Bakke 28

[Sadaxakiɲandaananyinmanken rondindiyiraamu]

« Anken kuŋa, an na an waaxi tinkondi an du yi, kafiini a renmun ŋa bakka Banisirayilaganko me naxa, kuudo aken Haaruna nan sadaxindi in danŋa, a do Nadaabu, do Habiiyu do Laajaari, a do Yitimaara, a renmu ku. 2 An na yiran sennun dabari an waaxi Haaruna da, darontaaxun do kallankaaxun da. 3 An na digaamu sondontuwaana su danŋa, ku beenu in ga da i yonkinun faga tuwaaxun ŋa, i na Haaruna yiraamun dabari, kuudo a na sugandi ti sadaxakiɲanden ŋa in danŋa. 4 Ku ya ni i gaa yiraamu beenu dabarini : gijinlanŋe, , ganduura, sabudooro sufante, yinfanaaro, a do kirinnaxaadusiitaade. I na yiran sennu dabari an waaxi Haaruna do i renmun da, kuudo i na sadaxakiɲandi in danŋa. 5 I na kangaaren wutu, a do baxa xaxace, do lankaran do fo dunbu xaxace, a do sasi.

6 « I na kangaaren batibanjangaran dabari miran xoore maxa ti baxa xaxacen ŋa, a do lankaran do fo dunbu xaxace, a do sasi mirinta xote. 7 Kunkudunkacun na tokki me yi do kanbo ku filli yi yanqana. 8 Batibanjangara ke naxaadusiitaaden be gaa a kanma yi, a dabarini kafiini a yi ya xoyi a moxo. A dabarini ti kangaaren ya, do gaari baxa xaxace, do lankara a do fo dunbu xaxace, kafiini sasi mirinta xoten ŋa. 9 An na onkisingidu filli wutu, na Isirayila renmun toxonun safa i kanma. 10 I toxonu tunmi na ɲa gidi baanen kanma, toxo kuttu ku tunmi xa na ɲa gidi fillandin kanma, ti i ga n xasa me yi moxo be yi. 11 Yaaxaranxaren gaa xaatumundoronman ɲegunu moxo be, an na Isirayila renmu ku toxonun ɲegunu gidu ku filli kanma ken ɲegundimoxo ya. An na kanŋen ya gollini na i yoori ti a yi. 12 An na gidu ku filli ro batibanjangara ke kunkun ŋa. Gidu ku, sinmaado ya ni Isirayila renmun da. Haaruna do i toxonu ku na toxo hadarini i kunku ku filli kanma yi jon me naxa, kuudo nan sinmandindi. 13 An na kanŋen geresaadun dabari, 14 a do kan hooren surunmu filli, an na i kaciliikana ya, xo kacikataanan gaa a dabarini moxo be. An na surun mirinto ku ro geresaadu ku yi.

15 « An na kiitigijinlanŋe dabari, an na a yaaxaranxarangollini ya xo batibanjangara ke moxo. An na a dabarini ti kangaaren ya, na gaari baxa xaxacen do lankaran do fo dunbu xaxacen dabari a yi, a do sasi mirinta xote. 16 A ɲaana jungunnaxaton ya, na a dunfilla, a sigen ni subure, a noxon ni subure. 17 An na a jago ti gidinteremendu naxati. Teremendi fana : degene dunbe, a do yaaxuuti sawansawe, do jemuruudu. 18 Teremendi fillandi ke ni nefexen ya, a do yaaxuuti ŋelexu-ŋelexunte, do luuluyi. 19 Teremendi sikkandi ke, leseemun ya ni, a do sebon do halaama. 20 Teremendi naxatandin ni toroosen ya, a do onkisi do yesiibu, i xunbuusini kankurumen ya noxo. 21 Gidu ku ɲaana Isirayila renmun toxonun ya yi, i toxonun tanmi do fillon ɲegunton gaa xo xaatumundoronma. Fonlaqu ku tanmi do fillo, be su do i toxo.

