[Sadaxaxurumindifon dabarinde]
38
A da sadaxaxurumindifon dabari ti saayinsollen ŋa, a tan ni sogone karago, a noxon ni sogone karago, jungunnaxaton ya ni, a taaxunten ni sogone sikko. 2 A da a bennun naxati dabari a jungunu ku naxati yi. A do i bennu ku gosaasinton ni ti jaxawallen ya. 3 A da sadaxaxurumindifon yokken su dabari : beelunu, peelunu, waatu, tiyinjaabo, a do yinbiwutifoonu. A da a yokken su dabari ti jaxawallen ya. 4 A da tiyibiyimexen dabari do sadaxaxurumindifo ke kaaron ŋa xo jaxawallinjalan dabarimoxo, gelli a wureedun ŋa ma a xoodo. 5 A da godongodo naxati taga tiyibiyimexe ke jungunun naxati yi, kuudo na berenberun ro i ya, na a wutu. 6 A da saayinsollen berenberu filli dabari, na i gosaasi ti jaxawallen ŋa. 7 A da berenberu ku filli soli godongodo ku yi sadaxaxurumindifo ke kaaron ŋa, kuudo na a wutu ti i ya. A da a dabari ti mangen ya, noxon wa a yi.8 A da jaxawallinwanqiwaaten dabari, na a jaxawallintaaxaaden dabari, ken do girinanxennaana yaxarun dunŋaru, ku beenu gaa girinanxenne allanbatika yiranman raqen ŋa.
[Allanbatika yiranman yoorindaadu dabarinde]
9 A da yoorindaadun dabari banboxunkitten ŋa tayinbanŋe, ken ga ni sasi mirinta xoten yoorindaadun ŋa, kame sogone. 10 Tonton ni tanpille, sigaadun ni tanpille, jaxawallen ya ni. A tonto ku godongodon do i geresaadun ni xaalisixullen ya. 11 Saahelin saxabanŋen ni kame sogone ya. A tonton ni tanpille, i sigaadun ni tanpille, jaxawallen ya ni. A godongodon do a geresaadun ni xaalisixullen ya. 12 Kinxennan saxabanŋe, kirun ni tankarage sogone ya. A tonton ni tanmu, a sigaadun ni tanmu, a tonto ku godongodon do i geresaadun ni xaalisixullen ya. 13 A saxabanŋe be gaa kinbakkan ŋa kiyen bogura, tankarage sogone. 14 Kiru ku ni sogone tanmu do karago ya kaara su yi, a do i tonton sikki do i sigaadun sikki. 15 Kaara fillandi ke yi, gelli fonlaqen ke kaara yi ma ken kaara, a yoorinda ke, kiren ni sogone tanmu do karago ya, i tonton ni sikko, i sigaadun ni sikko. 16 Yoorinda ke kiren su ni sasi mirinta xoten ya yi do a kaaron ŋa. 17 Tonto ku sigaadun ni jaxawallen ya. Tonto ku godongodon do i geresaadun ni xaalisixullen ya. I yinmun gosaasinton ya ni ti xaalisixullen ŋa. Yoorinda ke tonten su xepunten ya ni. 18 Roraqe ke yoorindan yiridon sufanten ya ni, a garan dabarinten ya ni ti baxa xaxacen ŋa, a do lankaran do fo dunbu xaxace, ken do sasi mirinta xote, a sigen ni tanpille sogone, a tefetoyen ni sogono karagi xoyi yoorindan kirun meenu. 19 I tonton ni naxato, i sigaadun ni naxato, jaxawallen ya ni. I godongodon ni xaalisixullen ya. I yinmun do i godongodon gosaasinton ya ni ti xaalisixullen ŋa. 20 Allanbatika yiranma ke kaaron yoorindan do a yoorindaadun tontaaden su ni jaxawallen ya.
[Tagandisurumaadun jaatande]
21 Ke ya ni gemmanlenmaaxun tilliise ke musaqan ŋa, ken ga ni seedaaxun tilliise be ga ɲa ti annabi Muusa ɲaamariyen ŋa, Leewikaarankon ga da a gollen golli ti Yittimaara sooxen ŋa, ken ga ni sadaxakiɲandaana Haaruna renmen ŋa. 22 Tunka Duumanten ga da annabi Muusa ɲaamari ti fo wo fo yi, Becaleeli da ken dabari, Huura renme, Wuuri xa renmen ni ken Huura yi, yehuudakaaranken ya ni. 23 Hayisamaaxi renme Holiyaabu wa do a batten ŋa, ken ni Daanikaaranken ya. Aken ni yaaxaranxaren ya, gidiɲeguye, natalinde, gararonde, a do sufande ; a baxa xaxacen do a lankaran do fo dunbu xaxace, ken do sasinyiraame, kun golliɲaŋaana xoore ya ni.
24 Kanŋe be su ga ro golle ke yi, dingira sennen gollen danman su, a su ni kan kuyinten ya. Tanpille do wujuunu tunmi a do kamo ɲeri do tanjikke menqalle (26 730), dingira sennen godoxullen xiiman ŋa. 25 Xaalisixulle be haqen ga muuri jama ke jaatanden ŋa, wujuunu tanmi do segu do godoxullu tanmi (18 010), dingira sennen godoxullen xiiman ŋa. 26 Seri yinme su godoxullu baane taxandi tanmu, dingira sennen godoxullen xiiman ŋa, ken ni i dubaananbe su ya yi, na a wuti tanpille siine yi segene, i kamo ku tunmi wujuunen do wujuunu ku sikki do kamon karagi do tankaragen (603 550) haadamarenme. 27 Wujuunu tanmi do ɲeru (17 000) godoxulle ya n ɲa dingira sennen tontonsigaadun ŋa, a do yirankutaaden tontonsigaadu. Kame tontonsigaade, wujuunu tanmi do ɲeri (17 000) godoxulle, sigaade su ni kame do tanɲere godoxulle ya. 28 Wujuune do godoxullu tanmi do baane (1 011), a da tonton tontaadun do geresaadun dabari ti kun ya yi, na i yinmun gosaasi, na i tokki me yi. 29 Jaxawalli kuyinten gemu wujuunu filli do kame do tanpille do kilonu naxati (2 124) ya. 30 A da gemmanlenmaaxun tilliise roraqen sigaadun dabari ti a yi, a do sadaxaxurumindifo ke do tiyibiyimexe be gaa a yi, ken do sadaxaxurumindifo ke yokken su, 31 a do yoorindan tontonsigaadu, a do yoorindan raqen tontonsigaadu, a do gemmanlenmaaxun tilliise ke tontaaden su, kafiini yoorindan tontaadun su yi do a kaaron ŋa.