Tawureeta :
Jaatu
Roraqe
Banisirayilaganko ga da tannaxate siine be ɲa laawene do gunjuran ŋa, nan giri Tuurisiina giden ŋa ma i gaa riini Kanaana jamaane ke be laayidun ga wuti i da, kitaabe ke digaamunu ken ya kanma. Kitaabe ke toxon xiri « Jaatu » na a sababun ɲa Alla jama ke da me yiriga na me jaate ta gabe ya yi.
Ke kitaabe taxandinten na taxandu sikki ya. Taxandi fanan wa a wuttu soora fanan ŋa katta soora tanmundin aayi tanmun ŋa, Tunka duumanten da Muusa ɲaamari ken noxon ya yi ti a na jaman jaate. Leewikaarankon sigan fatanpansi. Pesexansallen salli, xaba ŋalinten xufi tilliisi sennen ŋa.
Kitaabe ke taxandi fillandin wa a wuttu soora tanmundin aayi tanmu do baanandin ŋa katta soora tanpille do baanandin aayi tanpillendi. Jaman ga giri Tuurisiina nan teŋe jamaane ke be laayidun ga wuti i faabanu da, a digaamunu ken ya kanma. Ken do i ga da xota gabu beenu wari do gunjuran ŋa, waxatinu ma i ga jikkirankuti. I na butu katta Alla do i xayifaare Muusa yi. I na seron xayi dagana sonsolondi Kanaana jamaanen ŋa, ken ga ni « xattin do tamarileeman warallaqen » jamaanen ŋa. Jaman ga kanu ken su kanma nan bara roono jamaane ke yi, ma ken gaa ɲaana sababu yi Alla gaa yanganxatana na i laawandi do gunjuran ŋa tannaxate siine, kitaabe ke wa digaamunu ken su kanma.
Kitaabe ke taxandi sikkandin wa a wuttu soora tanpille do baanandin aayi tanpille do baanandin ŋa nan daga a wara soora tanjikke do tunmundin ŋa.
Kun gaa digaamunu fo be kanma, kun faayi : Banisirayilaganko da du ɲi Yaradefanŋe kinbakkan ŋa. I ga joofe Hamoorikaarankon jamaanen ŋa, i xenu kun ŋa na Sihoono do Wooga ni. Mowaaba tunkanyugon da Balaamu ɲaamari ti a na Banisirayilaganko langa, xa Balaamu da Alla ya terinka, nan duwa Banisirayilaganko da. Na i toxo Yaradefanŋe ken kinbakka yi ya ni xadi Banisirayilaganko ga yirige ta fillandin ŋa. Yuusawu xa sugandi non ya yi a nan sigi annabi Muusa batten ŋa. Alla saage sallun do sadaxon moxo koono Banisirayilaganko da ti Muusa faarannaaxun ŋa, i gaa telle taaxu jamaane ke xa be yi, a da a gingun koni i da.
Jaatun kitaaben digaamunu sero ya kanma, i kanunton ga ni, i jikkiranxosonto, i gaa yillene murutini Alla kanma, nan muruti annabi Muusa xa kanma, ken annabi Muusa be Alla ga da a sugandi kuudo a na Banisirayilaganko geesu. Alla kuŋa, laayidun tunkan ya ni. A da jama tanga na a koroosi do gunjuran ŋa. A da xeerin kini i jama ke yi, na niyen xa kini a yi i xonnon kanma. Annabi Balaamu ga da a ko moxo be nan ti :
Alla ga ma i be langa, nke xa na ken langana kan moxo ? Tunka Duumanten ga ma i be xajafi, nke xa na ken xajafini kan moxo ? Ko xa n katta Yaaxuba koren do a buqen jaatene ? Ken do Isirayila jaati gabe ? (23.8, 10a).
Xibaari xooro beenu gaa kitaabe ke noxo
Na a wutu soora fanan ŋa nan daga a wara soora naxatandin ŋa, ken digaamunu jaman jaatanden ya kanma.
Soora karagandi katta segundi, ken digaamunu sariyan sikkun ya kanma, a do Leewikaarankon sugandiye.
Soora kabundi katta tanmundin aayi tanmundi, ken digaamunu Pesaxansallen sallen ya kanma.
Soora tanmundin aayi tanmu do baanandi katta soora tanpille do baanandi, ken digaamunu jaman dageyen ya kanma teŋene ɲiiɲe ke be laayidun ga wuti i da.
Soora tanpille do fillandi katta tanjikke do fillandi, ken digaamunu Banisirayilaganko ɲanŋe Mowaaba ɲiiɲanbaayanmen ya kanma.
Soora tanjikke do sikkandin aayi fana katta aayi tannaxate do kabundi, ken digaamunu Banisirayilaganko forogoyen ya kanma gilli Misira jamaanen ŋa.
Soora tanjikke do sikkandin aayi tankaragandi katta soora tanjikke do tunmundi, ken digaamunu Alla ga da toŋondu beenu kini i yi ya kanma.