50
Yuusufu xosi du sedi i faaba kanma nan wu,
na a xandunsunbu.
2 Ken falle,
a ti jaarandaanon da :
« Xa da in faaba furen moxon sirondi,
na a faten daari ti te timiliŋen ŋa. »
3 Jaarandaano ku da tannaxate bito ya ɲa ken golle yi,
xoyi i laadan moxo,
kuudo a n kati mareene.
Misirankon da tanɲere bito ya ɲa Yuusufu faaba wuunu.
4 Bire be Isirayila faatiyen sunon ga dangi,
Yuusufu ti tunkanyugon seri tintun da :
« Selli in fin ga n xooro axa maxa,
xa da ke faare kiɲandi in da tunkanyugon ŋa :
5 “ Katta in faaba gaa faatini,
a da in kunandi,
ti in na i rondi Kanaana jamaanen ya yi,
i xabura dabarinten gaa no,
tunkanyugon na ɲaamariyen kini in ŋa,
nan daga a rondi no,
n na saage riini. ” »
6 Tunkanyugon da ɲaamariyen kini a yi,
a n daga i faaba rondi no,
na i laayidun tinmandi.
7 Yuusufu do tunkanyugon golliran seri xooren su daga,
kafiini Misira xirisen su yi,
8 a do a yinme kaadunko,
kafiini a waaxinu ku do faaben yinme koren kutten su.
Fo wo fo ma toxo Goseni yi,
a ga ma ɲa leminun do naaburu.
9 Wotorogumun xa ɲi firindaano ku yi,
a do siigumu,
na a ɲa fi darajanta xoore yi.
10-11 I ga kiɲe Taadi yillikatiberan ŋa Yaradefanŋen xanne, i da furunɲaxa xoore dabari non ŋa, Yuusufu saage i faaba wuunu non ŋa xadi, bito ɲeri. Kanaanaganko be gaa ken mara yi, i ga da ke ɲaxa xoore wari, i ti : « Ke ɲiini Misira seri xoore firinden ya yi. » Ken ya saabu da ken noqu ga toxore : Haabila-misira, [a wure ga ni « Misira baade »].
12 Yaaxuba renmun da a ɲaamariyen batu ke moxo ya yi,
13 do a furen nan daga Kanaana jamaanen ŋa,
na a suturi Maxapeela ten gidinkunmen ŋa,
Maamere kaara,
Ibirahiima ga da te be xobo Heferoona yi,
Heetiganke,
na a ɲa duudan xabura.
14 I ga duguta i faaba suturinden ŋa,
Yuusufu saage dagana Misira,
a do i waaxinun do fo wo fo ga daga a tunsi.
15 Isirayila faati falle,
Yuusufu waaxinu ku toxo tini me da :
« Ayiwa,
o faaba faayi ga bono,
Yuusufu n maxa daga o xonnan raga de,
o ga da fo buru be ɲaŋi a yi,
a gaa i tanbon tugana o yi. »
16 I da faaren xayi Yuusufu yi kuŋa nan ti :
« Katta o faaba gaa faatini,
a da o ɲaamari nan ti :
17 “ Xa da a ko Yuusufu da ti inke ti a n hinne axa yi.
Axa ga da fo buru be ɲaŋi a yi,
a n yanpa i su yi.
Axa do a faaba su na Alla baanen ya batta.
” » Yuusufu ga da ke xibaare mugu,
a xosi wu.
18 Ken falle,
waaxinu ku yinme ri Yuusufu sagata,
na i du sedi a taanun wure,
nan ti a da :
« O faayi,
o ɲaŋi an da komo yi. »
19 Xa Yuusufu ti i da :
« Xa maxa kanu,
nke ra wa in du sigindini allansigiran ŋa ba ?
20 Axa da a xanu na fo buren ya ɲaŋi in ŋa,
xa,
Alla yinme da a yilla fo sire yi,
na ke jama su kisi,
xoyi axa yaaxen gaa a yi moxo be.
21 Ken ŋa saasa,
xa maxa kanu,
fo wo fo su nta axa kitana,
n wa sikki ti axa do axa kaadunkon likkun su yi.
» A da i neene,
na sefe siri gabe koni i da.
22 Yuusufu da i faaba koren taaxu Misira yi ke moxo ya.
A yinme da kame do siino tanmi ya bire.
23 A da Hefarayimu soxoodin wari ma i yillayi sikkandi,
nan saage na i kisimare Maxiiri renmun xoorondi,
ken ga ni Manaase ren yugon ŋa.
[Yuusufu faatiye]
24 Koota yogo,
Yuusufu ti i waaxinu ku da :
« N faati waxatin ntaxa laatu,
xa,
Alla wa riini axa faabandi,
na axa bagandi Misira,
na axa geesu dagana jamaane be,
a ga da a laayidun wutu Ibirahiima do Isiyaaxa do Yaaxuba da.
25 Ken kuŋa,
xa da laayidun wutu in da,
nan ti Alla ga na axa faabandi,
axa wa in furen wuttu do du yi dagana. »
26 Yuusufu faati na a wuyin toxo kame do siino tanmi.
I da a faten daari ti te timiliŋen ŋa,
kuudo a n kati mareene,
na a mara furunwaxanden ŋa Misira.