[Sadaxindinoqu]
27
« An na sadaxindinoqu dabari ti saayinsollen ŋa, a tan giiloye, sogone karago. A tefetoye, sogone karago. A sige, sogone sikko. A ɲaana jungunnaxaton ya. 2 An na dubennun dabari jungunu ku naxati yi, na a gosaasi ti jaxawallen ŋa. 3 An na a ginon dabari kuudo na xamen xooro, a peelunu, a waatu, a do a tiyinjaabo, do a yinbiwutifoonu. A yokke ke su, an na a dabarini ti jaxawallen ya. 4 An na tiyibiyimexen dabari ti jaxawallen ŋa, a jalanma. An na jaxawallingodongodo naxati ro a jungunu ku naxati yi. 5 An na a ro sadaxindinoqu ke saxabanŋen di wureedun ŋa. A na gemu xurusindira ke xoodon ŋa, kanmura. 6 An na berenberu dabari sadaxindinoqu ke da, saayinberenberu, an na i gosaasi ti jaxawallen ŋa. 7 An na berenberu ku filli ro godongodo ku yi sadaxindinoqu ke kaaron ŋa a ga na ɲi wutiini. 8 An na a dabarini ti mangen ya, na a jufondi, xoyi a ga koyi an ŋa giden kanma moxo be, a ɲaana ken moxo ya.[Allanbatikan bera]
9 « An wa allanbatika ke yoorindan dabarini. Banboxun ŋa tayinbanŋe, non tan giiloyen ni kame sogone ya. A kiren ni sasi mirinten ya. 10 A tonton ni tanpille, a sigaadun ni tanpille, jaxawallen ya ni. Tonto ku godongodon do i geresaadun ni xaalisixullen ya. 11 Ken ya ni saahelin banŋen xa yi, kirun giiloye kame sogone, a tonto tanpille, a sigaadun ni tanpille, jaxawallen ya ni. Tonto ku geresaadun do i godongodon ni xaalisixullen ya. 12 Yoorinda ke tefetoyen wa genme tankarage sogone yi ti kinxennan banŋe. A tonton ni tanmu, a sigaadun ni tanmu. 13 Yoorinda ke tefetoye, kiyen yingiran ŋa kinbakka, tankarage sogone ya ni. 14 Sogone tanmu do karago nan ɲa raqun do me naxa kaaron ŋa. I tonton ni sikko, i sigaadun xa ni sikko. 15 Kaara fillandin xa, sogone tanmu do karago. I tonton ni sikko, i sigaadun ni sikko. 16 Yoorinda ke roraqe, tanpille sogone, sasinkiri baxa xaxaci mirinten do lankara, a do fo dunbu xaxace. Yaaxaranxaren na i golli. A tonton ni naxato, a sigaadu ni naxato. 17 Tonte su gaa do yoorinda ke kaaron ŋa, a do i godongodo, xaalisixullen ya ni, a sigaadun ni jaxawalle. 18 Yoorinda ke tan ni kame sogone ya, a noxon ni tankarage sogone ti tankarage sogone. A sigen xa ni sogone karago. Sasi mirinten ya ni, a sigaadun ni jaxawallen ya. 19 Dingira ke yokken su gollen kafumante, a tontaadun su, kafiini a yoorinda ke tonton su, jaxawallen ya ni.
[Sadaxakiɲandaanon siga]
20 « Anken kuŋa, an na Banisirayilaganko ɲaamari, i na jayituunanten riiti katta an ŋa, a tetunten senne, kuudo fitillun na toxo kumiini. 21 Haaruna do i renmun wa sikki ti fitillun kumunden ŋa Tunka Duumanten jon me naxa yirankutaade sellan ŋa seedaaxunwaxanden teŋo genmanlenmaaxuntilliisen noxon di, gelli futuro ma suxuba. Ken ni i bonsonŋun abadanfarilan ya Banisirayilaganko da.