[Banisirayilaganko laawareyen xibaare]
5
Ken dangi falle, Muusa do Haaruna daga Firawunan ɲi. Ken moxo ya ni, i ti a da : « Tunka Duumanten daali, Isirayila Alla, nan ti, an na i seron wara dagana gunjuran ŋa, i wa yaaxaraxureyen dabarini i da non ŋa. » 2 Firawunan ti : « Manne ? Na Banisirayilaganko wara telle ? Ken Tunka Duumante xa ni ko yi ? Nke wa ken terinkana ba ? Aayi ! N nta Tunka Duumanten tu ! Ayiwa in nta axa walla dagana. » 3 Muusa do Haaruna ti : « Habaraanigankon Alla da du koyi o yi. An na o wara, o na daga ! O wa bito sikki terende tereene gunjuran ŋa, o na xurusindi non ŋa Tunka Duumanten da, o Alla.* Ken ga fe, a wa o katta ti taawoonen ŋa, ma xa fitina. » 4 Misira tunkanyugon ti i danŋa : « Muusa ! Haaruna ! Axa na a mulla na Banisirayilaganko fata gollini ya ? Manne xa ni ken ŋa kuŋa ? Xa daga axa gollen dabari ! 5 Jamaanen seren gabo saasa. Ee, axa wa a mulla i na i gollen wara ! »6 Ken koota su, Firawunan da Misiranko xiri, ku beenu gaa Banisirayilaganko koroosini gollun ŋa, a do Banisirayilaganko yinme golliɲansapan yinmanko. A da i ɲaamari ti : 7 « Axa ɲi manen ya kinni Banisirayilaganko yi, i ga na ɲi tuufakatiini. Aaha ! Xa n maxa fo kini i ya keeta ! Saasa ke, i yinme nan saage manen muurunu ! 8 Xa ken do i fi su, i na tuufanjaati baane ke ya katta ! Fo nta bakka a yi ! Ku sero ni lenburun ya ! Ken ya n sigi i gaa wuunu ti : “ O n daga, o na sadaxindi o alla da. ” 9 Xa da gollen do golliwaxatin gabondi i kanma, kuudo i nan mungu do ku gaaro yi ! »
10 Gollikoroosindaano ku do Banisirayilaganko golliɲanyinmankon bogu tunkanyugon noqu, nan daga a sefon kiɲandi Banisirayilaganko yi. I ti : « Ayiwa, Firawunan ga da fo be ko : o ntaxa mane kinni axa yi. 11 Xa yinmenu n daga a muuru, axa gaa a kitta noqu be. Axa nan xawa koota su tuufanjaate ke xa ya katta mene ! »
12 Ayiwa sa, Banisirayilaganko saage dagana doorinyiganden muuru do noqun su yi, do a nan ri. 13 Misiranka koroosindaanon wa do i batte : « Xa da a jewondi, xa nan duguta keeta ! Koota su, axa na tuufanjaati baane ke ya dabarini, xo bire be o ga ɲi manen kinni axa yi ! » 14 Banisirayilaganko golliɲanyinmankon wa katiini, i ga da ku beenu sugandi. An na i mugu : « Axa ma tuufan tinmandi daaru do lenki su, xoyi waxati danginte ke. Ken xa ni manne yi ? » 15 Banisirayilaganko golliɲanyinmankon na ri wu Firawunan ŋa : « Manne saabu da an gaa o toorono kundu ? 16 Manen ntaxa kiniini o yi, i na ti o na tuufan katu, ke su kanma, o wa katiini. Ah, an jama ke jalagi de ! » 17 Firawunan ti : « Lenburun ya ni axa yi ! Iyo, lenburun ya ni axa yi ! Ken ya saabu da axa gaa tini : “ O n daga sadaxan kinni Tunka Duumanten ŋa ! ” 18 Saasa ke, xa daga gollen ŋa ! Sokke ntaxa kiniini axa yi, koota su tuufanjaate ke xa ya n katiini mene ! » 19 Banisirayilaganko golliɲanyinmankon da a wari nan ti xotoyen wa i kanma, baawo i tini ma i gan da koota su tuufan ya katu.
20 I nda ɲi bakka Firawunan noqu, i na jonkoyi Muusa do Haaruna yi, kun gaa i dukku. 21 Golliɲanyinmankon na ti i da : « Tunka Duumanten gan na axa ɲangollen wari ! A na axa tuga ! Axakun ya saabu da o ga saage tinmi Firawunan do i wuretaaxaanon ŋa. Axa da kaafa ro i kittun ŋa, ti i na o kari ! »