6
Tunka Duumanten daali Muusa da : « Aahan, a siro, saasa ke, n gaa ke be ɲaana Firawunan ŋa, an na a wari. A wa Banisirayilaganko walla senben ŋa, a wa i xatana bakka i jamaanen ŋa xa mene, senben ŋa ! »2 Alla daali Muusa da xadi: « Nke ya ni Tunka Duumanten ŋa. 3 N da du koyi Ibirahiima yi, Isiyaaxa yi, a do Yaaxuba yi, ti in ya ni Alla Raniyaanan¤ ŋa. Xa, n ma in toxon tuyindi i ya, Tunka Duumante.* 4 N da laayidun wutu i da. N da i jigindi ti in wa Kanaana jamaanen kinni i ya, i ga ɲi taaxunu noqu be yi xo mukkunu. 5 Saasa ke, n da Banisirayilaganko hanmirafin mugu, nan ti i wa komaaxun ŋa Misiranko maxa. N tuwaaxun wa in laayidu wutunten ŋa i da. 6 Ken kuŋa daga, ti Banisirayilaganko da : “ Nke, Tunka Duumante, n wa axa bakka Misira senben gollun ŋa, na axa bogu komaaxun ŋa, na axa laawara ti in senben do in yanganxata xooron ŋa. 7 Axa wa riini a faamu ti inke ya ni Tunka Duumanten ŋa, axa Alla, ke be ga da axa bagandi Misira senben gollun ŋa. 8 N kuna ti jamaane kuyen ŋa Ibirahiima da, Isiyaaxa, a do Yaaxuba da. Ayiwa, n na axa rondini jamaane ke yi ya, a wa ɲaana axa xalle yi xa. Tunka Duumanten ni inke ya. ” » 9 Muusa daga ku digaamu kiɲandi Banisirayilaganko yi, xa i ma a terinka, baawo i jikkirankuti komaaxu xote ke be gaa i kanma yi ya saabu da.
10 Tunka Duumanten daali Muusa da xadi : 11 « Daga, ti Misira tunkanyugo Firawunan da, a na Banisirayilaganko wara bakka i jamaanen ŋa. » 12 Muusa jaabi Tunka Duumanten da : « Hari Banisirayilaganko yinme ma in terinka. Yaala Misira tunkanyugon katta in terinkana kan moxo ? N raqen ma kare ken da.¤ » 13 Tunka Duumanten da Muusa do Haaruna ɲaamari ti : « Xa daga doome, axa na Banisirayila yinmankon do Misira tunkanyugo Firawunan xibaari ti, ma in ga da Banisirayilaganko bagandi Misira jamaane ke yi. »
[Muusa do Haaruna seri fano]
14 Banisirayilaganko fonlaqun xirisi fanon faayi : Isirayila sooma Rubeeni renmun faayi : Hanooxi do Paalu, Hecerooni do Karimi. Kun ni Rubeeni xabiilanun ya yi. 15 Simoona xa renmun faayi : Yemuyeeli, Yamiina, Wahaadi, Yaxiini, Sohaara do Kanaanaganka yaxaren renme Sawulu. Kun ni Simoona xabiilanun ya yi.
16 Leewi renmun faayi, a bonsonŋun ga da me batu moxo be : Geresooni, Xehaati, a do Meraari. Leewi yinme da kame do tanjikke do siino ɲeri ya bire. 17 A renme Geresooni da Libini saara, na Simeyi saara. Kun ni a renmun ya yi. 18 Xehaati xa renmun ni Hamuraamu, Yicaari, Heburoona, a do Wujeeli. Xehaati da kame do tanjikke do siino sikki ya bire. 19 Meraari xa renmun ni Mahali do Muusi. Ku ya ni Leewi xabiilanun ŋa, i ga da me batu moxo be.
20 Hamuraamu da i baayi yaxi, ken toxon ni Yoxibeedi. A da Haaruna saara a da, na Muusa saara a da. Hamuraamu da kame do tanjikke do siino ɲeri ya bire. 21 Yicaari xa renmun ni Xaaruuna, Nefege, a do Jixiri. 22 Wujeeli xa renmun ni Miseeli, Yelicafaani, a do Sitiri. 23 Haaruna da Yeliseeba yaxi, Hamidaabu ren yaxare, Nahasooni gidanyaxaren ya ni. A da Nadaabu saara a danŋa, na Habiiyu saara, na Lajaari saara, na Yittimaara saara.* 24 Xaaruuna renmun ni Hasiiri, a do Yelixaana do Habisaafu. Kun ni Xaaruuna xabiilanun ya yi. 25 Haaruna renme Lajaari, a da Putteli ren yaxare yogo yaxi, ken da Pinaasi saara a danŋa. Ku ya ni Leewi xabiilanun xirisun ŋa.
26 Ken Haaruna do ken Muusa ya ni, Tunka Duumanten ga da i ɲaamari ti : « Xa da Banisirayilaganko bagandi Misira yi, fonlaqe ti fonlaqe xo kure. » 27 I dantaxi Firawunan da kuŋa, Misira tunkanyugo, gelli a ra gaa Banisirayilaganko walla bakka i jamaane ke yi.