa naan, engkenen ku dadema iin ditu gedapan nu Gamaˈu tu gekbus langit. 33 Dagid adin demai memalaw di gedapan nu getaw puˈ kanaˈ sakupu iin, naa pemelaun ku dadema iin ditu gedapan nu Gamaˈu tu gekbus langit.”
Kanaˈ nu Keksalabuuk, puˈ su Keksinualay
34 Laung ni Isus, “Mendadi, ndiˈ niu delendemay puˈ iini luminusadu dun, pesalabuuken kui getaw dinig dibabaw lumbang. Kanaˈ maˈantu! Puˈ meksual ilan pasiˈ, naani puunen! 35 Meksumpakiˈig delendeman nug laki mukaˈ nu gamaˈen, maˈnia dademaig libun mukaˈ su ginaˈen. Meksumpakiˈ dademai minugangan libun mukaˈ su penuganganen libun. 36 Deksuˈanen, saladuaˈ iini tampusan kuntranen, su na laak betaˈanen gupia.
37 “Mendadi adini getaw, saˈ su kekpetailen tu ginaˈen buˈ gamaˈen, gembagel pa di kekpetailen dinaan, naa ki getaw kia, kanaˈ mbantang sumakup dinaan. Mesama da su getaw, saˈ su kekpetailen dig bataˈen libun laki, gembagel pa di kekpetailen dinaan, iin, kanaˈ dadema mbantang sumakup dinaan. 38 Puˈ adini ndiˈ mekpisan kurusen dakus dumunut dinaan, naa kiin, kanaˈ mbantang sumakup dinaan.b 39 Naa adini mpauk megwakil gumulen dinaan, mbeleng diniin su ketubuˈ ndaˈi tamanen. Adin su pegwakilen dinaan su gumulen sabaˈ nu kesakupen dinaan, iin, malapen sungkin su ketubuˈ ndaˈi tamanen.”
Su Sugda tu Sakup ni Isus
40 Laung ni Isus, “Mendadi adini menembaˈ diniu, naa gitunganen, naani mipenembaˈen. Mukaˈ kagina pinembaˈu niin, mipenembaˈen dadema su suminuguˈ dinaan. 41 Mukaˈ adin su menembaˈ di getaw megwali taluˈ nu Megbebayaˈ, sabaˈ misuunanen puˈ megwalii getaw kia, sugdaan da nu Megbebayaˈ su menembaˈ dun, lepeng tu sugda ditu megwali kia. Maˈantu dadema su menembaˈ di mekesuun getaw, sabaˈ misuunanen puˈ mekesuuni getaw kia, iin, sugdaan dadema nu Megbebayaˈ su menembaˈ dun, lepeng tu sugda ditu mekesuun getaw kia. 42 Kaas taman taluˈu diniu, pinenggiˈ duuni getaw megbegay sala tasa tubig di tampusan gembabaˈ sakupu, sabaˈ misuunanen puˈ sakupui getaw kia, naa sugdaan tuˈu nu Megbebayaˈ su getaw mekpainum dun.”