[Pesaxansalle]
12
Tunka Duumanten daali Muusa do Haaruna da Misira jamaanen noxon ŋa : 2 « Ke xaso kundu ɲaana axa danŋa xasu fanan ya yi, axa siinen jopaadi. 3 Axa na ti Banisirayilaganko danŋa : “ Ke xaso tanmu, fonlaqe su, ma ka su na tanmise bagandi. 4 Fonlaqe be ra ga nta tanmisa muuma yigana, an do taaxanlenma be ra gaa tanmise yigana na kafi, axa seran jaatun gaa moxo be. Be su ra gaa ke be yigana, axa na ken ya jaatene na tanmisen sugandi. 5 Axa gaa tanmise be bagandini, a nan ɲa digen ya yi de, leebu ga nta a yi, a na siine baga. 6 Axa na a mara ma ke xaso tanmun do naxato. Ken koota futuro, Banisirayilaganko su na me ɲi na i xurusi. 7 Axa na i foron wutu, i tiyen ga yige ka su yi, xa na foro ku suusa ganlaqe gondomon filli yi, a do taŋere. 8 Axa na tiye ke biyi ken wuro su yi, na a do buuru lewiirintanŋen yiga, buuru be lewiiri ga nta a yi, a do deri xaxacu. 9 Tiye ke xaye nta yigeene, a barabarante xa nta yigeene, a su biyini ya, hari yinmen do taanu, kafiini nuxudufoonu. 10 Axa maxa fo wuyindi. Fo be nda wuyi, axa na a sedi yinben ŋa. 11 Axa ga na ɲi a yigana, axa na axa naxaanun ya siitini, na axa tepunun rondi, na guman raga an kitten ŋa, axa na a yiga karama. Ken ni Pesaxansallen ya yi Tunka Duumanten da.12 « “ Ken wuro, n wa roono do Misira noxon ŋa, n wa jamaane ke ren yugu fanan su karini, na a wutu seron ŋa nan daga a wara ma daabanun ŋa. Ken moxo ya ni in gaa Misira munonun kiitindini. Nke ya ni Tunka Duumanten ŋa. 13 Xa, fore ke ya n ɲaana axakun da taagumanse yi. Axa gaa kaanu beenu noxo, n ga na fore ke wari, n na jalli i kanma, axa na kisi bire be taawoonen ga na ɲi xenne Misira yi.*
14 « “ Ken koota na ɲa axa danŋa sinme koota yi. Axa gaa ken ɲaana yaaxaraxureye yi, kuudo na Tunka Duumanten daro. Farilan ya ni axa kanma, na a wutu axakun ŋa ma axa sere lagaru, axa gaa ke yaaxaraxureye ɲaana abada.
15 « “ Bito ɲeri noxo, axa na buuru lewiirintanŋen ya yigana. Gelli koyen koota fana, axa na lewiiri sankundi bakka axa kaanun noxon ŋa. Sere su xa ga na a yiga kun bito ɲeri noxo, ken kaman nan xate bakka Banisirayila xabiilan ŋa. 16 Koyen koota fana, a do koota lagare, axa na me ɲi na in batu. Kun kooto yi, axa nta golle su dabarini. Ganta, axa ra wa axa yigandun sorono tan. 17 Axa wa buuru lewiirintanŋen sallen sallini kuudo axa na sinme do in ga da axa bagandi Misira yi xo kure koota be yinme yi. Ke salle ni farilan ya, na a wutu axakun ŋa ma axa sere lagaru, a gaa axa kanma abada. 18 Na a wutu siinen xasu fanan tanmun do naxaton koota futuron ŋa, axa na buuru lewiirintanŋen ya yigana nan daga a wara ma a tanpillen do baanen koota futuro. 19 Bito ku ɲeri noxo, lewiiri ma xawa ɲaana axa kaanun noxon ŋa. Mukken do debinlenma, sere su ga na buuru buukunten yiga, ken kaman nan xate bakka Banisirayila xabiilan ŋa. 20 Axa ma xawa fo wo fo yigana lewiiri gaa a yi, a ga da axa ɲi noqu su xa yi, axa na buuru lewiirintanŋen ya yigana. ” »*
21 Muusa da Banisirayilaganko xirisun su xiri nan ti i da : « Axa daga axa tanmisen raga axa fonlaqun danŋa, na Pesaxan xurusinden dabari, sallen saabu da. 22 Axa na yittiderun¤ wutu, na i duxumi xurusindiforo ku yi yokken noxon ŋa, na a suusa do kan roraqen gondomon filli yi, a do taŋere. Gelli ken bire ma yillen ga na kare, axa baananbe su nan maxa bogu i kan ŋa. 23 Tunka Duumanten wa roono Misira yi na kallen xenundi i ya. A nda foren wari ganlaqe be yi, a na dangi a yi : a nta kallemaliikan walla roono ken ka yi.
