Tawureeta :
Bakke
[Annabi Muusa bangeyen do a faarannaaxu]
[Banisirayilaganko komaaxu, Misira]
1
Yaaxuba, a ya ga ni Isirayila¤, a do i renmu beenu ga daga doome Misira, i toxonun faayi : 2 Rubeeni, Simoona, Leewi, do Yehuuda, 3 Yisaxaari, Jebuluunu do Beniyamiina, 4 Daani do Nafutaali, Gaadi do Haseeri. Baananbe su do i koren ya ni. 5 Ken kuŋa Yaaxuba do i koren su, i tanɲere sere¤ ya ni. Xa Yaaxuba renme tana ɲi i kaane yi Misira, ken ga ni Yuusufu. 6 Yuusufu ri bono ken falle, kafiini a waaxinu ku beenu ga ri a sagata Misira. I sapa su xa ma ɲi bireene ken koota yi.* 7 Banisirayilaganko jiidi Misira, na renmen gaben kita, i jaman kasafo, i da ɲiiɲen faga.8 Ken falle, tunka kurunba ri taaxu Misira yinmen ŋa, ken ma ɲi Yuusufu tu. 9 Ken ti i jaman danŋa : « Axa da a wari, Banisirayilaganko xabiilan gabo nan dangi haqen ŋa, i jaman xa kasafo o danŋa. 10 Ken kuŋa, o na feeron kutu i xanne maxa, ken ga fe, i wa tallan gaboono. Ken ŋa, fitina nda giri, i ra wa kapa o xonnon ŋa na o bonondi, i na daga i kaara. » 11 Misiranko da yinmanko yogo sugandi, kuudo na yaaxandunben saxu Banisirayilaganko kanma ti senbengollun ŋa. Ken ya n ɲa Pitoomu deben do Ramuseesi deben taganden ŋa, kun ga ni Firawunan¤ naxafamareranun ŋa. 12 Ken yaaxandunbe wa Banisirayilaganko kanma, xa i wa tallan jiidini*, i wa tallan sanqini jamaanen noxon ŋa. Ken ya saabu da Misiranko ga da i tallan xoni nan kanu i ya. 13 I xonnoxotaaxu ti Banisirayilaganko yi, na i raga xo komo. 14 I da i yonkinun liixi ti golli xoto-xoton ŋa : i da i wara doorintuufakatiyen do teesoxen ya yi. Sefe defonde da, Misiranko sondonburaaxu ti i ya, na i wara golli xoten danben su yi.
15 Yaxarinsaarandaano filli wa Habaraanigankon¤ maxa, baanen toxon ni Sifaara, baanen toxon ni Puwa. Misira tunkanyugon ti i danŋa : 16 « Axa ga na ɲi Habaraaniganka yaxare be deemana saareene, axa na a koroosi : selli a renmen ga ni yugon ya, xa da a kari, selli renme ke ga ɲa yaxaren xa ya, xa da ken toxo bireene. » 17 Xa, saarandaano ku na allankannaanon ya yi, ken kuŋa, i da ren yugun toxo bireene, i maxa tunkanyugon ɲaamariyen batu. 18 Ayiwa, tunkanyugon da yaxarinsaarandaano ku xiri nan ti i da : « Axa ke moxo xa ni manne, axa ga da ren yugun toxo bireene ! » 19 Yaxaru ku ti tunkan da : « Habaraaniganka yaxaren do Misiranka yaxaren nta baana. Senben ya ni Habaraaniganka yaxarun ŋa, ken ya ni i nda taaxu jalan ŋa, saado o gaa riini ken wa a ɲiini i saare ti du yi. »
20 Alla da yaxarinsaarandaano ku neema, Habaraanigankon ri tallan gabo. 21 Yaxarinsaarandaano ku allankannen ya saabu da ni, Alla ga da i jiidi.
22 Ken falle Misira tunkanyugon lagari tini i jaman danŋa : « Ren yugo su nda saare Habaraanigankon ŋa, xa da a wutu, axa na a sedi Niili fanŋen ŋa ! Xa, axa na ren yaxarun wara bireene. »