[Komon golliɲanlenmaaxu]
21
« An gaa kiitu beenu walla i wure ya faayi ku : 2 An ga na Habaraanigankankome xobo, a gollini siino tunmi ya ; ɲerunden ŋa, a na bogu xafu. 3 A yinme baane ya ga ni, a yinme baane ya n bakka. Selli yugon do i yaqen ya ga ni, a yaqe ke bakka do a yi. 4 Selli kamanyugo ke ya ga na yaxare kini a yi, a da ren yugu saara a da walla xa ren yaxaru, yaxare ke do i renmun wa ɲaana kamanyugon xallu yi, aken yinme baane na bogu. 5 Xa ganta, selli komen ga na ti : “ N wa in kamanyugon mulla, a do in yaqen do in renmu. N nta a mulla nan hooraaxu ”, 6 kamanyugon na a tinkondi Alla yi¤, na a tinkondi katta baafen ŋa, ma walla fonlaqen saxabanŋen ŋa, kuudo Alla na seede a maxa. Kamanyugo ke na a taron boto do tageyen ŋa ti bunnen ŋa, a na a golliɲaŋundi ma abada.*7 « Sere ga na i ren yaxaren tunbaarigaaga, ken nta bakka xo komo yugun gaa bakka moxo be. 8 Selli kamanyugo ke be ga da a sugandi i du da, a ga na i tu bogu ken ŋa, a ra ga ntaxa a marana du maxa, a na duŋe seri tana na a maxawasa. A ra nta a gaagana xabiila tana yi, ken ɲaana janbayen ya yi ti a yi. 9 Selli a ga da a ɲi a ga da a sugandi i ren yugon ya da kuŋa, ken bire ke, kiitun ga da ke be ramuuru ren yaxarun da, a wa ken ɲaana yaxare ke da. 10 Kaman yugo ke nda hari yaxare tana wutu xa, ke naxafa, a feetufataade, a do a wuyiraxe, ku nta naqasini.¤ 11 Ku fiini sikki, a ga ma i ɲaŋi a da, yaxare ke wa bakka komaaxun ŋa a ga feti xaalisi tugeye.
[Binbagande]
12 « Na sere katu, a xosi kara, ken kaman xa kalla ya. 13 Xa ke be a ga ma du do a taaxu, Alla ya ga da a yiina a kitten ŋa, n wa noqu sugandini an da, ke be an gaa wurunu telle no. 14 Xa sere be ga na xenu i kapanlenman ŋa na a janbantankari, an na a maamasu, hari a nda wuru roono in sadaxindinoqun ya yi, a n kara ya tannu.
15 « I be nda i ma katu, walla i faaba, a n kara.
16 « I be nda sere fayi na a gaaga, ma walla o ga da a ɲi an kitten ŋa, ken nan kara ya tan.
17 « Sere be nda i ma walama i faaba langa, a kanman nan kara ya tan.
18 « Sero ga na gaja, baanen da gidingullan lifiti baanen ŋa, walla xa a da a gonmori, a ma kara, xa a joogi nan saxu¤, 19 a ga na giri, a ga yiile sellan ŋa i dokkon kanma, katundaanan baari. Ganta, a wa diyan tugana a yi, na a jaara xa, ma a ga na n selle.
20 « Sere be nda i komen katu ti guman ŋa, walla xa i tunbaare, ma a gaa kalla a kitten ŋa, a kaman nan yanganxate ya. 21 Xa selli a ga na giri koota baane ma bito filli, kamanyugo ke ntaxa yanganxateene, baawo a naaburen ya ni.
22 « Sero ga na gaja, i ga ware yaxarin nuxunte yi, ken xosi xosondi, xa, a yinme kisi, toora tana ma a kita, waajibin ya ni yaxare ke renmen gaa sanqeene ti kiinen xirinden ŋa, kiitaanon kiiten kanma. 23 Xa selli toora nda bogu a yi, yonki tugeene ti yonki ya yi ; 24 yaaxe tugeene ti yaaxe ya ; kanbe ti kanbe, kitte ti kitte, ta ti ta.* 25 Buyiye tugeene buyiye ya ; joogiye tugeene joogiye ya ; katunde tugeene katunde ya.
26 « Sere be nda i kome sanpa i yaaxen ŋa na a kara, walla i tunbaare, a wa i hoorono i yaaxen batten ŋa. 27 A kanben ya ga na yere, a wa a hooraaxunu kanbe ke batten ŋa.
28 « Gunbo ga na yugo takki, ma walla yaxare, a kaman xosi kara, gunbo ke wa gididunwareene, a tiyen xa nta yigeene. Xa gunbo ke kaman baarinten ya ni. 29 Xa selli gunbo ke ga ni takkindaanan ya yi nan xaso, i jaxaseedi kamanen ŋa, a ma a koroosi, a ri a da yugo kari, ma a da yaxare kari, gunbo ke gididunwareene ya nan kara. Kamane ke yinme kalla ya. 30 Xa, selli diya ga na taaxu a yi, nan ti a na i du maxawasa, fo wo fo ga taaxu a yi, a n xawa ken tugana ya. 31 A ga na lemine takki, murunte ga ni ma yaxanne ya ga ni, i kiiten ɲaana ken moxo saanan ya. 32 Gunbo ga na kome takki, ma tunbaare, kamane ke na tanjikke xaalisixu¤lluduubeli tuga a kanman yugon ŋa. Gunbo ke na gididunware.
33 « Sere ga na gedingunba raqen toxo wuɲiini, ma sere nda gedingunba jaaba a ga ma a bulu, gunbo xenu roono a noxon ŋa ma fare, 34 gedingunbagume ke wa tugandini. A na xaalisin kini kamane ke yi. Fo fure ke na ɲaŋi a xalle yi.
35 « Ke moxo ya ni xadi, sere gunbo ga na seri tana gunbo takki ma a gaa kalla, gunbu birante ke gaageene ya, i na a xaalisin taxandi, i na fo fure ke xa taxandini ya. 36 Ma a ga na ɲi xa gunbo ke ga ni takkindaanan ya yi nan xaso, kamanen xa maxa a koroosi, a tugandini ya de. A na gunbo ya tugana ti gunbo yi. Fo fure ke na ɲaŋi a xalle yi.
37 « Sere ga na gunbo fayi, ma jaxe, a ga da a gaaga, ma a ga da a kari ya, a wa gunbunu karagi tugana gunbo ke batten ŋa, na tanmiso naxati tuga jaxe ke batten ŋa. »