22
« Fayaana ga na rage fayiyen noxon ŋa, i xosi a katu na a kari, foro nta a da. 2 Xa selli kiyen bogu falle ya ga ni, a foron wa tugeene. Fayaanan nan xawa tugandini ya, fo gaa nta a maxa xa, i na a yinme gaaga na a fayifon tuga.3 « Selli fayifo ke biranten ga na kite fayaanan kitten ŋa, gunbo ya ga ni, ma fare, walla xa jaxe, a na a dunfillon ya tugana.
4 « Sere nda i naaburun woora i yinme soxanten ŋa, i xosi daga seri tana soxanten bonondi ma walla reesengoore, a na a tugana ti i ten fo siren ya, walla xa a reesengooren fo sire.
5 « Yinben ga na laawe sere maxa, a ga da saasun kita, a xosi dugaane buyi, walla xa te siginte, ma soxofo tana, yinbinlondaana ke ya ni fo buyinte ke tugana.
6 « Sere ga na xaalisi ma yokku kini i kapanlenman ŋa ti a na i taaxundi, i xosi fayi ken sere konpen ŋa, fayaana ke ga na rage, a na i dunfillon ya tugana. 7 Selli fayaana ke ga ma kite kuŋa, konpe ke kaman na hadari Alla jon me naxa,¤ selli a kitten ga ma kiɲe i kapanlenma ke kittidufoonun ŋa. 8 Nanbaran ya ga ro fo wo fo yi, gunbo ya ga ni, fare ya ga ni, jaxe ya ga ni, yiraame ya ga ni, ma fo sankunte su, be su gaa tini i ya fo ni, i filli na hadari Alla jon me naxa,¤ a ga na sigi sere be yi, ken na a dunfillon tuga i kapanlenman ŋa. 9 Sere ya n nda fare kini i kapanlenman ŋa, ma gunbo, walla xa jaxanlenme, ma daaba su keeta, kuudo a na a goyime, a xosi kara, walla xa a leebi, ma a rage, a maxa wari, 10 takkiyen na ɲa i filli naxa ti Tunka Duumanten ŋa, selli a kitten ga ma kiɲe i kapanlenma ke kittidufon ŋa, fongume ke na duŋe, goyimandaana ke xa ntaxa fo tugana. 11 Xa selli fayaanan ga da ke daaba fayi goyimandaana ke yinme ya maxa, ken ŋa a n xawa kamane ke tugana ya. 12 Selli fonyaate ya ga na daaba ke kari xa, a do suufe yogo na ri, ken ŋa a ntaxa tugandini.
13 « Sere ga na daaba roxo i kapanlenman ŋa, a ga kara ma walla xa a ga leebi kamanen falle, a tugeene ya, a na a tuga. 14 Selli kamanen yinme gaa do a yi xa, a nta a tugana. Selli muson ya ga ni, a na muso ke ya ke ya ragana.
[Jikkunu]
15 « Yugo be nda saxu do yaxanne yi na a xusaaxun wutu, na a ɲi futte nta a yi, a na a futtu, na a yaxi. 16 Selli faaben ga na bara kuŋa, ken bire ke, a na yaxannan xuson futten ya tugana keeta tannu.
17 « Korotindaana yaxare, maxa a toxo bireene.
18 « Saqaana su do daaban batten ŋa, a nan kara.
19 « Xurusindaana alla tana da, a nan ɲamallexi, ganta Tunka Duumanten baane.
20 « Maxa mukke roxo, maxa a tooɲa, baawo axakun yinmenu ɲi mukkaaxun ya yi Misira ɲiiɲen ŋa. 21 Xa maxa wundunbaaren tooɲa, a do giigiire. 22 Selli axa ga na i tooɲa ti tooɲande yi, i ga na laxaraxaasa katta in ŋa, n na i terinkana ya de. 23 Ken bire, n butten yanganxatan na axa raga, na axa ɲamallexu ti kaafan ŋa, axa yaqun na wundunbaaraaxu, axa renmun na giigiiraaxu.
24 « An ga na xaalisi baabu in jaman ŋa, misikiine ga ni do an batten ŋa, maxa a ɲaŋi a da ti goroxo¤ yi. 25 An ga na an kapanlenman yiraame raga tolomada¤ yi, [ken ga ni gaaranti] an na a saaga a yi saado kiyen gaa xenne. 26 Baawo a suturan ni ken baane ya, a na i faten suturini ti ken doroke ya. Ken kuŋa a riini saxu manne kanma ? Ken kanma, a ga na laxaraxaasa katta in ŋa, n na a terinkana ya koyi. Baawo inke ni hinnaanan ya.
27 « Maxa Alla diganburu, an xabiilan yinmanke, maxa a langa.
28 « An mara fakkon do an reese bollinte, maxa i dugundi, an na i jakka. An ren yugu sooma, an na a kini in ŋa. 29 An na ken me ya ɲaana an naanun do an jaxon ŋa : i na bito ɲeri ɲa do i maanu yi, segundin ŋa, an na i kini in ŋa.
30 « Xa wa ɲaŋiini in da seri sennu yi. Fonyaatun ga da ke be kari gunnen ŋa, xa maxa ken yiga, xa da a sedi wullun wure.