22 « An na kan hooren surunmen liika gijinlanŋe ke da, xo kacen gaa liikeene moxo be. 23 An na kantaru filli dabari gijinlanŋe ke yi, an na kantaru ku filli ro gijinlanŋe ke kanpon filli yi. 24 An na kansurunmu ku filli ro godongodo ku filli yi gijinlanŋe ke kanpon ŋa. 25 An na surunmu ku yinbaanun filli ro geresaadu ku filli yi, na i ro batibanjangara ke kunkun ŋa ti a kaane banŋe. 26 An wa kangodongodo filli dabarini, na i wara batibanjangara ke kanpon filli yi gijinlanŋe ke kaaran ŋa, ti banburen ŋa. 27 An na kangodongodo filli dabari, na i ro batibanjangara ke kunkun filli wureedun ŋa yettun kaaran ŋa kaane banŋe yi, naxaadusiitaaden kanma. 28 I na batibanjangara ke godongodon do gijinlanŋe ke godongodon taaxu me yi ti baxa xaxacen kacun ŋa, kuudo a n ɲa batibanjangara ke kanma yi. Ken moxo yi, gijinlanŋe ke duusiitaaden ntaxa duusene gilli a kanma.

29 « Haaruna ga na ɲi roono dingira senne ke yi, a na Isirayila renmu ku toxonun ro kiitigijinlanŋe ke yi i gijinmen ŋa, kuudo a na ɲa abadansinmandaade yi Tunka Duumanten jon me naxan ŋa. 30 An na Wuriimu do Tumiimu ro kiitigijinlanŋe ke jiiban ŋa, i na ɲa Haaruna gijinmen ŋa a daganten bire Tunka Duumanten jon me naxa. Haaruna na Banisirayilaganko kiiten raga i sondomen ŋa Tunka Duumanten jon me naxan ŋa abada.

31 « Ganduura be gaa roono batibanjangaran wure, an na a dabari ti baxa xaxacen duuron ŋa. 32 Xannen nan ɲi a yi kanmun ŋa. Xanne ke kanbon na konbe ti kirinlenmen ŋa, xo dorokoxanne, ken na sigi a ga nta booxeene. 33 An na dabari do a ɲuuɲun ŋa ti baxa xaxacen ŋa, kafiini kangulanŋun ŋa walaxiini i naxa, a ɲuuɲu ku yoorindan su yi, a do lankara, do fo dunbu xaxace. 34 Yittirenme, kangulanfunse, yittirenme, kangulanfunse, i wa yoorini do ganduura ke kanpon ŋa. 35 A na ɲa Haaruna yi bire be a nda ɲi xidimeene, a do na a royinten xannen mugu katta dingira sennen ŋa Tunka Duumanten jon me naxa, kuudo a n maxa kara.

36 « An na kan hooren nafaaden dabari. An na a ɲegu na safandun safa a kanma xo xaatumundoronman moxo, nan ti : “ Senontaaxun wa Tunka Duumanten da. ” 37 An na a ro gaari baxanma xaxacen kanma yinfanaaro ke kanma yi. A ɲaana yinfanaaro ke taŋon ya yi. 38 A ɲaana Haaruna taŋen kanma ya. Haaruna na sigi ti garamajigingolle be gaa kiteene ti sadaxa sennu ku beenu su Banisirayilaganko gaa i sadaxini. A na ɲaŋi a taŋen ŋa waxati su, kuudo sadaxo ku na rage Tunka Duumanten jon me naxa. 39 An na sasinsabudooro ke miri, an na sasinyinfanaaro dabari, a do kirinnaxaadusiitaade, an na a dabari xo sufandansiren moxo.

[Sadaxakiɲandaanon yiraamu]

40 « Haaruna renmu ku darontaaxun do i kallankaaxun da, an na sabudooron dabari i da, a do kirinnaxaadusiitaadu, do yinfanaaronu. 41 An na Haaruna feetufata ti i ya, an waaxi ke, kafiini a renmun ŋa. An na i daari. An na fiinun ro i kittun ŋa, na i senondi, kuudo i n sadaxakiɲandi in danŋa. 42 An na sasinwunonu dabari i da, kuudo na i lawuranun suturi, ken gaa gilli gelli ŋunanyettun ŋa ma toge. 43 Wunonu ku na ɲa Haaruna do i renmu ku yi i royinton ŋa gemmanlenmaaxun tilliisen ŋa, walla i nda ɲi tinkoono ke yi kuudo nan golli dingira senne ke yi. Ken ni ya, kuudo Haaruna do i renmu ku n maxa daga garamajigingollun likken wutu, i gaa kalla. Ke ni i abadanfarilan ya.