[Haaruna do i renmun senondinde]
29
« Fon faayi ke, an gaa a ɲaana Haaruna do i renmun danŋa kuudo na i senondi, i nan xidime inke da. An na nanlenme raga, gunbo ga ni, a do jaxandigu filli, leebu gaa nta i ya, 2 a do buuru lewiirintanŋe, a do takkula xaye, ken ga ni takkula lewiirintanŋe, na a ro ten ŋa, a do furufuru xaye, ken ga ni furufuru lewiirintanŋe, na a suusa ti ten ŋa. An na i dabarini ti alikaaman ya yi. 3 An na i ro kanda baane yi, na i toxo kande ke noxo, an na i do gunbunlenme ke do jaxandigu ku filli deni.4 « Haaruna do i renmu ku kuŋa, an na i tinkondi genmanlenmaaxuntilliisen raqen ŋa, an na i wanqi ti jin ŋa. 5 An na beginu ku wutu, na sasinsabudooro soxonten do ganduuran do batibanjangaran do kiitigijinlanŋen rondi Haaruna yi, na i faada ti batibanjangara ke kirinnaxaadusiitaaden ŋa. 6 An na yinfanaaron ro a yinmen ŋa, na nafaadi sennen ro yinfanaaro ke kanma. 7 An na daarinditen wutu, na a joxi a yinmen ŋa na a daari. 8 An na a renmu ku tinkondi, na sabudooronun ro i ya. 9 An na Haaruna do i renmu ku maxanyetu ti kirinnaxaadusiitaaden ŋa. An na yinfanaaron ro i ya. Sadaxakiɲanden na ɲaŋi i taqen ŋa ma abada. Siganun na ro Haaruna do i renmun kittun ŋa.
10 « An na gunbo ke tinkondi genmanlenmaaxuntilliisen raqen ŋa, Haaruna do i renmu ku na i kittun saxu gunbo ke yinmen ŋa. 11 An na gunbo ke xurusi Tunka Duumanten jon me naxa genmanlenmaaxuntilliise ke raqen ŋa. 12 An na gunbo ke foron wutu, na i ro sadaxindinoqu ke bennun ŋa ti an doronmen ŋa. Foro ku kuttun danmon su, an na i joxi sadaxindinoqu ke wureedun ŋa. 13 An na kateye be su gaa faneene do nuxudufoonun ŋa wutu, a do buttunfaara, a do faridinlenmun filli, kafiini kateye be gaa i kanma, an na i buyi sadaxindinoqu ke yi. 14 Gunbunlenme ke tiyen kuŋa, a do a fate, a kuuse, an na yinben ɲa na i buyi daaxan falle, futuxiyinsadaxan ya ni. 15 Jaxandigi baane ke, an na a raga, Haaruna do i renmun na i kittun saxu jaxandige ke yinmen ŋa. 16 An na a xurusi, na a foron raga, an na i sanpa do sadaxindinoqu ke yoorindan su yi a kanma yi. 17 Jaxandige ke, an na a kutu i kutimoxon ŋa, an na a nuxudufoonun wanqi, a do a korobinso, an na i saxundi a kutiyu ku do a yinme ke kanma. 18 An na jaxandige ke danman su xurumindisadaxaxurumindifonŋa, sadaxa xuruminten ya ni, yinbidunsadaxan ya ni, timi liŋen ya ni Tunka Duumanten da.
19 « An na jaxandigi fillandi ke xa raga, Haaruna do i renmun na i kittun saxu jaxe ke yinmen ŋa, 20 an na a xurusi, na a foron wutu, na i ro Haaruna tarunlenbi tayen do a renmun tarunlenbi tayun ŋa, a do i kittindoron yugun tayun do i tandoron yugu tayun ŋa. An na foron sanpa do sadaxindinoqun yoorindan ŋa. 21 An na foro ku be gaa sadaxindinoqun kanma yi yogo wutu, a do daarindite ke, an na i sanpa do Haaruna do i yiraamun ŋa, na i sanpa do a renmu ku xa do i yiraamun ŋa kafiini a yi. Ken moxo yi, a na seno, aken do i yiraamu na seno, a do a renmun do i yiraamu, kafiini a yi.
