[Sooma maxawaseye]
13
Tunka Duumanten daali Muusa da : 2 « Axa yaxare su ren yugu fanan ga na saare, axa na a sugandi inke Tunka Duumante da, baawo in ya xalle ni. Ken ni Banisirayilaganko do i naaburun su ya. »*3 Muusa jaabi Banisirayilaganko da nan ti : « Axa na axa haqilen toxo ke koota yi, axa ga bogu Misira komaaxun ŋa, baawo Tunka Duumanten da axa bagandi ti i senben ya. Ken kuŋa, xa maxa buuru buukunte yiga. 4 Axa bogu lenki ya, Habiibunxaso¤. 5 Tunka Duumanten ga da a laayidun wutu axa sere fanon da ti i wa ɲiiɲe be kinni axa yi, xattin do tamarileeman waranlaqen gaa non ŋa, Kanaanagankon do Heetigankon do Hamoorikaarankon do Hiiwikaaranko, a do Yebuusikaarankon ɲiiɲen ya ni. A ga na axa rondi non ŋa bire be, ke xaso sigi ta su, axa na bito ɲeri salle salli. 6 Kun bito ɲeri, an na buuru lewiirintanŋen ya yigana. Bita ɲerundin na ɲa Tunka Duumanten da salle. 7 Buuru lewiirintanŋen ya n yigeene bito ku ɲeri noxo, buuru be lewiiri gaa a yi ma xawa wariini an nen ŋa. Lewiirin n maxa wari an dingira su yi. 8 Ken koota, an na ke tuyindi an renmen ŋa, nan ti : “ Ke koota sababun ni, Tunka Duumanten ga da ke be ɲa o danŋa ya, o bakken ŋa Misira. ” 9 Ken salle na ɲa axa danŋa haqiliyanqande, xo taagumansen gaa axa kittun do axa taŋon ŋa, a banganten ga ni, kuudo Tunka Duumanten sariyan na duume axa raqun ŋa, baawo Tunka Duumanten da axa bagandi Misira yi ti senben ya. 10 Siine wo siine, axa na ke farila dabari i waxatin ŋa.
11 « Ken kuŋa, Tunka Duumanten ga na an rondi Kanaanaganko jamaanen ŋa xoyi a ga kuna ti a yi an do an faabanu da moxo be, a gaa riini a kini an ŋa, 12 fo wo fo su ga n an mareyen ŋa, haadamarenmen do naaburu siginte, an na a su ren yugu fanan kini Tunka Duumanten ŋa, a ya fo ni. 13 Farun ren fanon su, an na i maxawasa ti jaxanlenme. An ga ma i maxawasa, an na i xannun xoso. Xa haadamarenmun ren yugu fano, an koren noxo, an na i maxawasana ya. 14 Ken ŋa, a xunbanen-xunbane, an renmen ga na an tirindini nan ti : “ Ke xa ni manne yi ? ”, an na ti : “ Tunka Duumanten da o bagandi Misira komaaxun ŋa ti i senben ya. 15 Firawunan ga bara o walla bogo-bogo ya ni, Tunka Duumanten ga da Misira jamaanen sooman su kari, seron do naaburun su ren fanon kara. Ken ya saabu da in gaa naaburu yaxare su ren yugu fanan sadaxini Tunka Duumanten da, n gaa haadamaren yaxarun kun soomanun maxawasana. ”
16 « Tunka Duumanten da o bagandi Misira yi ti senbe xooren ya, ken saabu da, a nan ɲa xo taagumanse yi axa kittun do axa taŋon ŋa. »
[Misira Bakke]
[Bogukilli xerexerente]
17 Bire be Firawunan ga da jaman wara dagana, Alla ma i kanda i nan bogu ti filisitinun jamaanen killen ŋa, a be ga ni killi depen ŋa. Alla da a wari ya nan ti, jaman ga na xonnon kuren wari non ŋa, i nan maxa nimisi, i gaa saagene katta Misira yi. 18 Alla da goorikille ɲa jama ke danŋa Xulunjuumufanŋen gunjuran ŋa. Banisirayilaganko bogu Misira yi ya xo kure. 19 Muusa da Yuusufu xottun wutu do du yi. Baawo, saado Yuusufu gaa kalla, a wasu ti a yi Banisirayilaganko danŋa, nan ti : « Ma axa ga da Alla deemanden kita, ken ŋa, axa na in xottun wutu, axa do i na daga. »*
20 I giri Sukkoti nan daga daaxe Yetaamu gunjuran raqen ŋa. 21 Kiyen ŋa, Tunka Duumanten yinme tabullunma wa i kaane xo gondoma giile, na killen koyi i ya. Wuron ŋa, a na xureyen kini i ya. I ra wa wuron do kiyen su terana. 22 Kiyen ŋa tabullen nta fateene bakka i ya, xureyen xa nta i walla wuron ŋa.