Bakke 7

Tunka Duumanten xa daali a da kuŋa : « Dugu de ! N wa an ɲaana yaaxon ŋa xo Alla, an waaxi Haaruna na ɲa an danŋa faare yi. 2 N ga da an ɲaamari fo wo fo yi, an na a su ko a danŋa. Ken falle, aken ya ni a kiɲandini Firawunan ŋa, a na wara bakka i jamaanen ŋa. 3 Xa in wa Firawunan killun xotondini. N wa in taagumansun do in kaawafiinun gabondini Misira jamaane ke noxon ŋa. 4 Maxa a faayi de ! Firawuna ke nta axa terinkana xa de ! N na in kitten saxu Misira kanma kuŋa. N na in sero Banisirayilaganko bagandi fonlaqe ti fonlaqe xo kure, Misira jamaane ke yi ti in senben do in yanganxatan ŋa. 5 Misiranko wa a faamunu nan ti inke ya ni Tunka Duumanten ŋa bire be in ga na in kitten banba i kanma, na Banisirayilaganko bogu i naxa. »

6 Tunka Duumanten ga da Muusa do Haaruna ɲaamari ke be yinme yi, i da ken ya ɲa. 7 Muusa wuyin ɲi tansege siine yi, Haaruna ɲi tansege do siino sikki yi, bire be i gaa sefene Firawunan da.

[Dokkon ɲanŋe samaqe yi]

8 Tunka Duumanten daali Muusa do da : « Firawunan ga na ti axa danŋa : 9 “ Xa da kaawafi dabari kuŋa ”, an na ti Haaruna da : “ An dokkon wutu, an na a sedi Firawunan jon ŋa, dokkon na ɲa samaqe. ” » 10 Muusa do Haaruna daga Firawunan ne. Tunka Duumanten ga da i ɲaamari moxo be, i da gollun ɲa ken moxo yi. Haaruna da i dokkon sedi Firawunan do i golliɲaŋaanon jon ŋa, dokkon yille samaqen ŋa. 11 Firawunan xa da Misira tuwaanon do batutagumun xiri, kun korotigumu xa da ku meenu dabari ti batutan ŋa. 12 I du baananbe su da i dokkon sedi ɲiiɲen ŋa, a yille nan ɲa samaqen ŋa. Xa Haaruna dokkon da i xallun toni. 13 Xa ken do i fi su, Firawunan kiilen xoten ya ni : a ma Muusa do Haaruna terinka xo Tunka Duumanten ga da a ko moxo be.

[Jin ɲanŋe fore yi]

14 Tunka Duumanten daali Muusa da : « Firawunan kiiludunxotaaxu : a bara jaman walla dagana. 15 Daga katta Firawunan ŋa gelli yillen ga na kare tannu, an na a dugu Niili fanŋen raqen ŋa bire ke be a gaa bakka nan yaala fanxannen ŋa. Dokko ke be gaa ɲaana samaqen ŋa, a wutu an kitten ŋa. 16-18 Ti Firawunan da : “ Tunka Duumanten da in xayi an ŋa, Alla, nan ti an danŋa : ‘ N seron wara telle, kuudo i na in batu gunjuran ŋa. ’ Xa harisa an ma a terinka. Ayiwa in wa fanŋen jin sanpana ti ke dokko be gaa in kitten ŋa, a na yille foren ŋa. Jiidufon su na kara, fanŋen jiinun na timi, Misiranko na kori a jin minni. Tunka Duumanten daali : ‘ Ku saabu da, an wa a tuunu nan ti inke ya ni Tunka Duumanten ŋa. ’ ” »

19 Tunka Duumanten daali Muusa danŋa : « Ti da a na i dokkon wutu, na i kitten do a futtu Misira jiinun kanma, na a wutu fanŋu, jiwurankillu, a do xaaro, kafiini ji su gaa Misira ɲiiɲen ŋa, a su na ɲa fore, Misira jamaanen su na ɲa fore, hari i minilallun noxo, a su na ɲa fore ! » 20 Tunka Duumanten ga da Muusa do Haaruna ɲaamari moxo be, i golli kundun ya. A da dokkon wutu kanmu, na fanŋen jin sanpa Firawunan do i jaman su jon ŋa. Fanŋen jin su yille foren ŋa. 21 Ɲexon su kara, a jin moti, Misiranko kori a minni. Misira jamaanen su ɲa fore yi. 22 Xa Misira korotigumun xa da ken me dabari ti i batutan ŋa. Firawunan kiilun xosi tallan xoto. A nta Muusa do Haaruna terinkana, Tunka Duumanten xa da a ko kundun ya yi. 23 Firawunan saage katta i dingiran ŋa, a ma ken fi raga soobe yinme yi. 24 Misiranko saage gedun soxono do fanŋen xannen ŋa, kuudo i na miniji kita, baawo i ra nta fanŋen jin minni.

[Fantanjallaane]

25 Bito ɲeri dange falle, 26 Tunka Duumanten daali Muusa da : « Daga Firawunan ne, an na ti a da : “ Tunka Duumanten daali : ‘ N seron wara dagana, kuudo i na in batu. 27 Selli harisa an gaa balla i walla dagana ya, nke Tunka Duumante, n wa an ɲiiɲen su katta ti jallaanen tooran ŋa. 28 Fanŋen wa fakka jallaanen ŋa, i wa segene nan ro do an kan ŋa, i wa roono an kan ŋa, nan ro an konpon ŋa, ma an saxura, nan ro an jaman kaanun noxo, an jaman muuman ne, fuurunun noxo, a do an buurukatiyokkun noxo. 29 Anken do an jaman do an jamaanen su, fantanjallaanen nan sege axa kanma. ’ ” »