Tawureeta :
Bakke
Roraqe
Ke kitaabe sefene Banisirayilaganko bakken xibaaren ya kanma yi Misira jamaanen ŋa, ken ya n sigi kitaabe ke ga toxora « Bakke ».
Ke kitaabe ra wa taxandini taxandi xooro sikki yi : Taxandi fanan na a wuttu soora fanan ya katta soora tanmu do sikkandin ŋa, ken sefene Yaaxuba renmun tooran do I tilifiyen ya kanma, i ga ɲi komaaxun ŋa Misira, ken do Alla ga da Annabi Muusa sugandi moxo be, kuudo na i bagandi bakka ken toora yi Misira jamaane ke noxo.
Taxandi fillan na a wuttu soora tanmu do naxatandin ya yi katta tanmu do segundin ŋa. Ken sefene Banisirayilaganko dageyen xibaaren ya kanma yi, I gaa dagana Turusiina giden ŋa, Alla gidi senne. Alla da kaawafiinun dabari na I jama ke kisi. Jama ke jokki do i terekillen ŋa, Alla da i yigandi na i minindi do gunjuran noxon ŋa.
Kitaabe ke taxandi sikkan na a wuttu soora tanmu do kabundin ya yi katta soora tannaxatendin ŋa. Banisirayilaganko ga joofe Tuurisiina giden ŋa bire be a sefene ken ya xibaaren kanma. Alla da laayidun tafu i do i naxa ken noqu ya yi. A da du koyi annabi Muusa yi ken noqu ya yi. Ken noqu baananne ya ni xadi a ga da Ɲaamarindixannun tanmi kini Muusa yi, ken do sariyanu tana. Batiyen ga n xawa ɲaana ike Alla da moxo be, a da ken xa moxon ko i da. A da a koni i danŋa xadi i ga n xawa batiran tagana moxo be.
Banisirayila jama ke tuuganten na Alla ya kanma, xa i buttun jawo roxoono na i duran munon dabari du da. Alla daali a da kuŋa :
« Nke ya ni Tunka Duumanten ŋa, an Alla, ke be ga da an bagandi Misira ɲiiɲen ŋa, bakka komonkonpen ŋa. Maxa kamane tana kafu in ŋa » (20.3-4).
Xibaari xooro beenu gaa kitaabe ke noxo
Banisirayilaganko ga komaaxu moxo be, soora fanan wa digaamunu ken kanma.
Annabi Muusa teeriyen do a xooroye, soora fillandin wa digaamunu ken kanma.
Annabi Muusa do Haaruna digaamu katta Firawunan ŋa, soora sikkandi katta soora tunmundin ya n digaamunu ken kanma.
Soora ɲerundi katta tanmu do baanandi, taawoonu ku tanmi be Alla ga da I xayi Misirankon ŋa, i digaamunu kun ya kanma.
Na a wutu soora tanmu do fillandin ŋa nan daga a wa soora tanmu do sikkandin ŋa, kun digaamunu Pesexansallen jopeyemoxon ya kanma.
Banisirayilaganko ga da Xulunjuumu fanŋen kutu nan taŋe Tuurisiina kiden ŋa, soora tanmu do naxatandi katta tanmu do segundin digaamunu ken ya kanma.
Na a wutu soora tanmu do kabundin ŋa katta tanpille do naxatandin ŋa, kun digaamunu ɲaamarindixannun tanmi ya kanma.
Na a wutu tanpille do soora naxatandin ŋa katta tanpille do soora ɲerundin ŋa, tilliisi sennen ga n xawa dabarini moxo be, a da ken ɲaamariyen kini i ya.
Soora tanpille do segundi katta tanjikke do baanandin ŋa, ken sefene sadaxakiɲandaanon sigan do sadaxon ya kanma, a do Sibitinkoota.
Banisirayilaganko ga da gunbunlenmen dabari du da muno yi, soora tanjikke do fillandin sefene ken ya kanma.
Alla ga da i laayidun kurunbaaxu, soora tanjikke do sikkandin do tanjikke do naxatandin sefene ken ya kanma.
Na a wutu soora tanjikke do karagandin ŋa nan daga a wara tanjikke do kabundin ŋa, ken sefene Allanbatika yiranman gollen jopeyen ya kanma.
Soora tannaxatanden wa sefene allanbatika yiranman senonden kanma.