24 « Ke ni farilan ya, axa do axa bonsonŋun su ga n xawa a batta ma abada. 25 Bire be axa ga na ro Tunka Duumanten ga da jamaane be laayidun wutu axa da, axa na ke kille batu ma abada. 26 Axa renmun ga na axa tirindi a maanan ŋa, 27 axa na ti i da : “ Ke ni pesaxansadaxan ya, katta Tunka Duumanten ŋa, bire be a ga ɲi kallen xenundini Misiranko yi, a ga bonte Banisirayilaganko kanma na o kisi. ” »
Jaman tusi na i taŋon ro ɲiiɲen ŋa. 28 Tunka Duumanten ga da Muusa do Haaruna xayi i ya ti fo wo fo su ya yi, Banisirayilaganko da ken su dabari ti i moxon ŋa.
[Kaananansonqo]
29 Wuron kaananan ŋa Tunka Duumanten da Misiranko sooman su kari*, na a wutu Firawunan sooma be ga n xawa toorini a falle, nan daga a wara komo yugo be gaa kason ŋa sooma yugo, kafiini naaburu siginton ren fanon ŋa, a su kara. 30 Ken wuru baananne yi, Firawunan yinme giri, kafiini a jama, a do Misira su. Sonqo xooren bogu jamaane banŋe wo banŋe, baawo ka su nta no, fure ga ma bogu ka be yi.
[Forogoyi xoore]
31 Wuron kaanana, Firawunan da Muusa do Haaruna xiri nan ti i da : « Xa giri ! Axa nan bogu in jamaanen ŋa kafiini Banisirayilaganko su, axa nan daga Tunka Duumanten batu xoyi axa ga da a ko moxo be. 32 Axa naaburu ku xa be ga ni, i fo xooron do i fo miso, xoyi axa ga da a ko moxo be, xa da i su wutu axa nan daga ti axa yinme yi. Ayiwa, axa na axa Alla ɲaaga in danŋa. »
33 Misiranko da i yinme muuru Banisirayilaganko yi, i ti i nan daga karaman-karama. I ti du da : « O ga ma ku sero wara, o su ɲemeene ya ! » 34 Ken ya n sigi Banisirayilaganko do i farijura xootinten ga daga, hari a ma malaso. I da juranxollon siiti ti i yiraamun ŋa, na i saxu i kunkun ŋa, nan bogu. 35 Muusa ga da Banisirayilaganko ɲaamari ti fo wo fo su yi, i da a batu. I da ɲaagaarun muuru Misiranko maxa : kanŋen do xaalisixulle, kafiini yiraamu. 36 Tunka Duumanten da Misiranko duŋandi, i da Banisirayilaganko ku. I da Misiranko kiteyun su wutu ken moxo ya yi, na i kitti duurun toxo.*
37 Ken falle, Banisirayilaganko ware killen ŋa nan giri Ramuseesi katta Sukkoti yi, i wa kamo tunmi wujune (600 000) kurayugo bakka, jaman kute nta ke jaate yi. 38 Naaburu gabe ɲi do i batten ŋa, xabiila sagaranto tana xa ɲi do i batten ŋa. 39 I ga da i xata bakka Misira yi bire be, jawoyi bure saabu da, i ma katu farijuran malasoyen dukku, sigaali i na silifanda ken wutu. I da tufullen ya dabari, baawo i farijuran ma ɲi a ga malaso.
40 Banisirayilaganko da kamo naxati do tanjikke siine ya ɲa Misira taaxen ŋa. 41 Kamo ku naxati do tanjikken siine ga tinme koota be yinme ya ni, Tunka Duumanten jama ga bogu Misira jamaanen ŋa xo kure. 42 Tunka Duumanten ga da i bagandi Misira jamaanen ŋa koota be, a wuyi sikki i da. Isirayila bonsonŋun su xa nan xawa wuyini sikki a da ken koota yi siine su ma abada.
43 Tunka Duumanten daali Muusa do Haaruna da : « Pesaxansallen farilanun faayi : mukke su sunnante ga fe, a nta Pesaxan yiganden yigana. 44 Kome su ga xobe ti xaalisin ŋa, a sunnanten ga ni, a ra wa a yigana. 45 Mukke be gaa tolomadan ŋa, a do musungolliɲaŋaana, i ra nta a yigana. 46 Tiye ke yigeene kan noxon ya yi, fo wo fo nta bakka, a xottun nta kareene.* 47 Banisirayilaganko su na salle ke dabari. 48 Selli mukke gaa kafiini axa yi, a gaa a mulla i na Pesaxan salli Tunka Duumanten da, a na i kan yugon su sunnandi. Ken bire, a ra wa a yi na salle ke salli xo Banisirayilaganko moxo. Xa sunnantanbali su nan maxa a yiga. 49 Sariyan na ɲa baane, Banisirayilaganko do i mukkunun su kanma. »