[Kiitikutiyen ɲanmoxo]
18
Misira bakken ŋa, Tunka Duumanten ga da fo be ɲa i seron da, do a ga da i bagandi Misira yi moxo be, kun ga ni Muusa do Banisirayilaganko, Suwayibu da a laxamin mugu, Mediyaana sadaxakiɲandaana, Muusa kallu yugo ke. 2-5 A do Muusa yaqen do a renmun filli ri Muusa sagata gunjuran ŋa, a taaxunten gaa noqu be, Alla giden¤ kanma. Muusa ɲi ga da i wara dagana a banŋe. Muusa renmu ku filli : baanen toxon ni Geresoomu¤, baawo a ti : « N ɲa tuŋaaranke wandi jamaanen ŋa. » Baanen toxon ni Yelijeeri¤, baawo a ti : « N faaba Alla da in deema, a da in kisi Firawunan kaafan ŋa. » 6 Suwayibu da faaren xayi Muusa yi ti : « Nke Suwayibu ya n ri an sagata, an kallu yugo, n do an yaqen do i renmun filli. »7 Muusa bogu nan gemu i kallu yugon ŋa, a tusi na a xandunsunbu. I da me kuuɲi nan ro tilliisen wure. 8 Tunka Duumanten ga da fo wo fo su ɲa Firawunan do Misiranko yi, do Banisirayilaganko batten ŋa, Muusa da a su moxon ko i kallu yugo ke da, a do i ga da xota su wari killen ŋa, Tunka Duumanten ga da a kisi ken su yi. 9 Suwayibu sawo ti Tunka Duumanten ga da ken xeeri be ɲa Banisirayilaganko da, a ga da i bogu Misiranko kittun ŋa. 10 Suwayibu ti : « Tiigeyen wa Tunka Duumanten da, a be ga da axa bogu Misiranko kittun ŋa, na axa bogu Firawunan kittun ŋa, na axa bogu Misira jaman kittun ŋa, 11 i ga ɲi Banisirayilaganko roxoono¤. A xura in da keeta nan ti Tunka Duumanten ya n xoora allanun su yi. » 12 Muusa kallu yugo Suwayibu da sadaxa xuruminten do sadaxa tana bagandi Alla da. Haaruna do Banisirayila xirisun su ri yige do Muusa kallu yugon batten ŋa Alla jon ŋa.
13 Ken yillakara, Muusa taaxu kuŋa a gaa kiitini jaman ŋa, a su gaa sikki do a yi gelli suxuba ma wuro. 14 Muusa kallu yugon da a wari a gaa fo be su ɲaana jaman da. A ti a da : « An do ke ni manne yi jaman da yere yi ? Manne ni an baane gaa taaxunu jaman su gaa sikki do an ŋa gelli suxuba ma wuro ? » 15 Muusa ti i kallu yugo ke da : « Seron riini katta in ŋa ya, kuudo na Alla liŋun muuru, 16 xibaare ga na ɲa i maxa. I na ri in na a kiiti, n na i tuyindi Alla ga da farila be do sariyanu be xa ko. » 17 Muusa kallu yugon ti a da : « An gaa a ɲaana ke moxo be, a nan xoto. 18 An riini kuti ya, kafiini jama ke be xa ga do an ŋa. Golle ke nan xoto an da buru, an baane ra nta a tinmandini. 19 Saasa in terinka, n wa an kuunu haqile. Alla na ɲa do an ŋa ! Sigi jaman da katta Alla yi, an yinme na a xibaarun kiɲandi Alla yi. 20 I xaranŋundindi farilanun do sariyanun ŋa, an na biremoxon killen tuyindi i ya. 21 Ken ŋa, an na allankannaana siru sagara jama ke noxo, seri saxiironto, i ga nta kiitini ti xaalisi ya. Wujune sere su do i xirise, kame su do i xirise, tankarage su do i xirise, tanmu su do i xirise. 22 I na toxo jaman kiitindini. Kiite be xoten ga ni, i na a kiɲa an ŋa, ke be neyen ga ni, i na ken kiiti. Ken moxo ya ni an likken newondini, an do i su gaa a wuttu ! 23 An ga na ken ɲa, xo Alla ga da a ko moxo be, an na kati a muɲini, ke jama su xa tuumanten na kiɲe i kaanun ŋa. »
24 Muusa da i kallu yugon terinka. A ga da fo wo fo su ko a danŋa, a da a su ɲa. 25 Muusa da seri xottinto sagara do Banisirayila fonlaqun su yi, na i ɲa yinmanko yi jaman ŋa : wujununsapon xirisu, kamansapon xirisu, tankaragensapon xirisu, a do tanmunsapon xirisu. 26 Kun toxo jaman kiitini. Fo be ga na xoto, i na a kiɲa Muusa yi. Xa fo wo fo su ga ma xoto, i yinmenu na ken kiiti.
27 Ken falle Muusa yanpa a kallu yugon maxa, a daga i kaara.