[Genmanlenmaaxun tilliisen banbeye]
40
Tunka Duumanten daali Muusa da : 2 « Xasu fanan koota fana, an na allanbatika yiranman banba, genmanlenmaaxuntilliise. 3 An na seedaaxunwaxanden ro a wure, yirankutaaden falle. 4 An na taabalin riiti, na a yokkun ro a kanma, na fitillen riiti, na a kumisoomon ro a yi. 5 An na kansadaxanfutaadinbeelo ke taaxundi seedaaxunwaxanden jon ŋa. An na yiridon ro genmanlenmaaxuntilliisen raqen ŋa. 6 An nasadaxaxurumindifon taaxundi genmanlenmaaxuntilliisen raqen ŋa. 7 An na waate ke taaxundi genmanlenmaaxuntilliisen do sadaxaxurumindifon naxan ŋa, na jin ro a yi. 8 An na allanbatika yiranman yoorindaadun ro do a kaaron su yi, na fonlaqen yiridon ro a yi.9 « An na daarindite ke wutu na genmanlenmaaxuntilliisen do i yokkun su daari, kuudo i na seno. 10 An na sadaxaxurumindifo ke xa do i yokkun su daari, an na a sugandi, a na seno moxo siri. 11 An na waate ke xa do i taaxaaden daari, na a senondi. 12 An na Haaruna do i renmun sigindi genmanlenmaaxuntilliisen raqen ŋa, na i wanqi, 13 na yiran sugandinton ro Haaruna yi, an na a daari, na a senondi, kuudo a na sadaxindi in danŋa. 14 An na a renmun xa bagandi, an na i yiraamun ro i ya. 15 An na i yinmun daari xoyi i faaba moxo, kuudo i na ɲaŋi in da sadaxakiɲandaano yi, gelli iku, ma i renmun renmu. »
16 Muusa da gollen jopa. Tunka Duumanten ga da a ɲaamari ke be yi, a da ken yinme ya dabari.
17 I bakke Misira siina fillandin xasu fanan koota fana, allanbatika yiranman banbe. 18 Muusa da genmanlenmaaxuntilliisen banba na a sigaadun ro a yi, na i mangun sigindi, na a xepun ro a yi, na a tonton ro a yi. 19 A da jaxandigifate ke xufan banba genmanlenmaaxuntilliisen kanma, na liwongifate ke xufan xa banba kun kanma xo Tunka Duumanten ga da a ko Muusa da moxo be.
20 A da seedaaxunwallahon wutu na i ro waxanden noxon ŋa, na a wutaadun ro a kanma, na bipaaden ro a yi. 21 Muusa da waxanden ro genmanlenmaaxuntilliisen wure, na a muxundi yirankutaaden falle, xo Tunka Duumanten ga da a ɲaamari moxo be.
22 A da taabalin ro genmanlenmaaxuntilliisen wure, dingiran saahelin ŋa, yirankutaaden jon ŋa, 23 na sadaxanbuurunun ro a kanma Tunka Duumanten jon ŋa, xoyi a ga da a ɲaamari moxo be.
24 A da fitillen sigindi genmanlenmaaxuntilliisen wure taabalin kaane, dingiran kaara baanen ŋa, 25 na kumisoomon kumu Tunka Duumanten jon ŋa, xoyi a ga da Muusa ɲaamari moxo be yi.
26 A da kansadaxanfutaadinbeelon ro genmanlenmaaxuntilliisen wure, yirankutaaden jon ŋa, 27 na futaadun tiidindi xo Tunka Duumanten ga da a ɲaamari moxo be. 28 A da yiridon ro tilliisen raqen ŋa. 29 A ga da sadaxaxurumindifo ke ro genmanlenmaaxuntilliisen raqen ŋa, a da sadaxa xuruminten do sadaxa juruminten bagandi, xo Tunka Duumanten ga da a ko a da moxo be.
30 A da waaten taaxundi genmanlenmaaxuntilliisen do sadaxaxurumindifo ke naxa, na wanqijin ro a yi.
31 Muusa do Haaruna do i renmu, i da i kittun do i taanun wanqi. 32 I ga na ɲi roono genmanlenmaaxuntilliisen ŋa, a do i ga na ɲi telle sadaxaxurumindifon ŋa, i wanqiini ya xo Tunka Duumanten ga da i ɲaamari moxo be.
33 A da allanbatika yiranman beran yoorindaadun fana do genmanlenmaaxuntilliisen do sadaxaxurumindifon kaaron ŋa, na yiridon ro a raqen ŋa. Muusa da golle ke su tinmandi ke moxo yi.
34 Tabullen xufi genmanlenmaaxuntilliisen ŋa, Tunka Duumanten nooron da genmanlenmaaxuntilliisen faga. 35 Tunka Duumanten nooron da genmanlenmaaxuntilliisen loogo, tabullen wa a yi, Muusa ra ntaxa roono a wure.
36 Tabullen ga na giri allanbatika yiranman kanma bire su, Banisirayilaganko na janbandi katta i dingiranun ŋa fonne. 37 Tabulle ke ga ma daga, i xa nta dagana ma a ga na daga koota be, 38 baawo Tunka Duumanten tabullunman ya ni tilliise ke kanma kiyen ŋa. Banisirayilaganko ga na ɲi noqu su yi wuron xa yi, i yaaxen wa yinben ŋa.