[Muusa suuge]
15
Ken bire Muusa do Banisirayilaganko da ke suuge suugu Tunka Duumanten da, i ti :N wa suugunu Tunka Duumanten da,
baawo a niyindindi.
A da siinun do wotoronun sedi geejin ŋa.
2 N suugen na do Tunka Duumanten ya yi,
N senben ya ni,
N kisindaanan ya ni.
A ya ni in Alla yi.
N na suugu a da !
A ya ni in faaba Alla yi.
N na a darontaaxun suugu !
3 Tunka Duumanten ni kuranlenman ya.
A toxon ya ni Tunka Duumante.
4 A da Firawunan wotoronun do a kuren sedi geejin noxo.
A yugu sirun su toxo Xulunjuumu fanŋen ŋa.
5 Jin jufoyen da i xufu.
I yanqa budan ŋa xo gidindunga.
6 Tunka Duumante,
an kitti tayen senben kasafoyen wa warini.
Tunka Duumante,
an kitti tayen wa xonnen bonondini.
7 Ti an fasanŋuntaaxu xooren ŋa,
an wa an gajanlenmon xenundini.
An butten yanganxatan wa i buyini xo sokki kaawante.
8 An fuutandifanken da jiinun kafu me yi.
i senbe do kaaron ŋa xo bulle.
Jin jufoyen sabati ma geejin butten ŋa.
9 O xonnon ti :
« Xa ri o n wuru do i ya,
o na i raga,
o na i kittidufoonun taxandi,
o na o butte mura i ya,
ma o ga xenperandangi.
O na o kaafon buusu, na i kari,
na i yokkun wutu ! »
10 An ga fuutandi,
geeji da i toni.
I yanqa jin wure
xo mexenxunturan gaa yanqana ji xoori xooron noxon ŋa.
11 Kan alla na xoyi an moxo ?
Tunka Duumante.
Ko sennen na xoyi an moxo ?
A do tiigande ga n xawa ?
Raniyaana ga ni ?
Kaawafi ɲanŋaana ga ni ?
12 An da an tayen banba,
ɲiiɲen da i toni.
13 An ga da an jama be hooraaxu,
an da i geesu ti xanuyi duumanten ŋa.
An senben da i kanda,
katta an dingira sennen ŋa.
14 Seron ga na a mugu, i wa saralleene,
ma karandun ga da Filisitinun raga.
15 Ken moxo yi, Hedoomu xirisun gaa hawujeene.
Buttunkutun na Mowaaba tunkanyugun raga.
Fatankallen gaa Kanaanagankon ragana.
16 Jooten do mullun na xosondi i ya,
an kitti senbenten saabu da.
I gaa muumiini xo gide,
na a toxo an jaman gaa dangini.
Tunka Duumante,
na a toxo an ga da jama ke be laawara gaa dangini.
17 An wa i rondini,
na i taaxundi,
an duudan giden kanma.
Tunka Duumante,
an da dingira maxagemundi an du danŋa,
an gaa a ɲaana taaxura.
N Kama,
an da dingira sennen taga ti an kitte.
18 Tunka Duumanten ya ni abadan maraanan ŋa.
19 Firawunan siinu, a wotoronu, do a gajanyugun ga yanqa geejin ŋa, Tunka Duumanten da geeji jiinun yillandi i kanma. Xa Banisirayilaganko kun taanun kaawanton ya n tere geeji naxaanen ŋa.
20 Annabinyinyaxare Mariyaamu, Haaruna gidanyaxare, a da taballen wutu i kitten ŋa. Yaxarun su do taballun da a batu. I da dinmun sigindi, i gaa taballun tinmi nan rege. 21 Mariyaamu wa suugen ragana i ya :
Xa da Tunka Duumanten suugu !
A ga niyindindi,
a da siinun do wotoronun sedi geejin ŋa.
[Gunjuran tannaxaten siine]
[Ji xaxace]
22 Ken dangiyen falle, Muusa da Banisirayilaganko girindi Xulunjuumu fanŋen ŋa, nan jonkoyi Suura gunjuran ŋa. I da bito sikki tere gunjuran ŋa, i ma ji kita. 23 I ri Maara na jin ɲi no, xa i kori a minni, baawo a xaxacen ni. Maara toxon yinme saxunten ni ken ya yi, a wure ni « xaxace. » 24 Jaman toxo nuxudunsefene ti Muusa yi, i gaa tini : « O na manne minni ? » 25 Muusa laxaraxaasa katta Tunka Duumanten ŋa. Tunka Duumanten xa da sollidunŋe yogo koyi a yi. Muusa ga da ken sollidunŋe sedi jin ŋa, jin xosi liŋo.
Tunka Duumanten da kiitun do farilan kini i ya non ya. Non ya ni a ga da i xense. 26 Ken falle Tunka Duumanten ti : « An ga na Tunka Duumanten xannen terinka siri, ken ga ni an Alla, nan teleŋo a da, na an taron sigindi a ɲaamarixannun wure, na a farilanun su sigindi, an wa kisiini in ga da wattu beenu su xenundi Misiranko yi. Baawo inke ya ni Tunka Duumanten ŋa, ke be gaa an sahandini. »
27 Ken falle, i kiɲe Yelima. Waranlaqu tanmi do fillo wa no, a do tanɲere tamaritinŋe. I daaxe jinxannen ŋa.