8
Tunka Duumanten daali Muusa da : « Ti Haaruna da : “ An kitten do dokkon banba fanŋun do jiwurankillun do xaaron su kanma, na fantanŋun segendi katta Misira jamaanen ŋa. ” » 2 Haaruna da i kitten banba Misira jiinun kanma, fantanŋen sege na Misira ɲiiɲen su faga. 3 Xa korotigumun da ken me dabari ti batutan ŋa : i da fantanŋen segendi katta Misira ɲiiɲen ŋa.4 Firawunan da Muusa do Haaruna xiri, nan ti i da : « Xa da Tunka Duumanten ɲaaga, a na fantanjallaanen laatondi bakka in do in koren su yi, n na jaman wara dagana xurusindi Tunka Duumanten da. » 5 Muusa jaabi Firawunan da : « Waxati xerexere in danŋa, n gaa ɲaagandini an do an jaman danŋa, do an jamaanen danma, kuudo fantanŋen na sanku bakka an dingiranun do an kaanun su noxon ŋa. Fanŋen noxon ga fe, a ntaxa toqo noqu su. » 6 Firawunan ti : « Xunbane su ». Muusa jaabi : « Baawo an yinme ga da ken ko, kuudo an na a tu ti Tunka Duumante, o Alla, do fo wo fo nta baana. 7 Fantanŋen wa laatoono bakka an do an kaanun ŋa, a do an jama, kafiini an jamaanen su yi. Fantanŋe nta toqo noqu su, fanŋen noxon ga fe ».
8 Muusa do Haaruna bogu Firawunan ne, Muusa da Tunka Duumanten ɲaaga fantanŋen sankuyen ŋa, kuudo na Firawunan bogu ken liixiye yi. 9 Tunka Duumanten da a rakutu xo Muusa ga da a muuru moxo be : fantanŋen su kara bakka kaanun do debun noxo, a do gunnen su yi. 10 I da fantanfuren sagara na a ɲa juruminda-juruminda. Timi buren da jamaanen su xufaari. 11 Bire be Firawunan ga da a wari ti i da i yinme kita, a kiiludunxotaaxu xadi, a ma i terinka, xo Tunka Duumanten ga da a ko moxo be.
[Sirime]
12 Tunka Duumanten daali Muusa da : « An na ti Haaruna na i dokkon banba na ɲiiɲen seyijuran sanpa ti a yi, Misira seyijuran su na ɲa sirimen ŋa ». 13 A ɲa kundun ŋa : Haaruna da i dokkon banba na ɲiiɲen seyijuran sanpa, sirimen ware seron do naaburu siginton ŋa, Misira seyijuran su yille nan ɲa sirimen ŋa. 14 Korotigumun xa ti i wa a me dabarini ti i batutan ŋa, xa i konto. Sirimen sanqi seren do fonmuumen su yi. 15 Korotigumun ti Firawunan danŋa : « Ke na allandoronme ya yi. » Xa Firawunan kiilun xoten ya n finna. Xo Tunka Duumanten ga da a ko moxo be, a ma i terinka.
[Suwankanbante]
16 Tunka Duumanten daali Muusa da : « Suxuba fana, an na giri nan daga du koyi Firawunan ŋa, bire be a gaa bakka katta jinxannen ŋa. An na ti a danŋa : “ Tunka Duumanten daali : ‘ N seron wara dagana, kuudo i na in batu. 17 An ga nta in seron walla dagana, n wa suwankanbanten walla an ŋa, na a wara an jaman ŋa, do an jamaanen su, na an kaanun do Misiranko kaanun su faga suwankanbanten ŋa, hari ɲiiɲanbaran xa wa fakka. 18 Ken koota, n wa Goseni maran kisini, n seron sabatinten gaa noqu be yi. Suwankanbanten nta ɲaana non ŋa, kuudo an na a tu ti inke Tunka Duumante, n yinme ya na jamaane ke yi. 19 N wa in seron do an seron bakka me yi. Ken kaawafi taagumansen wa ɲaana xunbane. ’ ” » 20 Tunka Duumanten da a ɲa ken moxo ya. Suwankanbanten ro Firawunan kan noxo, do a jaman kaanun noxo, kafiini jamaanen muuman su yi. Suwankanbanten da jamaanen xaaxa.
21 Firawunan da Muusa do Haaruna xiri, ti i danŋa : « Xa daga xurusindi axa Alla danŋa jamaane ke yi. » 22 Muusa jaabi : « A nta ɲaana kundu, baawo oku gaa xurusinde be ɲaana Tunka Duumanten danŋa, o Alla, ken ni Misiranko danŋa xosen ya yi. Ee, oku ra wa i xosen dabarini i yaaxon ŋa, i ga ma o gididunwara ba ? 23 O n xawa bito sikki terende tereene gunjuran ŋa, o na xurusindi Tunka Duumanten da, o Alla, a wa a ɲanmoxon koono o danŋa. » 24 Firawunan ti : « Nke Firawuna, n wa axa walla dagana xurusindi gunjuran ŋa Tunka Duumanten danŋa, axa Alla. Ganta, axa maxa laato buru de ! Xa, xa ɲaaga in danŋa fina. » 25 Muusa jaabi : « Ee, a siro, n wa bakka an ne, n na Tunka Duumanten ɲaaga, suwankanbanten na laato an do an jaman do an jamaanen ŋa xunbane su yi. Ganta Firawuna, maxa janbe xadi de ! An gaa balla jaman walla dagana xurusindi Tunka Duumanten danŋa. »