Jopaye 47

Yuusufu daga tunkanyugon xibaari ti : « N faaba do in gidanu ri nan giri Kanaana, i do i tanmison do i naanun do i naaburen su, saasa i n xawa ɲiini Goseni maran ŋa. » 2 Ken falle, Yuusufu da i waaxinu karagi koyi tunkanyugon ŋa. 3 Tunkanyugon ti i da : « Axakun gollen ni man xa yi ? » I ti : « O yinmanke, oku gollen ni tanmisamareyen ya yi, xo o sere fanon moxo. 4 Kaawayen xoto o jamaanen ŋa, Kanaana, sokke ntaxa no daabanun gaa a yigana, ken ya ni o ga forogo riini yere. Ken kuŋa, o wa a mundunu axa maxa ti darontaaxu yi, o n taaxu Goseni maran ŋa. » 5 Tunkanyugon ti Yuusufu da : « A ko an faaba do an waaxinun da, i n bisimilla. 6 Misira wa an sagon ŋa, i taaxundi a noqu neemante yi. A ga n liŋo i da, i n daga taaxu Goseni maran ŋa. Selli an gaa golliɲaŋaana siru tu kafiini i yi, kun senbendi inke yinme daabanun xibaaren ŋa. »

7 Yuusufu da i faaba xa koyi tunkanyugon ŋa. Yaaxuba da a kuuɲi ti darontaaxu yi. 8 Tunkanyugon ti a da : « An na siino manime ? » 9 Yaaxuba ti : « N wuyin ni kame do tanjikke siine ya. Ganta, forogoyen gabo in kanma in birantaaxun ŋa do noqunun ŋa, jaaraben gabo in kanma moxo buru, n ra nta in sere fanon wuyin me kitta. » 10 Ken moxo, Yaaxuba da tunkanyugon nawaari nan duwa a da, nan daga.

11 Yuusufu da i faaba do i waaxinun taaxundi Misira noqu neemanten ŋa, Ramuseesi deben kaaran ŋa, na ɲiiɲe ke kamanaaxun kini i ya xo tunkanyugon ga da ɲaamariyen kini moxo be. 12 A da biraadon kini i faaba yi, haqe be gaa a do i kaadunkon su bakka.

[Yuusufu golliɲanmoxo dullun kaane]

13 Dulle ke ri xoto, fo wo fo ntaxa du yi na a yiga keeta, Misira do Kanaana jamaanen su, seron jope lanpunu. 14 Yuusufu da Misira do Kanaana xaalisin su kafu me yi ti yille ke gaageyen ŋa seron ŋa, nan daga a wara tunkanyugon kan ŋa. 15 Bire be xaalisin ga ɲeme Misira do Kanaana su yi, Misirankon daga Yuusufu sagata nan ti : « Yinmanke, o xaalisin su ɲeme de, an nta o kuunu o n yige, ma an na o walla o n kara ya ? » 16 Yuusufu ti : « Xaalisi ga ntaxa axa maxa, xa do axa daabanun nan ri, o na i faraaxu biraadon ŋa. »

17 I do i daabanun ri katta Yuusufu yi, a da biraadon faraaxu i ya siinun do faru, tanmison do naanu. I da ken siine biraadon kita ti i daabanu ku faraaxunden ŋa. 18 Ken siinanyillakara, i ri Yuusufu sagata xadi nan ti : « Yinmanke, o ra ntaxa o fi su muxundini an ŋa, o xaalisin ɲeme, o daabanun xa su ɲaŋi an xalle yi, fo wo fo ntaxa o maxa saasa ma o yinmenu yinxottun do o ɲiiɲanxottu. 19 An na o walla o n kara ya, o ɲiiɲon xa gaa bonno ? Biraadon faraaxu o yi ɲiiɲanxotten ŋa, oku yinme do o ɲiiɲanxottun su na ɲa tunkanyugon xalle yi. Yillinsoxoodi kini o yi, o n bire, na o teenun xa bogu sokken ŋa. »

20 Yuusufu da Misira ɲiiɲanxotten su xobo tunkanyugon da, baawo dullen saabu da, Misiranko da i su faraaxu biraadon ŋa. Ke moxo yi, jamaanen su ɲa tunkanyugon xalle yi, 21 na be su ɲa a da kome, nan giri jamaanen yinme ma a yinbaane. 22 Yuusufu ma ɲi diinanyinmankon baane ya ɲiiɲanxottun xobono, na a sababun ɲa tunkanyugon sariya wutunte yi i da, a yinme ya n ɲi kun birandini, ken ya saabu da, ikun ma i teenun gaaga.

23 Yuusufu da jamaanen renmun xiri nan ti i da : « Saasa, n da axa do axa teenun xobo tunkanyugon da, n wa yillinsoxoodin kinni axa yi, axa na teenu ku soxo. 24 Xa sanjaanen ŋa, axa na axa soxofoonun taxandi karagandin kinni tunkanyugon ya yi, a kutten na axa yinmenu xallen ya. Axa na axa do axa kaadunkon biraadon baga a yi, na yillisoxoodin xa bogu a yi. » 25 I ti a da : « O yinmanke, anken ya n da oku kisi kallen ŋa, ken kuŋa o duŋe tunkanyugon komaaxun ŋa. » 26 Ke moxo ya ni, Yuusufu ga da sagallen farilan taaxundi Misira jamaanen ŋa, a gaa du yi hari lenki : soxofoonun taxandi karagandin wa kiniini tunkanyugon ŋa, ma a ga nta diinanyinmankon baane, kun teenun feti tunkanyugon xalle yi.

[Yaaxuba fiinun legeru]

27 Isirayila kaadunkon taaxu Misira jamaanen ŋa, mara, na ken mara noqunu yogonu kamanaaxu, na renmun kita no, nan gabo moxo siri. 28 Yaaxuba da siino tanmi do ɲeru ya ɲa Misira, xa a wuyin kafumanten ni : kame do tannaxate do siino ɲeri.

29 Bire be Isirayila ga da a tu ti faatiyen kiɲe i ya, a da i renme Yuusufu xiri nan ti a da : « N wa a mulla selli in ga n dara an maxa, an na an kitten saxu in togen wure na laayidun wutu in da, nan ti an nta in bulunu Misira yi yere. 30 N ga na faati, an nan daga in rondi in sere fanon xaburon ŋa. » Yuusufu ti a da : « N faaba, n wa ken ɲaana. » 31 Isirayila da a xotondi a maxa, a n kuna, Yuusufu kuna a da. Ken ga ɲa, Isirayila da sujudi xenundi i saxan yinmun ŋa.