[Tafundixannun tanmi]
(Fillantafunde 5.1-21)
20
Ken dangiyen falle Alla daali kuŋa :3 Maxa allanu tana kafu in ŋa.
4 Xa maxa sawura su danbe dabari du da, ken gaa kanmun ŋa kanxotte, ma ke be gaa ɲiiɲen ŋa wureedu, a do fo be gaa jin ŋa ɲiiɲen wure. 5 Maxa sujudi i da, maxa i batu, baawo inke ya ni Tunka Duumanten ŋa, an Alla. Nke ni Alla suuxaanan ya. N wa faabe garamajigingollun jaatene do a renmun do a yillayi sikkan do a yillayi naxatan batten ŋa, ku beenu ga da in xoni. 6 Xa sere be ga na in xanu, an ga da in ɲaamarixannu ku tanga, n wa in fonnansiraaxun koyini, na a wutu kun kamannu yi, katta i kisimarun do i kisimarun kisimarun ŋa, ma wujuunun jaatu.
7 Maxa Tunka Duumanten toxon battaraaxu, an Alla, baawo sere be ga na Tunka Duumante an Alla toxon battaraaxu, a nta an toqo no.
8 An kiilen toxo Sibitinkootan ŋa, na a ɲa koota senne yi. 9 An na an gollun su dabari bito tunmi noxo. 10 Xa bita ɲerundi, Sibitinkoota, ken ni Tunka Duumanten Tuumayinkootan ya, an Alla. An yinme do an renyugun do an renyaxaru, maxa golle su dabari, kafiini an komon do an tunbaarun ŋa, a do an naaburusiginten su, kafiini mukke su gaa an deben ŋa. 11 Sabu bito tunmi noxon ya ni, Tunka Duumanten ga da kanmun do ɲiiɲen taga, a do geeji, ken do fo wo fo su gaa i noxon ŋa. Xa bita ɲerundi, a da taganden wara. Ken ya saabu da, Tunka Duumanten ga da bareken ro Sibitinkootan ŋa, na a daro i du da.
12 An ma do an faaba daro. Ken ŋa Tunka Duumante, an Alla gaa ɲiiɲe be kinni an ŋa, an na wuyi gille kita a kanma.
13 Maxa sere kari.
14 Maxa jeeni.
15 Maxa fayi.
16 Maxa seede ti an kapanlenman ŋa gaaren kanma.
17 Maxa yaaxarangillaaxu do an kapanlenman kan ŋa. Maxa yaaxarangillaaxu do an kapanlenman yaqen ŋa, a do a kome, do a tunbaare, do a gunbo, a fare, ken do fo wo fo su ga ni an kapanlenman xalle yi. »
18 Jaman taron gaa manqanŋe ke do guurunbeyen ŋa, a do buutuxanne, giden gaa tiidini, i kanu nan toxo saralleene. I toxo laatoyen ŋa. 19 I ti Muusa da : « An yinme ya nan sefe o da, o wa an mukku. Alla yinme nan maxa sefe o da, ken ni kallen ya ! » 20 Muusa ti jaman da : « Axa maxa kanu. Ke ni ya axa n saxu a yi ti Alla ri axa jaarabi ya, na axa kanundi du yi, kuudo axa nan maxa yangoburugumaaxu. » 21 Jaman toxo sikki laatoyen ŋa, Muusa tinko Alla yi bitanbinnen ŋa.
[Sadaxindinoqu]
22 Tunka Duumanten daali Muusa da : « An na a ko Banisirayilaganko da ke moxo yi nan ti : “ Axa yinmenu da a wari, n da axa diganlenmaaxu gelli kanmun ya yi. 23 Xa maxa kanŋe do godoxulle dabari du da allanu yi kafiini in ŋa. 24 An na a doorinsadaxindinoqu dabari in da, an na an sadaxa xuruminton xurusi a kanma, a do an allatiigeyinsadaxo, an tanmiso, a do an naanu. Finkonŋen ga ɲa ti in toxon ŋa in yinme dingira sugandinte su yi, n wa riini katta an ŋa no, na an barekindi. 25 Xa selli an gaa gidinsadaxindinoqun ya dabarini in da, maxa i taga ti gidi segunte yi, baawo an mexenyokke ke na a loxosono ya. 26 Maxa in sadaxindinoqun taga moxo yi, an ra ga nta segene a yi segensegemaade falle, kuudo an hayibeyen nan maxa bogu a kanma. ”