[Annabi Muusa teeriye]
2
Ken da a ɲi Leewi fonlaqen ŋa, i da renmu filli¤ kini me yi yaxun ŋa. 2 Yaxare ke da noxon wutu, nan saare ti ren yugo yi, a renmen siren ni. Ayiwa, a xosi renme ke muxundi, xasu sikki a gaa a maxa. 3 Xa a ma katu dallana a maxa. A da sokkinkande yogo wutu, na a sapi ti godoro, a do male, na lemine ke ro a noxon ŋa, nan daga a da a taaxundi digan ŋa fanŋen noxo. 4 Lendunbe ke gida yaxaren daga sonsolondi, kuudo i na ke be gaa ɲaana xoxone ke yi tu.5 Wuce falle, Firawunan ren yaxaren do i batulanun yanqa fanŋen ŋa, a gaa telle wanqi. Ken noxon ŋa, a do yaxaru beenu gaa do a batten ŋa toxo yiileene do fanlaqen ŋa, a xosi kanden wari taaxunu sokkindigan ŋa, a da i komo yaxaren xayi, ti a nan daga kanden riiti. 6 A ga da kanden raqen wuɲi, a da leminandunben wari saqa a noxo, a gaa wuunu. A xosi hinne lemine ke yi, nan xosi ti : « Habaraaniganken ya faayi ke ! » 7 Lemine ke gida yaxaren gaa non ŋa, a xosi ti Firawunan ren yaxare ke da : « An wa a mulla n na Habaraaniganka yaxare muuru an danŋa ba, a gaa lemine ke sugundini na a sorogo an danŋa ? » 8 A ti a danŋa : « Daga fo muuru ! » Xusunne ke daga lendunbe ke ma yinme ya xiri, do a nan ri katta Firawunan ren yaxaren ŋa. 9 Firawunan ren yaxaren ti yaxare ke da : « Ke renme raga, an na a sugundi na a sorogo in danŋa, n na an tuga. » Yaxare ke da renme ke wutu, na i xattin sugundi a yi. 10 Leminen ga xooro, yaxaren da a deni Firawunan ren yaxaren noqu. A da a ɲa du da renme yi. A ti : « Ke renme, n wa a toxorana Muusa, baawo in da a jaaba bakka jin ya yi.¤ »
11 Muusa ga kiɲe maxanbaanaaxun ŋa, koota yi a giri nan daga i maarenmun ɲi golli xoto kanma, Misiranko ga da a wara i kanma yi ti senben ŋa. A xosi a ɲi xadi, Misiranke yogo gaa Habaraaniganke yogo katta. 12 Muusa da i kaaron faayi, a ma sere wari, a xosi Misiranke ke katu na a kari, a da a bulu seyiŋen ŋa. 13 A bita fillandi, Muusa daga bogu i seron ŋa xadi, a da Habaraaniganke filli ɲi gajanŋa. A ti baqalla ke danŋa : « Manne ni an gaa an waaxin katta ? » 14 Ken xa da du toxo : « Kon da an ɲa marandaana yi ti an na o kiiti ? Xori an nta a mulla na in kari ya, xoyi an ga da Misiranken kari moxo be ? » Muusa ti i du danŋa : « Yabo ! Seron da in golliɲaŋunten tu. » A xosi kanu. 15 Jaaxa Firawunan xa da golle ke mugu, a wa Muusa muurunu i na a kari. Muusa wuru ke ya yi, nan daga Mediyaana jamaanen ŋa, nan taaxu geden kaaran ŋa.
16 Ren xusu ɲeri ɲi sadaxakiɲandaana yogo maxa Mediyaana yi, ken toxon ga ni Suwayibu¤. I ri jin xesu, i gaa minindiwaarun fakka, na a kini i faaba tanmison ŋa. 17 Nagaanaanon ga ri, i xosi xusu ku xata. Muusa giri ken ya yi na i faasa, na i tanmison minindi. 18 I ga saage katta kaanun ŋa, faaben ti i danŋa : « Ee ! A ɲa kan moxo xa ? Axa ri fane lenki de ! » 19 I ti faaben da : « Misiranke yogo ya n faasandi o danŋa, o do nagaanaanon naxa, a da hari jin xesu o danŋa na o tanmison minindi. » 20 Suwayibu ti i ren yaxaru ku da : « Ken yugo na minna ? Axakun do ken ma ri ? Xa daga a xiri, xa do a nan ri, o n yige ! »
21 Muusa xosi toxo do Suwayibu batte, ma Suwayibu gaa i ren yaxare Cipoora kinni a yi yaqe. 22 Cipoora jiidi a danŋa ti ren yugo, Muusa ti kuŋa : « N wa a toxorana Geresoomu, [ken wure ga ni “ ke mukke ke ”] baawo in ɲa tuŋaaranke wandi jamaanen ŋa. »
[Annabi Muusa faarannaaxu]
23 Wucu laate dangi falle, tunkanyugo be ga ɲi Misira yi a kara. Banisirayilaganko laxaraxaasa katta Alla yi, i gaa a gangunu, komaaxu ke toora be gaa i kanma. I gangunden kiɲe Alla yi.* 24 A da i hanmirafin mugu, a da i do Ibirahiima do Isiyaaxa do Yaaxuba naxan laayidun kurunbaaxu. 25 A da Banisirayilaganko faayi, na i alihaalan tu.