[Sadaxakiɲandaanan yiraamu dabarinde]
39
I da baxa xaxacen do lankaran do fo dunbu xaxacen ɲa na golliɲanyiraamun dabari, kuudo nan xidime tilliisi sennen ŋa. I da tilliisi sennen beginun dabari Haaruna da xo moxo be Tunka Duumanten ga ɲaamarindi Muusa maxa.2 A da batibanjangaran dabari ti kangaaren ŋa, a do baxa xaxacen gaaren do lankaran do fo dunbu xaxace, a do sasi mirinta xote. 3 I da kanŋen katu na ɲa gaariyaaxa misen ŋa, na a kutu do baxa xaxacen noxon ŋa, a do lankaran do fo dunbu xaxacen do sasi, na a yaaxaranxarangolli. 4 I da kunku ku filli dabari, na yetaadun dabari i yinmun filli yi, na i tokki. 5 Naxaadusiitaade ke be gaa batibanjangara ke yi, i su golli moxo baane ya, a golli ti kanŋen ya yi, a do baxa xaxacen do lankaran do fo dunbu xaxace, ken do sasi mirinta xote, xo Tunka Duumanten ga da Muusa ɲaamari moxo be. 6 I da onkisingidu filli gemundi na i ɲegu xoyi xaatumundoronman moxo, na Banisirayilaganko toxonun ɲegu i kanma, na i yoori ti kanŋen ŋa. 7 A da kun ro batibanjangara ke kunkun kanma sinmegidu yi Banisirayilaganko da, xo moxo be Tunka Duumanten ga ɲaamarindi annabi Muusa maxa.
8 A da gijinlanŋen xa yaaxaranxarandabari, xo batibanjangara ke dabarimoxo ; kanŋen do baxa xaxace, a do lankaran do fo dunbu xaxace, do sasi mirinta xote. 9 I da gijinlanŋe ke danpi na a dabari jungunnaxaton ya yi, a danpinte ke sigen ni subure, a noxon ni subure. 10 I da a faga ti gidi kaananken ŋa, gidinkacu naxati. Kace ni degene dunben ya, a do yaaxuuti sawansawe, ken do jemuruudu, ken ni sapa fanan ŋa. 11 Kaci fillandi ke ni nefexen ya, a do yaaxuuti ŋelexu-ŋelexunte, luuluyi. 12 Sapa sikkandi ke, leseemun ya ni, a do sebo, do halaama. 13 Sapa naxatandin ni, toroosen ya, a do onkisi, do yesiibu, na kanŋen maxanyettun fana i ya. 14 Banisirayilaganko toxonun tanmi do fillo ya ɲegunton faayi i kanma, fonlaqu ku tanmi do fillo, sere su toxon wa baane yi xo xaatumundoronma.
15 I da kan hooren surunmen liika gijinlanŋe ke da, xo kacen gaa liikene moxo be. 16 I da kangeresaadu filli dabari, a do kantaru filli. I da kantaru ku filli ro gijinlanŋe ke kanpon filli yi. 17 I da kanŋe ke surunmun filli ro godongodo ku yi gijinlanŋe ke kanpon ŋa. 18 I da surunmu ku filli ro geresaadu ku filli yi batibanjangara ke kaane yi kunkun banŋe. 19 I da kangodongodon filli dabari, na i ro batibanjangara ke kanpon filli yi a kanbo be gaa gijinlanŋe ke kaaran ŋa ti banburen ŋa. 20 I da kanŋen godongodo filli dabari, na i ro batibanjangara ke kunkun filli yi wureedun ŋa a kaane yi, yettun kaaran ŋa batibanjangara ke naxaadusiitaaden kanma. 21 I da batibanjangara ke godongodon do gijinlanŋe ke godongodon taaxu me yi ti baxa xaxacen kacun ŋa, kuudo a n ɲa batibanjangara ke kanma yi, xo Tunka Duumanten ga da annabi Muusa ɲaamari moxo be. Ken moxo yi, gijinlanŋe ke dusiitaaden ntaxa duusene gilli a kanma.
22 Ganduura be gaa roono batibanjangaran wure, a da a yaaxaranxarandabari ti baxa xaxacen duuron ŋa, 23 ganduura ke xannen yoorindan su na xo faten ya, a nta booxeene. 24 I da duyittirenmun dabari do ganduura ke ɲuuɲun yoorindan su yi ti baxa xaxacen do lankaran do fo dunbu xaxacen ŋa, a do sasi mulle, i mirinto ga ni. 25 I da kan hooren gulanŋun dabari, na gulanŋu ku ro do ganduura ke ɲuuɲun yoorindan ŋa walaxiini duyittirenmu ku noxon ŋa ganduura ke ɲuuɲun ŋa. 26 Ganduura ke ɲuuɲun yoorinda : gulanfunse, yittirenme, gulanfunse, yittirenme, xo Tunka Duumanten ga da annabi Muusa ɲaamari moxo be.
27 I da sasinsabudooron miri Haaruna do i renmun da, na a dabari. 28 Yinfanaaro ke ni sasin ya, kufunen ni sasin ya, wunon ni sasin ya, i mirinto ga ni. 29 Naxaadusiitaaden ni sasi mirinta xoten ya, ken do baxa xaxacen do lankaran do fo dunbu xaxace, na a yaaxaranxarangolli xo Tunka Duumanten ga ɲaamarindi Muusa maxa moxo be. 30 I da kan hooren nafaadi sennen dabari. I da a ɲegu na safandun safa a kanma xo xaatumundoronman moxo, nan ti : « Senontaaxun wa Tunka Duumanten da. » 31 I da baxa xaxacen kacun ro a yi, kuudo na a siiti yinfanaaro ke kanma xo Tunka Duumanten ga da annabi Muusa ɲaamari moxo be.
[Gollun tinmeye]
32 Allanbatika yiranman do genmanlenmaaxuntilliisen gollen su ɲeme ke moxo ya. Banisirayilaganko ro gollen ŋa. I da a dabari xoyi Tunka Duumanten ga da Muusa ɲaamari moxo be yinme ya yi. 33 I do allanbatika yiranma ke daga katta Muusa ya yi : genmanlenmaaxuntilliisen do i yokku, a geresaadu, a tonto, a xepu, a tonton do i sigaadu, 34 jaxandigifata dunbunten xufan, liwongifata mosinten xufa, a do yirankutaade, 35 seedaaxunwaxanden do i wutaadun do i bipaade, 36 taabalin do i yokkun su, kafiini sadaxanbuuru, 37 kan hooren fitillen do i kumisoomo, a do i yokkun su do i kumiteenu, 38 kansadaxanfutaadinbeelo, daarinditen do futaadu, kafiini tilliisen fonlaqinyirido, 39 sadaxaxurumindifo jaxawallinman do i tiyibiyimexe, a wutaadun do a yokkun su, waaten do i taaxaade, 40 allanbatikan baran yoorindaadun do i tonton do i sigaadu, a fonlaqinyirido, a kacu, a tontaadu, a do a golliɲanyokkun su, kafiini genmanlenmaaxuntilliisen yokkun su, 41 allanbatika yiranman golliɲaŋaanon yiraamu, Haaruna sadaxakiɲandi yiraamun do a renmun gaa yiraamu be rondini, i ga na ɲi sadaxindini.