22 « An na kateyen wutu bakka jaxe ke yi : a xoqe, do kateye be gaa do nuxudufoonun ŋa, buttunfaara, faridinlenmu, do kateye be gaa i kanma, ken do togo taye, baawo moxogemunden ya ni ke. 23 An na buuruyin baane wutu bakka buuru lewiirintanŋe ke kande be gaa Tunka Duumanten jon me naxa, a do takkula yin baane, do furufuru yin baane. 24 An na i saxundi Haaruna sooxen ŋa, a do a renmun sooxun ŋa, an na kuye ke yigi-yigi Tunka Duumanten jon me naxa ti yigi-yiginde yi. 25 Saage an na i wutu bakka i sooxun ŋa, an na i xurumi sadaxaxurumindifo ke kanma. Yinbidunsadaxan ya ni, timiliŋen ya ni Tunka Duumanten da. 26 An na Haaruna moxogemundidige ke gijinmen wutu na a yigi-yigi Tunka Duumanten jon me naxa, ken na ɲaŋi an da taqe yi. 27 An na gijin yigi-yiginte ke senondi in da, a do toge ke be ga wuti bakka a yi Haaruna do i renmun moxogemunden gollun da. 28 Ken wa ɲaana abadanfarila yi Haaruna do i renmun da gelli Banisirayilaganko yi, baawo taqe ya ni, ken gaa bakka Banisirayilaganko allatiigeyinsadaxon ŋa, a gaa ɲaana taqe yi Tunka Duumanten da.
29 « Haaruna falle, a yiran sennu ku wa ɲaana a renmun da, bire be i nda ɲi daarini, a do i ga na ɲi i siganun roono i kittun ŋa. 30 Sadaxakiɲandaana be nda sigi a batten ŋa gelli a renmu ku yi, ken gaa saagene roono genmanlenmaaxuntilliisen ŋa kuudo nan xidime tilliisi senne ke yi, a na yiraamu ku rondi bito ɲeri.
31 « Toorindijaxandige ke kuŋa, an na a wutu, na a tiyen soro dingira senne yi, 32 Haaruna do i renmun na jaxe ke tiyen yiga, a do buuru ke be gaa kanden di genmanlenmaaxuntilliisen raqen ŋa. 33 I wa a yigana kafaara yi, i toorinden da, baawo senondaaden ya ni. Seranmalla ken ken nta a yigana, baawo fo sugandinten ya ni. 34 Ayiwa fo toxinte gelli moxogemunditiye ke yi gelli buuru ke yi [nan wuyi] ma suxuba, an na yinben ɲa na ken fo toxinte xurumi. A ntaxa yigeene, baawo a sugandinten ya ni. 35 N ga da an ɲaamari moxo ke be yinme yi de, an na ken saanan ya ɲaana Haaruna do i renmun da, bito ɲeri, na i sigan ro i kittun ŋa.
[Sadaxindinoqun senondinde]
36 « An wa gunbo moxo gemundini na futuxiyinsadaxan dabari koota su yi i junuubunun xanne maxa. An na alikafaaransadaxa ɲa sadaxindinoqu ke danŋa bire be an ga na ɲi alikafaarabaganden ŋa a kanma. An na a daari kuudo a n seno. 37 An wa alikafaarabagandini sadaxindinoqu ke kanma yi bito ɲeri, an na a senondi, sadaxindinoqu ke na ɲa fo sennun fo sennen ŋa, fo wo fo ga na kati sadaxindinoqu ke yi, ken wa senoono.
[Kootan sadaxa]
38 « Fon faayi an gaa ke be sadaxini sadaxindinoqu ke kanma yi abada : koota su, siinibaananjaxanlenmu filli. 39 Jaxanlen baane ke, an na a dabarini suxuban ya. Jaxanlen fillandi ke, an na a dabarini katta wuron ya. 40 An wa muude¤ fari do liitara do taxande te bollinte ɲaxamini, a do liitara do taxande reesendolo, na i sadaxi kafiini jaxanlen baane ke yi. 41 Jaxanlen fillandi ke, an na a dabarini katta wuron ya, xo suxuba ke sadaxan moxo. An na kun sadaxo me ya dabarini ke xa da. Yanpeyinsadaxan ya ni, timi liŋen ya ni Tunka Duumanten da. 42 Ke sadaxa xuruminte ni abada ya axa bonsonŋun su da, genmanlenmaaxuntilliisen raqen ŋa, Tunka Duumanten jon me naxa, noqu ke be in gaa an genmanlenmaaxunu kuudo nan digaamu an da. 43 N na Banisirayilaganko laayidunlenmaaxunu ken dingira ya yi ti in kallankaaxun ŋa.
44 « N wa genmanlenmaaxuntilliise ke senondini, a do sadaxindinoqu, a do Haaruna do i renmu, kuudo i na xidime in da sadaxakiɲanden ŋa. 45 N na hadari Banisirayilaganko naxa. N na ɲaŋi i da kamane yi. 46 I na a tu nan ti inke ya ni Tunka Duumanten ŋa, i Alla, n ga da i bagandi Misira ɲiiɲen ŋa, kuudo in nan hadari i noxon ŋa. Inke ya ni Tunka Duumante, i Alla.