[Mannan do jaxanŋoɲi ɲaaɲante]
16
Banisirayilaganko bakke Misira xasu fillandin tanmun do karagon koota, i jaman giri Yelima nan kiɲe Siini gunjuran ŋa, ken gaa Yelima do Tuurisiina giden naxa. 2 I gaa ken gunjura yi, Banisirayilaganko toxo nuxudunsefene ti Muusa do Haaruna yi. 3 I ti : « Hari Tunka Duumanten gan ɲi ga da o kari Misira yi tan. O ga ɲi taaxunu o barama fakkon tiyen kaaron ŋa, yigande lafi nta o yi. Axa da o riiti ke gunjura yi kuudo na o kari dullen ŋa. Ke jama su ! »4 Tunka Duumanten daali Muusa da : « Ti in wa biraadon texendini axa da nan giri kanmun ŋa, jaman na daga i koota su biraadon sagara, kuudo in na i jaarabi selli i gaa in sariyan batta, ma i ga nta a batta. 5 Axa do ke be gaa riini bita tunmundin ŋa, axa gaa a dabarini, a wa genme koota su xallen fillo yi¤. »
6 Muusa do Haaruna ti Banisirayilaganko da : « Wuro ke, axa wa danqanaaxunu nan ti Tunka Duumanten ya n da axa bagandi Misira jamaanen ŋa. 7 Xunbane suxuba, axa wa a nooron walla, baawo a da a mugu axa gaa fo be koono katta a yi. Oku be ga ni, o ni manne yi axa gaa nuxudunsefene ti o yi ? » 8 Muusa ti : « Axa wa a walla Tunka Duumanten gaa tiyen kinni axa yi wuro ke, axa gaa a yigana, a do buuru be gaa axa bakka suxuban xa yi. Baawo Tunka Duumanten da axa nuxudunsefen mugu katta a yi. Oku beenu ga ni oku yi, o ni manne, axa gaa fo koono o da ? Axa nta fo koono oku da, axa na fo koono Tunka Duumanten ya da. »
9 Muusa ti Haaruna da : « A ko Banisirayilaganko da : “ Axa n tinko Tunka Duumanten ŋa, baawo a da axa mugu nuxudunsefene. ” » 10 Haaruna gaa sefen ŋa Banisirayilaganko da, i jonkoyi katta gunjuran ŋa, i xosi Tunka Duumanten nooron wari tabullen noxon ŋa.
11 Tunka Duumanten daali Muusa da : 12 « N da Banisirayilaganko diganxannun mugu. An na ti i da : “ Futuron ŋa, axa wa tiyen yigana, suxuba su xa, axa wa fakka buurun ŋa. Axa na danqanaaxu ti inke ya ni Tunka Duumanten ŋa, axa Alla. ” »
13 Futuron ŋa, jaxanŋoɲen¤ bange na daaxan faga. Suxuban ŋa, nigijen saxu do banŋen su yi daaxan kaaron xa yi. 14 Bire be nigijen ga konke, koromo mulle yogo toxo a batten ŋa. 15 Banisirayilaganko da a faayi, i ti me da : « Man hu ? » A wure ga ni « Manne ni ke ? » Baawo i ma ɲi a tu fo be ga ni. Muusa ti i da : « Biraadon ya ni, Tunka Duumanten ga da a kini axa yi, ti axa na a yiga. 16 Tunka Duumanten ɲaamariyen faayi : sere su na fo wutu an ra gaa ke be yigana. Kaagume su na i koren jaate, sere yinme su muude. » 17 Banisirayilaganko da a ɲa ken moxo yi : sere su do ke be ga n xawa, an da ken wutu. 18 I ga da a xense muuden ŋa, sere be ga da fo gaben sagara, a ma dangi haqen ŋa, i be xa ga da fo lamaane sagara, a ma konto. Sere su ga n katta fo be yigana, ken ya n kini an ŋa.
19 Muusa ti i danŋa : « Sere wo seren maxa fo taaxundi a gaa wuyini. » 20 Yogonu ma Muusa terinka. I da fo wuyindi, xa a moti ma xuudun gaa roono a yi. Ken ŋa, Muusa butu i wure.
21 Suxuba su, sere su ra gaa fo be yigana, i wa a sagarana. Kiyen ga na tewo, a na xaje.
22 Bita tunmundin koota, i wa a dunfillon sagarana, sere su muudu filli. Jaman yinmankon ri a ko Muusa da. 23 A ti i da : « Tunka Duumanten ɲaamariyen ni ya : “ Xunbane ni bita ɲerundin ya, axa tuumayinkoota, a gaa Tunka Duumanten da. Ken kuŋa, axa gaa a mulla na fo be soro, axa na ken soro, axa gaa a mulla na fo be biyi, axa na ken biyi. Axa na a kutten moyinten taaxundi ma suxuba. ” » 24 I da a kutten taaxundi ma suxuba xo Muusa ga da i ɲaamari moxo be. A ma moti, sakkati xuude na ro a yi.
25 A yillakara, Muusa ti i da : « Xa da ke yiga lenki Sibitin ŋa, axa tuumayinkoota, a gaa Tunka Duumanten da. Axa nta fo kitta gunnen ŋa lenki. 26 Axa wa a sagarana bito tunmi noxo. Xa bita ɲerundi, ken ni tuumayinkootan ya. Axa nta fo kitana. »
27 Ken do i fi su, sero yogonu bogu nan daga fo muuru, xa i ma fo kita. 28 Tunka Duumanten daali Muusa da : « Axa finna balla in ɲaamarindixannun do in sariyanun batta ya ba ? 29 Xa saxu a yi ya nan ti Tunka Duumanten ga da tuumayinkootan kini axa yi, a na bito filli ya yiganden xa kini axa yi bita tunmundin koota. Be su n toxo i batten ŋa. Sere wo sere n maxa bogu bita ɲerundin koota. 30 Ken kuŋa, jaman tuuma bita ɲerundin ŋa. »
31 Banisirayilaganko da a toxon ɲa « mannan » ya. A xullen ya ni xo maarufunse, yaagintufullen daxanmen gaa a yi. 32 Muusa ti : « Tunka Duumanten da axa ɲaamari, axa na muude taaxundi axa bonsonŋun da, kuudo a ga da axa bagandi Misira yi bire be, a ga da axa birandi ti fo be yi gunjuran ŋa, i na a wari ti i yaaxen ŋa. » 33 Muusa ti Haaruna da : « Dome wutu, an na mannan muude ro a yi, an na a taaxundi Tunka Duumanten jon ŋa, na a taaxundi o bonsonŋun da. » 34 Xo Tunka Duumanten ga da Muusa ɲaamari moxo be, Haaruna da a taaxundi, a nan ɲa seeda yi.