Tawureeta kitaabi fillandi
a toxon ga ni
Bakke
Roraqe
Ke kitaabe sefene Banisirayilaganko bakken xibaaren ya kanma yi Misira jamaanen ŋa, ken ya n sigi kitaabe ke ga toxore « Bakke ».
Ke kitaabe ra wa taxandini taxandi xooro sikki yi : Taxandi fanan na a wuttu soora fanan ya katta soora tanmu do sikkandin ŋa, ken sefene Yaaxuba renmun tooran do i tilifiyen ya kanma, i ga ɲi komaaxun ŋa Misira, ken do Alla ga da annabi Muusa sugandi moxo be, kuudo na i bagandi bakka ken toora yi Misira jamaane ke noxo.
Taxandi fillan na a wuttu soora tanmu do naxatandin ya yi katta tanmu do segundin ŋa. Ken sefene Banisirayilaganko dagayen xibaaren ya kanma yi, i gaa dagana Turusiina giden ŋa, Alla gidi senne. Alla da kaawafiinun dabari na i jama ke kisi. Jama ke jokki do i terekillen ŋa, Alla da i yigandi na i minindi do gunjuran noxon ŋa.
Kitaabe ke taxandi sikkan na a wuttu soora tanmu do kabundin ya yi katta soora tannaxatandin ŋa. Banisirayilaganko ga joofe Tuurisiina giden ŋa bire be a sefene ken ya xibaaren kanma. Alla da tafunden ro i do i naxa ken noqu ya yi. A da du koyi annabi Muusa yi ken noqu ya yi. Ken noqu baananne ya ni xadi a ga da Ɲaamarixannun tanmi kini Muusa yi, ken do sariyanu tana. Batiyen ga n xawa ɲaana ike Alla da moxo be, a da ken xa moxon ko i da. A da a koni i danŋa xadi i ga n xawa batiran tagana moxo be.
Banisirayila jama ke tuuganten na Alla ya kanma, xa i buttun jawo roxoono na i duran munon dabari du da. Alla daali a da kuŋa :
« Nke ya ni Tunka Duumanten ŋa, an Alla, ke be ga da an bagandi Misira ɲiiɲen ŋa, bakka komonkonpen ŋa. Maxa kamane tana kafu in ŋa*. »