[Misira yanganxatanun lagare]
11
Tunka Duumanten daali Muusa da : « N wa tooxi lagaren roono Firawunan ŋa, a do Misiranko su. Ken falle, a wa axa walla dagana bakka yere yi. Dagaye ke yinme wucen noxon ŋa, a wa xorotini axa yi na axa xata bakka yere yi bogobogo. 2 An na ti koren da kuŋa : yugo su nan kittirakoyi i me yugo yi, yaxare su nan kittirakoyi i me yaxare yi, na kanɲaagaarun do xaalisixullinɲaagaarun muuru i ya. » 3 Tunka Duumanten da sarandoroken ro i ya Misiranko naxa. Muusa ken yinme xa ni seri xooren ya yi Misira jamaane ke noxon ŋa, a do Firawunan jaman maxa, kafiini Misira renmen su yi.4 Muusa jaabi Firawunan danŋa : « Kundun ya ni Tunka Duumanten ga daali nan ti : “ Wuron kaananan ŋa, n wa roono do Misira noxon ŋa. 5 Misira jamaanen renyugu fanan su wa kalla. Na a wutu Firawunan renyugo be ga n xawa taaxunu a batten ŋa, nan daga a wara tunbaare be gaa gollo renyugu fana, do naaburun renyugu fano, a su wa kalla. 6 Sonqo xooren na sigi Misira jamaane ke yi, a me ga ma demu ɲaana, a me ga ntaxa ɲaana xa. 7 Xa Banisirayilaganko kaara, hari wulle nta foxunu daaba yi¤, sigaali sonqoxanne na bogu. Ken ni ya, axa na a tu ti Tunka Duumanten da Misiranko do Banisirayilaganko fata bakka me yi. ” » 8 Muusa ti Firawunan da xadi : « Jama ke be gaa an batta na ri tusi in jon ŋa, nan ti in da : “ Giri o wure, an do an jaman nan daga ! ” N na xosi bogu ken bire. » Muusa mamanten xosi godo bakka Firawunan noqu.
9 Ken sigira su, Tunka Duumanten daali Muusa da : « Kuudo in na in kaawafiinun gabondi Misira jamaane ke noxon ŋa, Firawunan nta axa terinkana. » 10 Muusa do Haaruna da ke kaawafi su kiɲandi Firawunan ŋa. Xa Tunka Duumanten yinme da Firawunan kiilun xotondi ya, a ma Banisirayilaganko wara bakka i jamaane ke yi.