[Xaliifedebu]
(4.41-43 ; Jaatu 35.9-34)
19
« Bire be Tunka Duumante axa Alla ga na xabiilanu ku buruxa bakka axa kaane, na i ɲiiɲen kini axa yi, axa ga da i ɲiiɲen boosi i ya, nan taaxu i debun do i kaanun ŋa, 2 axa na debu sikki duran booxo kaaran ŋa du da jamaane ke noxo. 3 Tunka Duumante axa Alla gaa jamaane ke be kinni axa yi taqe, axa na killun bagandi du da, na axa jamaane ke kutu sikko, ken moxo yi debe na ɲa taxande su noxon ŋa, serikallaana su na wuru katta kun debu yi. 4 Serikallaana be gaa wurunu katta non ŋa kuudo i n kisi, ken ni ya : i be nda i kapanlenman kari an ga ma a tewu, daaru ma daarumen xonnaaxu ma ŋi non ŋa nan xaso. 5 Sere xa be do i kapanlenman ga daga sollikuti gunnen ŋa, a gaa sollen kuttu, yiden funsen xosi kolosi bakka xaren ŋa a kitten ŋa, nan ro kapanlenma ke yi, a xosi kara, ken karindaana ra wa wurunu katta ku debu du baananbe yi, a na kisi. 6 Ken ŋa, killen giilen ga na ɲi, fure ke maarenme, ken ga ni foronxirindiyenmen ŋa, a butten ga na a buyi, a n maxa karindaana ke fanpa a gaa regene a yi na a kari, na a toxo kallen kiiten nta a kanma, baawo daaru ma daarumen xonnaaxu xase ma ɲi a maxa katta a yi. 7 Ken ya n sigi in ga da an ɲaamari nan ti an na debu sikki sugandi an du da. 8-9 Tunka Duumante an Alla ga na axa kutiyen yuruwandi bire be xoyi a ga kuna axa faabanu da moxo be, nan ti i wa a kinni i ya, a ga da a muuman su kini axa yi, axa na yille debu sikki tana kapa axa debu sikki fano ku yi du da. Ken ɲaana ya de selli axa ga na ku ɲaamarindixannu tanga kuudo nan golli ti i ya xoyi in ga da axa ɲaamarini moxo ke be yi lenki, ken ga ni axa na Tunka Duumante axa Alla xanu, nan tere do a killun ŋa koota su. 10 Ken ŋa, axa ɲiiɲe be Tunka Duumante axa Alla gaa a kinni axa yi taqe, xa ntaxa fori senne joxi a kanma, foron haqen gaa telle jongi axa yi.11 « Xa, sere be nda i kapanlenman xoni, a xosi a xaɲa nan xanu a yi, na a katu na a kari, ken falle nan wuru telle ku debu du baananbe yi, 12 a deben xirisun na faarun xayi do a batten ŋa, i na a raga nan ri a kini foronxirindiyenmen ŋa, ken ga ni furen wolin ŋa, ken na a kari. 13 Maxa hinne a yi hari fonne. Isirayila na kisi fatimullukallen bonen ŋa. Ken na ɲaŋi axa da xeeri yi.
[Seedaano]
14 « An kapanlenman ga da kutiye be xallaaxu bakka ɲiiɲe ke be Tunka Duumante axa Alla gaa riini a kini axa yi kuudo axa na a mara, seri fanon ga da gingun be sigindi, maxa i girindi.*
15 « Seedaana baane nta waseene na yango sigindi sere yi, ma toora, walla xa fo bure tana su danbe ; seedaano filli ma seedaano sikki digaamen kanma ya ni xibaaren yaaxe na sigi.* 16 I be nda giri nan seedeburuseede seri baane kanma yi ti a kaman da Alla kuta, 17 i sero filli ku be gajanŋen gaa i naxa, i na sigi Tunka Duumanten jon me naxa. Sadaxakiɲandaana be do kiitaana be gaa non ŋa a koota, i sikki kun ya jon ŋa nan digaamu. 18 Kiitaanon na segesegendi moxo siri selli seedaana ke ga seede ti gaaren ya yi i maarenme ke kanma. Ayiwa i ga na a ɲi a ga da gaaren ya ko, 19 ken ŋa a ga da a ŋanniya na ke be ɲaŋi i maarenme ke yi de, axa na ken me golle ya saqa a kanma. Axa na fo buren buruxa bakka axa noxon ŋa. 20 Jaman kutten ga na ken mugu, i na kanu, i ntaxa ke fi bure kundu me ɲaana axa noxon ŋa xadi. 21 Maxa hinne a yi hari fonne ; yonki tugeene ti yonki ya, yaaxe tugeene ti yaaxe ya, kanbe tugeene ti kanbe ya, kitte tugeene ti kitte ya, ta tugeene ti ta ya.*