Bakke 3

Koota yi, Muusa ga ɲi i kallu yugo Suwayibu tanmison goyimene, ken ga ni Mediyaana ŋa, a do tanmison da gunjuran kutu, nan kiɲe ŋa, Alla gide. 2 Non ŋa, Tunka Duumanten maliikan da du bangandi a danŋa xo kuma, badagen naxaane. Muusa yaaxen wa badagi kuminten ŋa, xa, badagen nta biyini. 3 Muusa ti du da : « N dugu n nan tiirinbe na ke kaawafi duuxura. Badagen ma biyi. Ke xa ni manne yi kuŋa ? » 4 Tunka Duumanten ga da a wari Muusa ga tiirinbe katta badagen naxaanen ŋa, Alla da a gangu : « Muusa wo ! He Muusa ! » Muusa ti : « Naamu. » 5 Tunka Duumanten daali Muusa da : « Maxa tinko badagen ŋa, an tepunun bagandi, baawo yere ni dingira sennen ya. 6 Nke ni an faaba Alla ya, Ibirahiima Alla, Isiyaaxa Alla do Yaaxuba Alla. » Muusa xosi kanu, a da i yaaxon muxundi.

7 Tunka Duumanten jokki do daaliyen ŋa : « N da in seron wari, i gaa toora be yi Misira, n da i laxaraxaasaxannen mugu Misira golliɲanyinmankon gumon wure. Tonŋu, n wa i ken tanpiye tu. 8 N yanqa ya keeta, n na i dugutandi Misiranko yi. N wa i denne jaman xoore yi, a siren ga ni, gaa no, Kanaanaganko, Heetiganko, Hamoorikaaranko, Perijinu, Hiiwikaaranko, a do Yebuusikaarankon taaxunton gaa non ŋa. 9 Baawo, sonqoxannen kiɲe in ŋa, n da a wari xadi, Misiranko ga da toora be saxu i kanma. 10 Keeta ken, n wa an xayini ŋa. An nan daga in seron bagandi Misira ɲiiɲen ŋa, Banisirayilaganko. »

11 Muusa jaabi Alla da : « Nke ? Xori inke ra wa telle Firawunan sagata, ti in do Banisirayilaganko wa bakka a jamaanen ŋa ? » 12 Alla daali Muusa da : « N wa ɲaana do an batte. N ya n da an xayi mene. Daliilu faayi : an ga na Banisirayilaganko bagandi Misira yi bire be, axa wa Alla batta ke gide kanma. »

13 Muusa jaabi Alla da : « Ayiwa ! Selli in ga na daga Banisirayilaganko sagata, nan ti i da : “ Axa ganninkon Alla ya n da in xayi axa yi. ” I na in tirindini an toxon ŋa ya de, n tini manne ? » 14 Alla daali Muusa da : « N ga ni ke be, n ni ken ya. An gaa fo be koono Banisirayilaganko da ni ya : “ N NI KE BE YI yan da in xayi katta axa yi. ” 15 An nan ti i danŋa xadi : “ Ke be ga da in xayi katta axa yi toxon ni Tunka Duumante ; axa ganninkon Alla ya ni, Ibirahiima Alla, Isiyaaxa Alla, do Yaaxuba Alla. ” N toxon ya ni ke abada. Toxon ya ni ke, axa ra gaa in xilli ti a yi keeta.

16 « Saasa ke, daga ! An na Banisirayila xirisun kafu me yi, nan ti i da : “ Tunka Duumante, axa ganninkon Alla, Ibirahiima Alla, Isiyaaxa Alla, do Yaaxuba Alla da du koyi in ŋa. A daali : ‘ N ri ya n ga lafi in na axa deema, Misiranko ga da tooran saxu axa kanma. 17 Ayiwa, n wa axa bagandini bakka jamaane ke yi, ke toora xaxace noxon ŋa, n na axa kanda katta Kanaanagankon ɲiiɲen ŋa, a do Heetiganko, Hamoorikaaranko, Perijinu, Hiiwikaaranko, a do Yebuusikaaranko. Ken jamaane ni xattin do tamarileeman waranlaqen jamaanen ya. ’ ” 18 Banisirayilaganko wa an terinkana. Ken falle, axa na daga Misira tunkanyugon sagata, an do Banisirayila xirisu, axa na ti a danŋa : “ Tunka Duumanten da du koyi o yi, Alla. Saasa ke, an na o wara, o na bito sikki terende tara gunjuran ŋa, o na xurusindi Tunka Duumanten danŋa, o Alla. ” 19 Ganta, n wa a tu, Misira tunkanyugon nta duŋeene axa walla musulahan kanma. 20 Ken ŋa, n wa yanganxatan yanqandini Misiranko kanma, ti in katudanŋen ŋa, na kaawafin danben su ɲaŋi i ya i jamaane ke yi. Ken falle ya ni i gaa axa walla bakka. 21 Nke saabu da, Misiranko wa axa ware moxon sirondini. I nta axa kitti duurun walla dagana. 22 Banisirayilaganko yaxarun su na kittirakoyi, i do Misiranke be gaa ka yi, ma i kaanun gaa me kaaran ŋa. Axa wa kanɲaagaarun do xaalisixullinɲaagaarun kitta i ya, a do doroki xooro, ma axa renmun ga da i rondi. Ken moxo yinme xa ya ni, axa na xosi Misiranko bannaaxun wutu. »