[Saratixannu Tuurisiina giden ŋa]
[Annabi Muusa do Alla medaalanlenmaaxu]
19
1-2 Banisirayilaganko ga giri Lefidiimu, i kiɲe Tuurisiina gunjuran ŋa i bakke Misira yi xasu sikkandin koota fanan ya. I yanqa nan daaxe non ŋa gide ke tan ŋa. 3 Muusa sege katta Alla yi. Tunka Duumanten da a xiri a gaa giden kanma nan ti a da : « Fon faayi an gaa a koono Banisirayilaganko da, Yaaxuba kore : 4 “ N ga da fo be ɲa Misira, axa yinme da ken wari, n ga da axa banbu xo gopen gaa i renmen wuttu moxo be, na axa tinkondi in du yi. 5 Saasa, axa ga na in terinka na o saratin tanga, axa wa ɲaana in duudan seron ŋa duna su naxa. Tonŋu, duna ni inke ya fo yi, 6 xa axakun na ɲaŋi in da in tunkaaxun sadaxakiɲandaano yi, n do dunadunko naxa. Axa na ɲa xabiila sugandinte yi in da. ” An na ku digaamu ya kiɲandini Banisirayilaganko yi. »7 Muusa saage riini, na jaman yinmankon su xiri, Tunka Duumanten ga da digaamu beenu ro a raqen ŋa, na i dantaxi. 8 Jaman su jaabindi doome xan baane, nan ti : « Tunka Duumanten ga ti fo wo fo, o wa a ɲaana ! » Muusa da jaman digaamun kiɲandi Tunka Duumanten ŋa.
9 Tunka Duumanten daali Muusa da : « N wa riini katta an ŋa tabullu xooren noxon ŋa, kuudo in do an ga na ɲi sefene, jaman na a mugu. Ken ŋa i na saxu an ŋa keeta. » 10 Tunka Duumanten daali Muusa da : « Daga katta jaman ŋa, i nan seno lenki do xunbane, i na i yiraamun xa wanqi, 11 na i moxo sirondi katta xunbanefalla. Tunka Duumanten wa yanqana Tuurisiina gide ke kanma jaman su jon ŋa. 12 Xenpera koyi jaman ŋa, nan ti i da, i na i du raga, i nan maxa sege gide ke kanma, i nan maxa kiɲe giden tan ŋa. Sere su ga na kati giden ŋa, xa da a kaman kari. 13 Sere su kitte nan maxa kiɲe a kaman ŋa, a nan gididunware ya, walla xa na a bunu ti bundanŋun ŋa. Ken ga ɲa seren ya ma daaba ya ga ni, xa maxa a toxo bireene. Xa, buutuxannen ga na mugi bire be, ken bire i ra wa segene giden kanma. »
14 Muusa yanqa katta jaman ŋa na i senondi, i da i yiraamun wanqi. 15 A ti jaman da : « Ku bito sikki noxo, axa na axa moxo sirondi, sere su n maxa tinko yaxare yi. »
16 Ken bita sikkandi, gelli suxuba fana, tabullu xooren do direxannun wa giden kanma, a do ɲelunbeye, ken do buutuxan xoore. Jaman su saralle daaxan ŋa. 17 Muusa da jaman bagandi daaxan ŋa, i nan sabati giden wure, na Alla genmanlenmaaxu. 18 Tunka Duumanten yinbinman ga yanqa Tuurisiina giden kanma, tiiden toxo segene xo yinbinkuma xoore, ma gide ke muuman nan toxo saralleene. 19 Buutuxannen tallan sege. Muusa wa sefene, Tunka Duumanten wa a jaabini direyen ŋa. 20 Tunka Duumanten yanqa Tuurisiina giden tonben ŋa. Ken falle, Tunka Duumanten da du toxo non ŋa na Muusa gangu, Muusa sege.
21 Tunka Duumanten daali Muusa da : « Yanqa an na jaman gongo ti i nan maxa xenperan kutu kuudo na Tunka Duumanten wari, ken ga fe fo gabe kalla ya. 22 Hari sadaxakiɲandaanon be gaa tinkoono Tunka Duumanten ŋa, i nan xawa du senondini ya, Tunka Duumanten butten yanganxatan kannun saabu da. » 23 Muusa jaabi Tunka Duumanten da : « Jaman ra nta segene Tuurisiina giden kanma, baawo an da o gongo ti o na xenpera ro o do giden naxa, an na giden senondi. » 24 Tunka Duumanten daali Muusa da : « Saage yanqana, an do Haaruna nan ri. Xa sadaxakiɲandaanon do jaman kutte, ti i nan maxa xenperan kutu segene katta Tunka Duumanten ŋa, ken ga fe, a wa i yanganxatana. » 25 Muusa yanqa katta jaman ŋa nan jaabi i da.