Tawureeta :
Sariya
Roraqe
Sariyan kitaaben noxon ŋa, Alla soni do sariyanun kininden Muusa yi, kuudo Muusa na i kiɲandi Banisirayilagankon ŋa. Leewikaara fonlaqen ya n sugandi sadaxakiɲandaano yi, ikun ɲa sariyadunkoonun ŋa, ken ya n sigi ke kitaabe ga xiri « Sariya ». Sero beenu gaa Alla gollen ŋa, kun nan xawa katini fo sennen do fo sobinten fatana me yi ya, fo siren do fo bure (10.10-11).
Sariyanu beenu gaa digaamunu munubatten xibaaren kanma, i gabun ya ni, i lasamanton xa ya ni. Ke kitaabe wa digaamunu sariyanu kanma, ku beenu gaa teŋene sadaxinden ŋa, na i fatanpansi, ken do allankuyu, kafiini diinan sallun ŋa. Ken do fo beenu yigeyen daganten ga ni, a fo beenu yigeyen ga ma daga. Sero beenu ra gaa teyeene allanbatten ŋa, a do sero beenu raga nta teyeene, a wa digaamunu kun xa kanma.
Kitaabe ke digaamen funuyonkin na Alla senontaaxun ya kanma, a do Banisirayilaganko ga n xawa bireene moxo be, kuudo na kapen tanga i do Banisirayila Alla sennen naxa.
Xibaari xooro beenu gaa kitaabe ke noxo
Na a wutu soora fana katta soora ɲerundin ŋa, ken digaamunu allankuyun do sadaxon ya kanma.
Na a wutu soora segundin ŋa katta soora tanmundin ŋa, ken digaamunu sadaxakiɲandaanon sugandiyen ya kanma.
Na a wutu soora tanmu do baanandin ŋa katta soora tanmu do karagandin ŋa, ken digaamunu fi sennun do fi sobinton ya kanma.
Soora tanmu do tunmundin digaamunu junuubuxafariyen ya kanma.
Na a wutu soora tanmu do ɲerundin ŋa katta soora tanpillen do fillandin ŋa, ken digaamunu Isirayila gan xawa senoono moxo ya kanma.
Na a wutu soora tanpille do sikkandin ŋa katta soora tanpille do karagandin ŋa, ken digaamunu Tuumayinkootan do sallinkooton ya kanma.
Alla ga da laayidu be do langanden kini Banisirayilagankon ŋa, soora tanpille do tunmundin digaamunu ken ya kanma.
Soora tanpille do ɲerundin noxon ŋa, Alla da sariyanu tana kini Banisirayilagankon ŋa.