Tawureeta :
Jopaye
Roraqe
Jopayen ni Alla ga da fiinun su jopa moxo be ya. Fiinun ga jope moxo be, ke kitaabe sefene ken ya kanma : kanmun do ɲiiɲen tageye, haadamarenmun buruju, a do Alla komo sugandinto. Yangoburugumaaxun xa do tooran ga ri duna yi moxo be, a wa ken xa moxon koono o da. Alla bara fo buren ŋa. Haadamarenmun gaa tinkono a yi moxo be, a ramuuriyen ni ken ya.
Jopayen kitaaben taxandinten ni fillo ya. Taxandi fana ke noxon ŋa, na a wutu soora fana katta soora tanmu do baanandin ŋa, Alla da duna taga, na daaban do haadama taga. Alla tagandu ku siro ; ken do i moxo su, Yunma Hawa do Baaba Haadama da Alla kuta. Haadamarenmun toxo buroono keeta. Ken ya n sigi Alla ga kande na duna buruxa ti ŋaamen ŋa. Nuuha do I renmun ga fe, ɲiiɲen kanma fo yonkinten su halaki. Ken xadi, seron gabo nan jiidi, na ɲiiɲen kanma faga, xa I fo gabe nta Alla batta.
Kitaabe ke kutte, na a wutu soora tanmu do fillandin ŋa nan daga a wara soora tankaragendin ŋa, ken sefene Banisirayilaganko burujun ya kanma. I seri fana, ken ga ni Ibirahiima yi, a allankannen do a liimaanagankaaxun bange. Alla da a sugandi ti ken ya yi na a ɲa allanbattaanon seri fanan ŋa. Alla da laayidun wutu Ibirahiima da nan ti i wa duna muuman su barekindini ti a bonsonŋen ŋa. Ibirahiima xibaaren dangi falle, a renme Isiyaaxa xibaaren ya n riini, a do a kisimare Yaaxuba, I gaa tini a da Isirayila. Ken falle ya ni Yaaxuba renmun tanmi do fillon ga ɲa Banisirayila xabiilanun tanmi do fillon ŋa.
Kitaabe ke lagaren ŋa, Yaaxuba renmun ɲa Misira yi. Yaaxuba renme Yuusufu ɲa yinmanka xoore yi Misira jamaanen ŋa. Ken saabu da hari dullun ga kutundi Misira jamaanen ŋa, fo wo fo ma konto ikun kaadunkon ŋa. Yaaxuba faati. Yuusufu xa xaso. A ti i kaadunkon da :
N faati waxatin ntaxa laatu, xa, Alla wa riini axa faabandi, na axa bagandi Misira, na axa geesu dagana jamaane be, a ga da a laayidun wutu Ibirahiima do Isiyaaxa do Yaaxuba da (50.24).
Fi xooro beenu xibaaren gaa ke kitaabe noxo
Soora fana katta filla, ken digaamunu kanmun do ɲiiɲen do I nuxudufoonun taganden ya kanma, a do haadamarenmen tagemoxo.
Soora sikka, ken digaamunu yangoburugumaaxun do tooran ga ro duna yi moxo be ya.
Soora naxata katta karagi, ken digaamunu Haadama xiisan ya kanma nan daga a wara Nuuha yi.
Soora tunmu katta kabu, ken digaamunu Nuuha ŋaamen xibaaren ya kanma.
Soora tanmu katta tanmu do baane, ken ni Baabila soorooron taganden xibaaren ya.
Soora tanmu do filla katta tanjikke do karago, ken ni Ibirahiima do Isiyaaxa do Yaaxuba xibaaren ya.
Soora tanjikke, ken digaamunu Yesaawu bonsonŋun ya kanma.
Soora tanjikke do ɲeru katta tankarage, ken ni Yuusufu do I waaxinun xiisan ya.