[Daabankalle]
9
Ken dangi falle, Tunka Duumanten daali Muusa da : « Daga Firawunan noqun ŋa nan ti a danŋa : “ Tunka Duumanten daali, Habaraanigankon Alla, an na i seron wara dagana kuudo i na i batu. 2 Selli harisa an gaa balla i walla dagana ya, an gaa finna tigitini i yi ya, 3 Tunka Duumanten kitten na saxu an naaburu siginton kanma na i toxo an teenun noxon ŋa : siinu, faru, ɲogomo, naanu, do tanmiso. A ɲaana kasaara xoore xa ya yi de ! 4 Tunka Duumanten wa fatanpansiyen roono Banisirayilaganko naaburun do Misiranko naaburun naxa. Hari baane nta kalla bakka Banisirayilaganko naaburun ŋa. 5 Tunka Duumanten da waxatin xa ya rakutu mene, nan ti xunbane su, Tunka Duumanten wa ken ɲaana jamaanen noxon ŋa. ” »6 Ken yillakaran yinme de, Tunka Duumanten da ken dabari. Misiranko naaburen su kara, xa hari baane ma kara Banisirayilaganko naaburun ŋa. 7 Firawunan faarun daga koroosindi, i ma a ɲi hari baane ga kara Banisirayilaganko maxa. Firawunan kiiludunxotaaxu : a ma seron wara dagana.
[Funbuune]
8 Ken dangi falle, Tunka Duumanten daali Muusa do Haaruna da : « Xa da kitti fakko filli kindunxame wutu, Muusa na a woyi Firawunan jon ŋa. 9 A ɲaana xoben ya yi Misira jamaanen danman kanma, ken wa saareene ti funbuunen ŋa, Misira jamaanen muuman su yi, a seren do a fonmuume. » 10 I da kindunxamen wutu nan daga sigi Firawunan kaane. Muusa da a sanqi kanmun ŋa, ken xosi yillekare ti funbuunen ŋa, seren do fonmuumen su yi Misira jamaanen danma. A ɲaŋo nan ɲa tugu xalantanŋen ŋa. 11 Funbuunen saabu da korotigumu kun konto sikki Muusa kaane yinme. Funbuunen sanqi Misira muuman su ya yi. 12 Tunka Duumanten yinme ya n da Firawunan kiilun xotondi. Xo Tunka Duumanten ga da a ko moxo be, a ma i terinka.
[Maramalle]
13 Tunka Duumanten daali Muusa da : « Giri suxuba fanan ŋa, an nan sigi Firawunan kaane nan ti a da : “ Tunka Duumanten daali, Habaraanigankon Alla : ‘ N seron wara dagana kuudo i na in batu. 14 Baawo ke kille, n wa bonen moxonman su xayini katta an do an jaman ŋa, kafiini an jamaanen danman ŋa, ke ni ya, kuudo an na a tu ti fo wo fo nta xoyi inke moxon ŋa ɲiiɲe ke kanma. 15 N gan da in kitten wara katta an ŋa na an katu ti taawoonen ŋa, an do an jaman ɲi buruxeene ɲiiɲe ke kanma yi ya. 16 Xa kuudo an na in katudanŋen tu, ken saabu da in da an wara bireene, n toxon xa na tuyi ɲiiɲen kanma. 17 An wa finna dankana in seron waranden ŋa. 18 Xa xunbane dan ke waxati, n na maramallen texendi, Misira taaxe do saasa naxa, ke be me ga ma ɲaŋi. 19 Saasa ke, ronoqu muuru an naaburun danŋa do an marefon tana. Ken ga fe seron do fonmuumu beenu gaa gunnen ŋa, i ga ma ri kaanun ŋa, maramallen na i katta ya ma i ga kara. ’ ” »
20 Firawunan jama be ga jooti Tunka Duumanten daalen ŋa, kun da roraqe muuru i do i golliɲaŋaanon do i naaburun danŋa kaanun noxon ŋa. 21 Ku beenu ga ma Tunka Duumanten daalen raga soobe yi, i do i golliɲaŋaanon do naaburun toxo gunnen ŋa. 22 Tunka Duumanten daali Muusa da : « An kittun koyi kanmun ŋa maramallen nan texe Misira su kanma, seron do naaburun kanma, Misira gunnen funtifon su kanma. » 23 Muusa da i dokkon fuutu katta kanmun ŋa. Tunka Duumanten da maramallen do falanqaaɲiyen wara, kanmen yiden wa yanqana ɲiiɲen kanma. Tunka Duumanten da maramallen texendi Misira jamaanen su kanma. 24 Maramallen do kanmen yiden gaa doome, Misira jamaanen ma demu na a me fo kasape wari gelli Misira taaxen gaa xabiila baanen ŋa. 25 Misira jamaanen danma, maramallen da a su katu, fo wo fo ga ɲi gunnen ŋa : seren do naabure, funtifo, yitte, maramallen da a su wara me yi. 26 Maramallen ma noqu goori jamaane ke danman ŋa Goseni ga fe, Banisirayilaganko gaa noqu ke be yi.
27 Firawunan da Muusa do Haaruna xiri ti i danŋa : « Ke kille ken ke, n da Tunka Duumanten kuta. Tunka Duumanten ya teleŋonten ni, nke do in jama ke, o jalagi. 28 Xa da Tunka Duumanten ɲaaga, ke maramalle do ke falanqaaɲiyin danbe wase ke yi keeta. N wa xa walla dagana, xa ntaxa dallana keeta. » 29 Muusa jaabi : « Deben boguraqen ŋa, n na in kittun boyi, na Tunka Duumanten ɲaaga falanqaaɲiyen na sigi, maramallen ntaxa yereene, kuudo an na a tu ti Tunka Duumanten ya fo ni ɲiiɲen ŋa. 30 Xa anken do an jama ke, n wa a tu ti axa nta kanna Alla yi harisa, Tunka Duumante. » 31 Kotollen do yillen¤ bono, baawo yillen do i jogoden ya n ɲi, kotollen xa do fuugen ya n ɲi. 32 Xa soxofo leelanton ma bono, baawo ikun ma ɲi ga kiɲe.
33 Muusa bogu Firawunan noqu debinnoxon ŋa na i kittun wutu katta Tunka Duumanten ŋa, falanqaaɲiyen do maramallen sigi, kanme maxa texe ɲiiɲen kanma. 34 Firawunan da a wari : kanme, maramalle, falanqaaɲiye, i su kuti. Firawunan do i jaman da Tunka Duumanten kuta xadi. 35 Firawunan kiiludunxotaaxu harisa : xo Tunka Duumanten ga da a daali Muusa da moxo be, a ma Banisirayilaganko wara dagana.