49
Ken falle,
Yaaxuba da i renmun taaxundi nan ti i da :
« Xa da in terinka,
axa gaa riini ɲa ke be yi,
n na a ko axa da.
2 Xa da in terinka,
Yaaxuba renmu,
xa da axa faaba Isirayila¤ terinka.
3 Anken Rubeeni na in sooman ya yi*,
n da an fina ya kita na in toxo fonnanxayaaxun ŋa,
n yonkin fakkan tinmante,
an do an maarenmun su firi hooraaxun do fankan ŋa.
4 An senbente ni xo ŋaame,
xa an ntaxa ɲaana kaananke yi,
baawo,
an duŋe saqa an faaba saxuran ŋa,
nan kafi do a yaqen yogo yi*.
5 Simoonu do Leewi ni kapanlenmon ya yi,
i kapen na sondonburaaxun ya kanma,
6 xa,
yelli in taqe gan nta ro i kapen ŋa,
a gan nta ro i janbeyen ŋa,
baawo,
i butten da,
i da seron lonjuuru,
i yonkiliŋun da,
na seron kari xo daabanu*.
7 Alla nta i barekindini i buttu buren saabu da,
a nta i barekindini i fitinayi buren saabu da.
I soxoodin wa riini taxandi Yaaxuba renmun naxa,
nan sanqi-sanqi do Banisirayila jamaanen ŋa.
8 Yehuuda,
anken waaxinun wa riini an tiiga¤,
an taanun wa riini sigi an xonnon kofon ŋa,
an faaba renmu ku wa sujudini an da.
9 N renme Yehuuda senben na xo jarinten ya,
a ga giri tiyiyige,
nan ri saxu i taragan ŋa,
ko n katta katiini a yi ?
10 Yinmankaaxu ke dokkon toqo Yehuuda ya bulunlaqen ŋa,
dokko ke wa toqo a soxoodin kitten ŋa,
ma a ga na n kiɲe i kaman haxiixan¤ ŋa,
seron wa riini xaaye ken da.
11 A wa ɲaana seri neemante yi ti reesen gaboyen ŋa,
ma a ga da farun wara a yi,
a yiraamen wa wanqini reesenjin ŋa,
na a bolli a leeman ŋa.
12 A yaaxon wa riini dunbu reesendolon maxa,
na a kanbon xurandi ti xattin ŋa.
13 Jebuluunu,
anken taaxuran ɲaana geejinlaqen ya yi,
jiiduntaraanon yanqaran ŋa,
an maran wa neenunu ma Sidooni kaara.
14 Yisaxaari,
anken gollini ya xo fare,
a gaa saqa i gallen ŋa.
15 An ga na jaman sire be wari,
non neemanten ga ni,
an wa komongollini kun kamannu da,
kuudo an nan toxo no.
16 Daani,
anken wa an seron faasana,
xo Banisirayilaganko xabiilanun kuttun moxo.
17 Hari an ga n roxa,
an ra wa faasandini,
xo kooso muxunte killen ŋa,
xonne be nda tinko an ŋa,
an na a xiɲi i sin fallanɲiimen ŋa,
na a kolita kofen kanma ɲiiɲen ŋa.
18 Yaah !
Tunka Duumante,
n jikken wa a yi,
an wa in kisini.
19 Gaadi,
xennaanon ya n xenne anken ŋa,
xa an wa katini an du bakka i maxa,
na i faraxatu.
20 Haseeri,
anken soxofoonun wa siroono nan dangi haqen ŋa,
i fatandifoonun ya n ɲaana tunkanyugun yiganden ŋa.
21 Nafutaali,
anken ni yinmakitante ya yi xo siinen moxo,
ayiwa,
an nta fo saarana ren faranpare falle.
22 Yuusufu,
anken na xo yitti nafanta xoore ya yi jinxannen ŋa¤,
an kingun wa fon su kanma.
23 Bundansedaanon da an janba,
na i bundanŋun sedi an ŋa ti sondonkaawantaaxu,
24 xa,
an da an bundanŋun raga ti soobe yi,
an kitten liŋo,
baawo Yaaxuba Alla senbente,
Isirayila tangandaanan do a faasandaanan wa do an batte.
25 Yelli an faaba Alla gan na an faabandi,
Yelli an Alla Raniyaanan gan na an barekindi :
na an barekindi ti kanmun jin gaboyen ŋa,
na an barekindi ti ɲiiɲen wure jin gaboyen ŋa,
na an barekindi ti an bonsonŋun do daabanun gaboyen ŋa.
26 An faaba bareken be ga n gaba seri fanon xallen ŋa,
i ga n gaba gidintintiŋan xallun ŋa,
yelli Kamanen gan na kun bareken guuji an kanma Yuusufu,
anken be ga ni waaxinun yinmanken ŋa.
27 Beniyamiina,
anken ɲaana xo kanbanten ya,
suxuban ŋa,
an wa an tiyi raganten yigana,
lellen ŋa,
na a taxandi. »
28 Ku ya ni Banisirayilaganko xabiilanun tanmi do fillon ŋa,
a do a ga da tageexanne be ko baananbe su yi.
[Yaaxuba faatiye]
29 Ke falle,
Yaaxuba da ɲaamariye tana kini i renmun ŋa nan ti :
« N ga na faati,
xa na in rondi in seri fanon kaaran ŋa,
gidinkunme be gaa Heferoona Heetiganke ten ŋa,
30 Maxapeela,
Maamere kaaran ŋa,
Kanaana jamaane.
Ibirahiima da te ke xobo Heferoona Heetiganke yi,
kuudo xabura ke na ɲaŋi i halaale yi.
31 A yinme do i yaqe Saaratu rondi non ya yi,
do Isiyaaxa do i yaqe Rebexa,
nke yinme xa da Leeya rondi non ya yi.
32 Te ke do gidinkunme ke be gaa a yi,
i xobe Heetigankon ya yi. »
33 Yaaxuba ga duguta i ɲaamarindi lagaren kinni i renmun ŋa,
a saxu na i yonkiraworeyen lagaren ɲa,
nan kafi i seri fanon ŋa.