Bakke 4

Muusa jaabi Tunka Duumanten da : « Ayiwa, a faayi, a faayi ! Banisirayilaganko nta riini saxu in ŋa, i nta in ɲaamariyen xa batta, i tini ya : “ Aayi, Alla ma du koyi anken ŋa. ” » 2 Tunka Duumanten daali Muusa da : « Ke be gaa an maxa an kitte ke yi ni manne fo ? » Muusa jaabi : « Dokkon ya ni. » 3 Tunka Duumanten daali a da : « A sedi ɲiiɲen ŋa de. » Muusa da a sedi ɲiiɲen ŋa. A xosi ɲa samaqen ŋa. Muusa xosi dire bakka falle. 4 Tunka Duumanten daali Muusa da : « A raga ti xoqen ŋa. » Muusa da samaqe ke raga ti xoqen ŋa ; samaqen yille gumaaxun ŋa Muusa kitten ŋa. 5 Tunka Duumanten daali : « Ke na daliilu yi ti in da du koyi an ŋa, nke Tunka Duumante, i ganninkon Alla, Ibirahiima Alla, Isiyaaxa Alla, a do Yaaxuba Alla. » 6 Tunka Duumanten daali xadi : « An kitten saxundi an gijinmen kanma an doroken wure. » Muusa da i kitten rondi, a gaa a bagandini, fatanwatti buren bogu a kitten ŋa. 7 Tunka Duumanten daali xadi : « An kitten saagandi an doroken wure. » Muusa da i kitten rondi xadi, a gaa a bagandini, kitten saage i moxon ŋa. 8 Tunka Duumanten ti a danŋa : « Banisirayilaganko ra wa ɲaana i nta saqa an ŋa ke kaawafi fana do i fi su, i nta an ɲaamariyen xa batta ke su kanma. Ken kuŋa, i na saxu an ŋa ti kaawafi fillandi ke ken ŋa, saafi xullen gaa saqa kitten ŋa ti ke be yi. 9 Xa, i ga ma saxu an ŋa ku kaawafiinu su kanma, i ga ma an ɲaamariyen batu, an na Niili fanŋen jin wutu, na a joxi ɲiiɲen ŋa. Ken ji na ɲa foren ŋa. »

[Haaruna sugandiye]

10 Muusa jaabi Tunka Duumanten da : « Ah ! N Kama, yanpa in maxa. Nke ra nta sefene. Gelli in gaa leminaaxun ŋa, n ra nta sefene sefe moxo sire yi, ken xa ma faraaxi hari in do anke sefanlenmaaxu noxon ŋa. N neenen xalasinte fe. » 11 Tunka Duumanten daali Muusa da : « Kon da raqen kara seren soomon naxa ? Ko na raqen wuɲini na a texe, a do ko na tarun wuɲini, ko na yaaxon wuɲini ? Ko na seren finkindini, xoyi inke Tunka Duumanten ya fe ba ? 12 Daga ! An ga na ɲi sefene noqu su, n wa do an batte. N wa an toŋono xa, an ga n xawa fo wo fo koono. » 13 Muusa jaabi : « Ah ! N Kama, yanpa in maxa, sere tana xayi. » 14 Ayiwa Tunka Duumanten suno Muusa maxa. A daali : « Iyo, an gida xa, Leewikaaranke, aken neenen xalasinten ya ni, n wa a tu ! Ayiwa, an da a wari de, Haaruna wa riini gemu an ŋa. A ga na an wari, a sondomen wa ɲaxalini. 15 An na digaamu a da, a ga n xawa ke be koono, an na a wara kille yi. Yabo, nke wa do axa batten ŋa axa nda ɲi sefene, n wa axa tuyindini axa ga n xawa ke be xa ɲaana. 16 Haaruna wa sefene jaman danŋa an batten ŋa, a na ɲa an da faare yi, anken na ɲa a da faarinkamane yi, axa na ɲa xoyi Alla do i xayifaare. 17 An nan tigiti dokko ke yi ya xa de. An wa kaawafiinu tananu dabarini na an do Haaruna toxo doome yi. »

18 Muusa saage katta Suwayibu yi, a kallu yugo. A ti a da : « N nan xawa saagene katta in seron ŋa Misira, n na a tu selli i gaa finna bireene. » Suwayibu ti a da : « Daga, xeeri wa do an ŋa ! »

19 Tunka Duumanten daali Muusa danŋa Mediyaana yi xadi : « Yabo, saage katta Misira yi, baawo ku beenu ga ɲi a mulla na an kari, i kara. » 20 Ayiwa, Muusa da i yaqen do i ren murunton wutu, na i setundi faren kanma katta Misira. Allanguma ke wa a kitten ŋa.

21 Tunka Duumanten daali Muusa da : « N da kaawafiinun katudanŋen ɲaŋi an danŋa. An ga na kiɲe Misira, maxa mungu i ɲaana Misira tunkanyugon jon ŋa de ! Xa Muusa ! Ma in ga da a kiilun xotondi, a gaa balla Banisirayilaganko walla dagana. 22 An na ti : “ Tunka Duumanten daali : ‘  ni in renmen ya, n ren sooma. 23 N da an ɲaamari, ti an na a wara dagana, kuudo a na in batu, xa an bara. Ken saabu da, n xa wa an ren yugu fanan karini. ’ ” »

24 I saaganton ŋa, Muusa do i yaqen do i renmu, wuron ga ro, i yanqa. Tunka Duumanten gemu a yi ti i tunkaaxun ŋa, a ɲi a faatindini. 25 Cipoora xosi gidinlabo yogo wutu. A da i renmen sunnandi, na a muru ke suusa Muusa taanun ŋa. Ken falle, a ti : « An ni inke da maaɲufore ya yi. » 26 A da a wara. Sunnande ke ya saabu da ni, Cipoora ga ti : « An ni inke da maaɲufore ya yi. »

27 Tunka Duumanten daali Haaruna da : « Daga gemu Muusa yi gunjuran ŋa. » Haaruna daga. A da Muusa ɲi Alla giden kanma. A da a xandunsunbu. 28 Muusa da Tunka Duumanten ɲaamarindixannun su kiɲandi Haaruna yi : digaame su Muusa ga n xawa a kiɲandini, a do kaawafiinu beenu su ga n xawa ɲaŋiini.

29 Ken falle, i filli su daga na Banisirayilaganko xirisun taaxundi. 30 Tunka Duumanten ga da digaame su ko Muusa da, Haaruna da a su saagandi i da, na kaawafiinu ku xa dabari jaman jon ŋa. 31 Jaman saxu i ya. Banisirayilaganko da a faamu nan ti Tunka Duumanten wa i deemana, baawo, a da i tooran wari. I tusi kuŋa, na Tunka Duumanten batu.