Jopaye 48

Ku fiinu dangi falle, a koni Yuusufu da ti a faaba ma saha. A do i ren yugu ku filli xosi daga a dingiran ŋa, Manaase do Hefarayimu. 2 A ga koni Yaaxuba da ti a ren yugo Yuusufu ri a xanta, a da duruxoto nan giri taaxu saxan kanma. 3 A ti Yuusufu da : «  bange in da Luuja, Kanaana jamaanen ŋa, nan duwa in da. 4 A ti : “ N wa riini bonsonŋen gaben kini an ŋa, na an ɲa xabiila gabe kisima yi. N wa ke jamaane kamanaaxun kinni an bonsonŋun ŋa, i wa a marana abada. ” 5 Ayiwa, an ga da ku ren yugu filli be kita yere saado in gaa riini, Hefarayimu do Manaase, an renmu fe de, nke ya renmu ni, n wa i ragana xo Rubeeni do Simoonu moxo. 6 Xa, an ga na ren yugu be tana saara ku falle, kun wa toqo an renmaaxun ŋa. I do i gida yugu fano ku renmun ya ɲaana xayimaxantanlenmo yi. 7 N da ke ɲa an ma Raheli ya saabu da, baawo, n riyinte gilli Padana-haraami, n ga tinko Hefuraata yi Kanaana jamaanen ŋa, a faati in maxa. N da a firindi killinxaanen ŋa no. I wa tini non da lenki : Beeti-leheemi. »

8 Na a toxo sefene, a da Yuusufu ren yugu ku wari, a ti : « Ku ni koonu yi ? » 9 Yuusufu ti a da : « Ku ni Alla ga da ren yugu be kini in ŋa yere yi ya. » Yaaxuba ti a da : « I tinkondi in ŋa, n nan duwa i da. »

10 Isirayila xaso, a yaaxon lanpu keeta, a ntaxa wariini moxo siri. Yuusufu do i renmu ku tinkondi a yi, a da i xandunsunbu na i mondo do du yi, 11 nan ti Yuusufu da : « Nke ma ɲi a jikki in wa anken walla xadi, a faayi, Alla da hari an renmun koyi in ŋa. » 12 Ken moxo, Yuusufu da i renmu ku yanqandi bakka a taanun kanma, nan sujudi ɲiiɲen ŋa. 13 Ken falle, a da i filli kittun raga, na Hefarayimu raga ti i tayen ŋa, na a gemundi Isirayila noogen ŋa, na Manaase raga ti i noogen ŋa, na a gemundi Isirayila tayen ŋa, na i tinkondi kisime ke yi xadi. 14 Xa Isirayila da i kittun faraaxu, a da i tayen gemundi Hefarayimu yinmen ŋa, ken ni fo tugunnen ya, na i noogen gemundi Manaase yinmen ŋa, ken xa ya ni sooman ŋa. 15 Ken moxo yi a duwa, nan ti :

« N wa Kamanen ɲaagana, n kisima Ibirahiima do in faaba Isiyaaxa ga da i birantaaxun ɲa aken be maranden ŋa,

na Kamanen ɲaaga, aken be ga da in tanga gelli in bangeye ma lenki,

16 yelli maliika be ga da in tanga fo buren su yi

gan na ku ren yugu filli barekindi,

seron nan toxo in sinmana ti i ya,

i n toxo in kisima Ibirahiima do in faaba Isiyaaxa sinmana ti i ya,

i n bareki na bonsonŋen gaben kita ɲiiɲen kanma. »

17 Yuusufu ga da a wari faabe ke ga a da i tayen saxu Hefarayimu ya yinmen ŋa, ken ma liŋo a da. A da faaben kitten raga ti i wa a roono Manaase yinmen ŋa, nan ti : 18 « N faaba, an sanku de, ke ya ni sooman ŋa wo, an tayen saxu a yinmen ŋa kuŋa. » 19 Xa faaben ma duŋe. A ti : « N da a tu, n wa a tu mene n renme, Manaase yinme bonsonŋen wa riini gabo, xa a yaxido ke ya bonsonŋen nan riini gabo diina aken ŋa, nan ɲa xabiila gabe yi. »

20 Ken koota, a duwa i filli su da nan ti : « Banisirayilagankon wa riini duwaawun mundu Alla maxa ti axa toxonun ŋa, nan ti :

“ Hari na an barekindi xo Hefarayimu do Manaase moxo. ” »

Isirayila da Hefarayimu wara Manaase kaane kundu ya yi.

21 Ken falle, a ti Yuusufu da : « N faatiyen ntaxa laatu, xa Alla wa do an batte, a wa riini an saagandi dagana an sere fanon ɲiiɲen ŋa. 22 Nke be xa ga ni, n wa riini taqe kini an ŋa, a ga n gaba an waaxinun xallen ŋa, ken ga ni Sixemu ɲiiɲen ŋa, n da non raga Hamoorikaarankon ŋa ti in kaafan do in bundanŋen ya. »