[Xulunjuumufanŋe booxeye]
14
Tunka Duumanten daali Muusa da : 2 « A ko Banisirayilaganko da i nan saage katta Pi-hayirooti yi, Migidoole do geejin naxa Baali-sefoona raqen ŋa. Axa na daaxe geejin xannen ŋa. 3 Firawunan wa tini : “ Banisirayilaganko faayi ga hawuje jamaanen noxon ŋa, gunjuran da i toni. ” 4 N wa Firawunan kiilun xotondini a gaa axa batta, xa, n wa in tunkaaxun koyini ti Firawunan do i jaman bononden ŋa, Misiranko gaa a tuunu ti inke ya ni Tunka Duumanten ŋa. » I da a ɲa kundun xa ya.5 I ga da a ko Firawunan da ti jaman wuru, a do i jaman da haqilifaraaxuyen dabari Banisirayilaganko fin kanma. I ti : « O da manne xa ɲa ke yi, o ga da ku sero wara i ga daga ? I ra ntaxa ɲaana o da komo yi de ! » 6 A da i gajanwotoron siiti do i jaman nan daga doome. 7 A da kamo tunmi wotoro wutu kurayugu sirun ŋa, kafiini Misira wotoronun su yi. Wotoro su do yugu sikki¤. 8 Tunka Duumanten da Firawunan kiilun xotondi, Misira tunkanyugo. Banisirayilaganko bogunton da i kittun wutu kuudo na i hooraaxun koyi. Misira tunkanyugon da i fanpa. 9 Misiranko ga da i fanpa, i rege i daaxan ŋa geejin xannen ŋa. Firawunan siinun do wotoronu, do wotorowurundaanon do kuranlenmo beenu gaa wotoronun noxo, i da Banisirayilaganko ɲi Pi-hayirooti kaaran ŋa, Baali-sefoona xanne.
10 Banisirayilaganko ga da i yaaxon wutu, ma Firawunan riyinten faayi ke. A tinko i ya. Banisirayilaganko kanu buru, i sonqo katta Tunka Duumanten ŋa. 11 I ti Muusa da : « Furunkunmun konto Misira yi ya ba, an ga da o riiti kara ke gunjura yi ? An da ke ya ɲa o yi kundu Muusa, an ga da o bagandi Misira yi ? 12 O ma a ko an da gelli Misira, nan ti an na o wara komaaxun ŋa Misiranko maxa ? Ken ya n fasu o ga daga kara do gunnen ŋa. » 13 Muusa ti jaman da : « Axa maxa kanu, xa da axa du raga yugu ya, Tunka Duumanten gaa ke be ɲaana axa da na axa kisi lenki, axa wa ken walla. Baawo axa yaaxen gaa ku Misiranko be yi lenki, axa ntaxa i walla hari abada. 14 Tunka Duumanten ya n gajanŋa axa da, axakun nan tuuma. »
15 Tunka Duumanten daali Muusa da : « An na manne laxaraxaasana katta in ŋa ? Ti Banisirayilaganko da, i nan ware killen ŋa. 16 Anken na an dokkon wutu, an na an kitten do a banba geejin kanma, an na a booxo, Banisirayilaganko na dangi, i taanun kaawanto. 17 Nke yinme wa Misiranko kiilun xotondini i gaa sukkeene do i ya. N wa in tunkaaxun koyini ti Firawunan do i kuranlenmo, a wotoronu, do a wurundindaanon bononden ŋa. 18 Ken moxo, Misiranko wa a tuunu ti inke ya ni Tunka Duumanten ŋa bire be in ga na in tunkaaxun koyi Firawunan do i wotoronun do i wurundindaanon ŋa. »
19 Alla maliika be ga ɲi wareene Banisirayilaganko kaane, a saage i batta, tabulle ke xa saage gilli i kaane nan toxo i falle yi. 20 A ro Banisirayilaganko do Misiranko naxa. Wuron noxo, dabaren dabari Alla tuwaaxun ŋa, baane su ma katu kiɲene i funen ŋa wuron muuma.¤
21 Muusa da i kitten banba geejin kanma. Tunka Duumanten da kinbakkanfanka xote girindi wuron muuman su yi, na geejin booxo fillo. Killi kaawanten bogu. 22 Banisirayilaganko taanun kaawanton ro geejin noxon ŋa. Jin ɲa xo tageye, tayen do noogen ŋa. 23 Misiranko fanpe do i ya. Firawunan siinun do a wotoronun do i wurundindaanon ro do i ya ma geejin naxaane. 24 Jaaxa suxuba fanan ŋa, Tunka Duumanten da du toxo xureyen do tabullen noxon ŋa, na i kiilunun girindi. 25 A da i wotoronun taanun raga na i wurunden xotondi. Misiranko ti : « Xa ri o n wuru, o n laato bakka Banisirayilaganko yi, baawo Tunka Duumanten ya ni o gajanŋa i da. » 26 Tunka Duumanten daali Muusa da : « An kitten banba geejin kanma, kuudo jiinun nan saage Misiranko do i wotoronun do i settaanon kanma. » 27 Muusa da i kitten banba geejin kanma. Katta yillankaro, geejin saage katta i taaxura xasen ŋa, Misiranko gaa wurunu, i do a wa tallan genme. Tunka Duumanten xosi Misiranko duuɲa geejin noxon ŋa. 28 Wotoronun do i wurundaanon do Firawunan kuren su ro falle geejin noxon ŋa do Banisirayilaganko batte, jin yille i kanma. Hari sere baane ma sege. 29 Xa Banisirayilaganko tere geejin naxaanen ya yi, i taanun kaawanto. Jin senbe i teyun do i noogun ŋa xo tageye.
30 Ken koota, Tunka Duumanten da Banisirayilaganko kisi Misiranko yi. Banisirayilaganko da Misiranko furun wari do geejin xannen ŋa. 31 Banisirayilaganko ga da a wari Tunka Duumanten ga da Misiranko raga ti ke senbe yi moxo be, i kanu a yi. I da i saxiiraaxun ro Tunka Duumanten kanma, na i saxiiraaxun ro a kome Muusa xa kanma.