[Buure]
10
Ken dangi falle, Tunka Duumanten daali : « Daga katta Firawunan ŋa, a do i jama, baawo inke ya n da i kiilunun xotondi. N na in kaawafin taagumansen koyi i ya, 2 kuudo an na a laxami an renmen da, a xa na a laxami i renmun da, n ga sanga ti Misirankon ŋa moxo be, na in battun toxo i ya, kuudo axa na a tu xadi nan ti inke ya ni Tunka Duumanten ŋa. »3 Ayiwa, Muusa do Haaruna ro katta Firawunan ŋa ken falle nan ti a da : « Tunka Duumanten ya n daali, Habaraanigankon Alla, nan ti : “ Yaala an finna balla an du roxondini i danŋa ya ba ? Ayiwa, an na in seron wara i nan daga in batu. 4 Harisa an gaa finna balla in seron walla dagana, xunbane su in wa buuren janbana an jamaanen ŋa. 5 A wa jamaanen fakka ma an ga kori ɲiiɲen faayini buuren maxa. Maramallen ga da kutte be toxo axa maxa, a na ken su yiga, axa teenun yittun ga da deri kurunba be wutu maramallen falle, a na a su yiga, 6 a na an kaanun faga, na an jaman kaanun faga, na Misira jamaanen kaanun su faga. An faabanu ga ma ke be me wari abada, an faabanu faabanu xa ga ma ke be me wari gelli i nan bange duna yi, nan ri a wara lenki ke koota yi. ” » Muusa da i falle koyi nan bogu Firawunan ne.
7 Firawunan jaman ti a da : « O bakka ke sere jaaraben ŋa kan bire ? Sero ku wara dagana i Tunka Duumanten batu, i Alla. Keeta anken ma a tu nan ti Misira faayi kareene ya ? » 8 I da Muusa do Haaruna kiɲa Firawunan ŋa. A ti i da : « Xa na daga Tunka Duumanten batu, axa Alla. Xa in na axa tirindi fina : ko do ko n telle ? » 9 Muusa jaabi : « O do o leminun do o xirisu, o do o ren yugun do o ren yaxaru, o do o naaburu, fo mison do fo xooro. Baawo ke na oku maxa sallen ya yi Tunka Duumanten danŋa. » 10 A ti i da : « Nke na axa do axa renmun wara dagana, nan ti “ xeeri wa do axa batten ŋa ” ? Ku ŋanniyi buru gumu ku ! 11 Fiinun nta xosini ɲaana kundu de ! Axakun yugu nan daga Tunka Duumanten batu sa, baawo, axa na ken ya muurunu wo. » I da i xata bakka Firawunan ne.
12 Tunka Duumanten daali Muusa da : « An kittun wutu Misira kanma na buuren xiri, a nan kandunbiiri Misira kanma, na funtifon su yiga, maramallen ga da fo wo fo su toxo. » 13 Muusa da i dokkon fuutu katta Misira jamaanen kanma yi. Tunka Duumanten da kinbakkanfanken girindi ken kiye muuman do ken wuro muuman ŋa. Yillen gaa kareene, fanken da buuren gana riini. 14 Buuren kandunbiiri Misira jamaanen kanma, nan yanqa do Misira jamaanen noqun su yi. Buure ma demu gabono abada xo ke, gelli gannin xase ma lenki, a me xa ntaxa ɲaana xadi. 15 A xufi jamaanen muuman ŋa na ɲiiɲen finandi. Maramallen ga da funtifo su toxo jamaanen ŋa, a do yittirenmu, buuren da a su yiga na a ɲama. Dere ma toxo yitte yi, funtifo su ma toxo Misira gunnen ŋa buuren ga ma a yiga.
16 Ma Firawunan nan xoroti, a da Muusa do Haaruna xiri karama, nan ti i da : « N da Tunka Duumanten kuta, axa Alla, na axa xa sooxi. 17 Saasa ke, axa da haqu toxo in danŋa ke ta yi xadi. Xa da Tunka Duumanten ɲaaga, axa Alla, a na a faayi na ke toora kasape girindi bakka in kanma tan. »
18 Muusa bogu Firawunan ne, na Tunka Duumanten ɲaaga. 19 Tunka Duumanten da kinxennanfanka xote girindi, na buuren gana dagana, na a yonto katta Xulunjuumufanŋen¤ ŋa. Hari buuru funsi baane ma toxo Misira ɲiiɲen kanma. 20 Xa ke su kanma de, Tunka Duumanten yinme ya n da Firawunan kiilun xotondi. Banisirayilaganko ma ware harisa.
[Bitanbinne]
21 Ken falle, Tunka Duumanten daali Muusa da : « An kittun wutu kanmun ŋa, bitanbinnen nan ro Misira jamaanen ŋa, bite be, ma seron ga toxo meemendini. » 22 Muusa da i kittun wutu kanmun ŋa, biten ro. Bito sikki, Misira jamaanen muuman su wa bitanbinnen ŋa. 23 Kun bito sikki, sere su ma hari i waaxin wari, sigaali nan daga noqu tana yi ken ke. Xa Banisirayilaganko ga ɲi noqu be yi, xurayen ya n ɲi non ŋa.
24 Firawunan da Muusa xiri ken falle nan ti a da : « Xa daga ! Xa na Tunka Duumanten batu, axa renmun xa ra wa dagana do axa batten ŋa. Ganta axa naaburun baane, i fo roxon do i fo xooro, kun kun toqo yere ya de ! » 25 Muusa jaabi : « An ya ni sadaxon kinni o yi ba ? Ma an ya ni sadaxa xuruminten kinni o yi, an gaa tini o do o naaburun nta telle ? Ayiwa ken nta ɲaana, o do o naaburun telle ya. Hari xoqi baane¤ nta toqo. 26 Baawo, o xurusindini Tunka Duumanten da bakka o naaburu ku ya yi, o Alla. Oku yinmenu nta a tu saado o gaa kiɲene non ŋa, o ga n xawa ke be sadaxini Tunka Duumanten da. » 27 Xa ke su kanma, Tunka Duumanten yinme ya n da Firawunan kiilun xotondi, a ga nta duŋeene i walla dagana. 28 Firawunan ti Muusa da : « Giri bakka in wure, an nan sabari haan ! An nan maxanɲa, maxa taŋe in ŋa keeta de ! N ga na an wari in jon ŋa koota su, an na kara ! » 29 Muusa jaabi : « Xoyi an ga da a ko moxo be, an ntaxa in taŋon walla. »