[Maasa do Meriba jinyaaxe]
17
Tunka Duumanten ɲaamarinden kanma, Banisirayilaganko jaman giri Siini gunjuran ŋa, daaxa ti daaxa, nan daga yanqa Refidiimu gunnen ŋa. Xa ji ma ɲi no, jaman gaa minni. 2 Jaman da Muusa gajanmuuru, nan ti a da : « Xa da ji kini o yi o nan mini kuŋa. » Muusa ti i da : « Manne saabu da ni, axa gaa baqa in ŋa ? Manne saabu da ni axa gaa Tunka Duumanten wurebakka ? »3 Jaman daqu non ŋa, i do sefen wa me yi katta Muusa yi, nan ti : « Manne saabu da an ga da o girindi Misira yi, daqun gaa o do o renmun do o naaburun su karini ? » 4 Muusa da Tunka Duumanten gangu : « N nan xawa manne ɲaana ke jama da ? Fonne sa i na in gididunwara. » 5 Tunka Duumanten daali Muusa da : « Dangi jaman kaane, Banisirayilaganko xirisun yogonu wutu. An ga da Niili fanŋen katu ti dokko ke be, a wutu an kitten ŋa, an nan daga. 6 N wa ɲiini an kaane Tuurisiina giden kanma. Non ŋa, an na giden katu, jin na funti, jaman na mini. » Muusa da a ɲa ken moxo yi Banisirayilaganko xirisun jon ŋa. 7 A da ken noqu xiri Maasa do Meriba, ken wure ga ni « baqanlaaxun » do « fiiduxenpeye », baawo Banisirayilaganko baqanlaaxun saabu da, i da Tunka Duumanten wurebaga ya, nan ti : « Tunka Duumanten wa do o yi, ma a nta do o yi ? »
8 Ken dangiyen falle, Hamaleexigankon¤ ri xenu Banisirayilaganko yi Refidiimu yi. 9 Muusa ti Yuusawu da : « Yugu sagara o da. Xunbane, an do i na Hamaleexigankon gaja. Nke yinme wa sikki gide ke tonben ŋa, allandokko ke gaa in kitten ŋa. » 10 Yuusawu da Hamaleexigankon gaja xo Muusa ga da a ko moxo be, na a toxo Muusa do Haaruna do Huura gaa giden tonben ŋa. 11 Bire su Muusa ga na i kitten wutu, Banisirayilaganko ya n niyindini. A nda i kitten yanqandi, Hamaleexigankon na yille i kanma. 12 Muusa kittun ga tanpi, i da giden ro a wure, a taaxu a kanma. Haaruna do Huura, baane su wa ti kaara yi, i gaa tigitini a kittun ŋa. Muusa kittun toxo kundun ya ma kiyen gaa xenne. 13 Yuusawu da Hamaleexigankon ni gajanŋen ŋa bogobogo ti kaafan neenen ŋa.
14 Ken falle, Tunka Duumanten daali Muusa da : « Ke su safa kitaaben ŋa sinmefo yi, an na a kiɲandi Yuusawu yi ti : n wa Hamaleexigankon buruxana. Sere su ntaxa sinmeene i yi, n wa i buruxana bakka kanmu ke wure ! » 15 Muusa da sadaxindinoqu taga na a toxora « Adonayi-niisi » [a wure ni Tunka Duumanten ya ni in niyinden sababun ŋa]. 16 Ken falle, a ti : « I ga wakkile na Tunka Duumanten gaja i tunkantaaxaaden kanma, a do i na me yi ya ma abada¤. »